9. Pathian Nih Moses A Auh

Joseph a thih hnu ah a chungkhat vialte cu Izip ram ah an um rih ko. Anmah he an hrinsor vialte he cuka ram ah kum tampi chung an um i, tefa tam tuk an ngeih hna. Israel miphun tiah auh an si.

Kum za tampi hnu ah Israel miphun milu cu a tam tuk cang. Izip rammi hna nih Joseph kong le a rak bawmhchanh hna nak kong vialte cu an philh dih cang. Israel miphun cu tam tuk cang hna kaw an ṭih hna. Cucaah cu lio i Izip ram a rak uktu Faro nih Israel miphun pawl cu Izip miphun riantu sal ah a rak ser hna.

Izip miphun nih Isarael miphun pawl cu innlo tampi lawng hmenh si loin khua tampi an dirh an sakter hna. An rian a a hraan tuk ruang ah an nun a har tuk ko nain Pathian nih thlua a chuah hna i tefa tam chinchin an ngei.

Faro nih Israel miphun pawl tefa tam tuk an ngeih a hmuh tikah Israel miphun pa bawhte poh cu Nile Tiva ah hlonh hna ulaw that hna u, tiah awdar a chuah.

Israel nu pakhat nih fapa te pakhat a hrin. Amah he a vapa he bawhte cu an si khawh chung tiang an thuh.

Naute cu a nulepa nih an thuh khawh ti lo hnu ah, ti cung i a vuan kho mi bawm chung ah an chiah i Nile Tiva kam phaikung lak ah an chiah. A u nu te nih naute cung ah zeidah a cang lai tiah a lang in a cuanh.

Faro fanu nih bawm te cu a hmuh i a chung cu a vun zoh. Bawhte a hmuh tikah amah fapa si ding in aa lak. Naute i a nu lila cu naute i a nu a si, ti a hngal lo i, naute cawngtu ah a lak. Ngakchia te cu a nu hnuktnlum din a hauh ti lo hnu ah a nu nih Faro sin ah a chiah ṭhan. Faro fanu nih ngakchiapa te cu Moses tiah min a sak.

Moses cu a hung upa i, ni khat cu Izip pa pakhat nih Israel sal pakhat a velh lio a hmuh. Moses nih a miphun hawi Israel pa cu khamh aa zuam.

Hohmanh nih an ka hmu lo, tiah ruat in Moses nih Izip pa cu a thah i a ruak cu a phum. Nain Moses thiltuah mi cu mizeimaw pakhat nih a hmuh ziar.

Cu kong cu Faro nih a theih tikah Moses cu thah a timh. Moses cu Izip ram in a tli i, Faro ralkap pawl in a luatnak lai ramlak thetseram ah a zam.

Moses cu Izip ram in a hla tuk mi thetse ramkaro ah tukhal rian a ṭuan. Cuka rammi nu pakhat he an i um i, fapa pahnih an ngei.

Ni khat cu Moses cu a tuu pawl a khalh lio ah burbuk pakhat a alh thluahmah lio a hei hmuh. Burbuk cu ciam lak in a kang fawn lo. Fiang te i hmuh a duh ruang ah Moses nih burbuk cu a hei naih. Cuti burbuk kang lio a hei naih lio ah Pathian aw nih, “Moses, na kedan i phoih. Hmun thiang ah na dir kha,” tiah a ti.

Pathian nih a thawh i, “Ka mi hna an intuar ning ka hmuh. Nangmah hi Israel miphun Izip ram i sal an sinak in a chuahtu ding ah Faro sin ah ka'n kalter lai. Anmah cu Abraham le Isak le Jacob ka rak kamhmi hna ram, Canaan ram, ka pek hna lai,” a ti.

Moses nih a thawh i, “Mi nih, ho nih dah a'n thlah, ka ti hna sehlaw zeitin dah ka leh hna lai?” a ti. Pathian nih, “KEIMAH CU KEIMAH KA SI KO. KEIMAH nih a ka thlah, tiah va chim hna. Hi hi zungzal in ka min a si,” a ti.

Moses cu a thinphang i, biachim a thiam mi ka si lo, tiah i ruat in Faro sin ah a kal duh lo, cucaah Pathian nih Moses bawmtu ding ah a naupa Aaron a fial. Pathian nih Moses le Aaron cu Faro a lung a hah lai kong ralrinbia a chimh cia hna.

//Baibal tuanbia laknak: Exodus 1-4//