36. Muihmai Thlennak

Ni khat cu, Jesuh cu a zulhna hna lak in pathum, Peter, James, le John aa kalpi hna. (Hi John hi Jesuh tipil a petu John kha a si lo.) Anmah rual lawng tlang sang ngai pakhat ah an kai.

Vawikhat pi ah khin, Jesuh muihmai cu nika ceu bantuk le a thilpuan zong khuaceu tluk in raang in le vawleicung thil raang vialte nak i raang in a hun i thleng.

Cu cah cun kum za tam tuk lio minung Moses le Elijah an lang colh. Jesuh he cun an i chawn i, Jerusalem ah a rauh hlan ah a thih lai kong bia an i ruah.

Cuti Moses le Elijah Jesuh he an i chawnh lio ah cun, Peter nih, “Jesuh, hi kaa i um hi a tthat tuk hi ta. Deu pathm in kan sak lai, pakhat nangmah ca, pakhat Moses ca, a dang pakhat Elijah ca ah,” a ti. Peter nih zei ka chim rua, ti awk aa hngal lo.

Cuti Peter bia a chim lio ah cun an cung ah minmei ceu ngai a rung ttum i, cu minmei chung cun aw pakhat nih, “Hi hi Ka Fapa Ka dawtmi a si. Amah ah hin kaa lawmhnak a tling. Amah bia hi ngai u,” a ti. Zultu pathum cu an zate in an thinphang tuk i, vawlei ah an bok colh.

Cun Jesuh ih a tawngh hna i, “Thinphang in um hlah u. Tho u,” a ti hna. An sir an vun zoh tik ah cun midang an um ti lo, Jesuh lawng a um.

Tlang cung cun an ttum lei ah, Jesuh nih a thawh hna i, “Hi kaa i a cangmi thil vialte kong hi thihnak in ka thawhtthan hlan tiang ho sin hmenh ah chim hlah u,” a ti hna.

//Baibal tuanbia laknak: Matthew 17:1-9; Mark 9:2-8; Luke 9:28-36//