16. Chanhchuahtu Hna

Joshua a thih in, Israel miphun nih Pathian cu zei ah an rel lo i Kanan miphun a tangmi pawl zong an tthawl hna lo, Pathian nawlbia an zul lo. Pathian Dik Pakhat lawng bia ti lo in Kanan miphun pawk an pathian an biak cang hna. Cu lio ah cun Israel miphun cu siangpahrang an ngei lo i mi kip nih anmah le an hmuh ning i a dik an ti ning in an um cio dih hna.

Hiti Pathian zei i an rello ruang ah, Pathian nih Israel miphun cu an ral hna kut chung phakter in dan a tat hna. Hi an ral pawl nih Israel cu an thil an firpiak hna, an ngeihchia an hrawhpiak hna, minung zong tampi an thah hna. Kum tampi hnu ah Israel miphun cu an i ngaihchiah i Pathian cu chanh an hal.

Pathian nih an ral kut in luatter ding ah le ram chung i daihnak an ngeih khawhnak ding ah chanhchuahtu pakhat a pek hna. Nain a rauh hlan ah Pathian kong cu an philh hoi i milem biak an i thawk hoi. Cu ruang ah an pawng te i a ummi an ral Midian miphun kut chung phan lak in a tuah hna.

An ral nih Israel miphun cu an thlairawl vialte kum sarih chung an lakpiak dih hna. Israel miphun pawl cu ttihnak in an khat i Midian miphun hmuh khawh lonak ding lungkua ah an i thup. A donghnak ah chanh hal in Pathian sin ah an ttaphram tthan.

Ni khat cu, a min i Gideon timi pa pakhat cu Midian pawl i a thlairawl an firpiak nak hnga lo a thli tein a lorawl a ttuan. Gideon sin ah Pathian vancungmi a rung lang i, “Pathian cu nang, raltu lianngan, sin ah a um. Tho law Midian miphun kut in Israel cu khamh tuah,” a ti.

Pathian nih Gideon cu a fapa siasal hrawh a fial. Gideon cu mi nih hmuh lai a ttih ruang ah zan khua a muih tiang a hngah. Cun siasal cu a lak i sop cikcek in a den. Siasal a ram um tawn nak zawn ah biakttheng a ser i, Pathian sinah thawinak a tuah.

A thaizing ah mi nih siasal cu hrawh dih a si an hmuh i an thinghung tuk hringhran. Gideon cu thah ding ah a inn ah an kal hnawh, nain Gideon pa nih a rak thawh hna i, “A zei tuang ah dah nan pathian cu cuti bawmhchanh nan timh hna? Pathian an si ko ahcun anmah te i khamveng ko hna ngat seh!” a rak ti hna. Cuticun Gideon cu khamh a si.

Cun Midian miphun pawl cu Israel miphun pawl thil fir ah an i thawh tthan. An tam tuk ah hin rel cawk an si lo. Gideon nih Israel miphun pawl cu Midian ral tu ding in a pumh hna. Israel khamh ding ah Pathian nih a hman taktak ding fiannak ah Gideon nih Pathian cu hmelchunhnak pahnih a hal.

Hmasa bik ah, vawlei ah puanchia a chiah i, zingka dapti cu puanchia cung lawng ah tla sehlaw hmundang vawlei ah cun tla lo ding in Pathian cu a hal. Pathian nih a tuahpiak. A thaizing ah vawlei tu cin sehlaw puanchia cu ro ko seh, tiah a hal tthan. Cu zong cu Pathian nih a tuahpiak tthiamtthiam.

Israel miphun raldo a milu in 32,000 Gideon sin ah an ra, nain Pathian nih an tam tuk, tiah Gideon cu a ti. Cucaah ral tuk a ngamh lomi minung 22,000 cu Gideon cu a kirter hna. Cu hnu zong ah cun Pathian nih an tam tuk rih, tiah Gideon cu a ti tthan. Gideon nih ralkap 300 chimlo a dang vialte cu inn ah a kirter dih hna.

Cu zan ah cun Pathian nih Gideon cu, “Midian pawl an riahhmun ah kal law, an chimmi bia na theih lai i, ttihnak na ngei ti lai lo,” a ti. Cuticun cu zan ah cun Gideon cu riahhmun ah a kal i, Midian ralkap pakhat nih a hawipa a mang kong a chimh lio a theih. Cu pa a hawipa nih cun, “Mah mang i a sullam cu Gideon nih Midian pawl a kan tei lai, tinak pei a si ko hi!” a ti. Gideon nih Pathian a biak.

Cun Gideon cu a raldo pawl sin ah a rak ra i, tuki pakhat cio, tlak umpu pu khat cio, le meifar vanh khat cio a pek hna. Midian pawl an ihnak riahhmun cu an kulh. Midian pawl nih maw kan hmu sual hna lai kaw, tiah minung 300 rual nih cun an meifar cu umpu chung cio ah an chiah.

Cun, vawi khat te ah, an meifar an thuhnak umpu cu an vun khuai cio dih hna. An tuki cu an tum i, “Pathian ca le Gideon ca i vainam!” tiah an au.

Pathian nih Midian pawl cu buai lak in a tuah hna, cucaah anmah le anmah tu an i do an i tu i an i that thluahmah. Cu ah cun Midian miphun pawl dawi bawmtu ding ah inn i tluntermi Israel raldo pawl cu a ran khawh chung in rak chuak cio ding in an auh hna. Midian miphun tampi an thah hna, a tangmi pawl cu an ram chung in an tthio dih hna. Cu ni ni khat ah Mid. Pathian nih Israel cu a khamh.

Mi valte nih Gideon cu siangpahrang siter an duh. Gideon cu fim ngai kaw, an duhnak cu a cohlang duh lo, nain ral kut in lakmi tangka tu a sin i chuahpi ding in a hal hna. Gideon cu tangka tawrcheng pek a si.

Cu hnu ah Gideon nih thil diklo ngai a tuah. An rak putmi tangka cun siasal a ser i, rammi hna nih an Pathian cu hnulei an chanh tthan. Gideon sermi siasal tu biak an i thawk.

Pathian nih Israel cu siasal an biak ruang ah dan a tat hna. An ral nih an tei hna. A donghnak ah Pathian cu chanh an hal tthan i, Pathian nih chanhtu dang pakhat a peh tthan hna. Hitihin sualnak tuah, dantat, i ngaihchih, chanhchuah cu vawi tampi aa khirh aa nolh lengmang. Pathian nih Israel cu an ral kut in khamh ding ah chanhchuahtu tampi a pek hna.

A donghnak ah, rammi hna nih cun miphun dang vialte hna bantuk in siangpahrang ngeih an duh ve kong Pathian cu an hal. An siangpahrang cu a sang, a tthawngmi a si lai i, rallam ah a hruai kho tu hna hnga ding ding in an duh. Hiti an duhhalnak hi Pathian nih A duh lo, nain an duhmi cu A pek ko hna.

//Baibal tuanbia laknak: Judges 1-3; 6-8//