39. Jesuh Cu Bia An Ceih

A caan cu zanttim hrawng a si. Ralkap pawl nih Jesuh cu bia hal awk ah tlangbawi zik inn ah an kalpi. A langhlat in Peter nih a zulh hna. Inn chung i Jesuh an luh pi tikah, Peter cu khualeng ah a um i meiphu a to ve.

Inn chung ah cun Judah hruaitu pawl nih Jesuh cu a bia an ceih. Amah kong lih phunphun a ttawn kho minung tampi an ratpi hna. Nain pakhat le pakhat an bia an i khat hna lo, cu ruang ah Jesuh palhnak kong an langhter kho lo. Jesuh cu zei bia hmanh a chim lo.

A donghnak ah tlangbawi zik nih Jesuh cu dengteo in a zoh i, “Kan chim tuah, nangmah cu a nungmi Pathian Fapa, Messiah, na si maw?” tiah bia a hal.

Jesuh nih, “Ka si ko, Pathian he ka tthut le vancung in liangngannak he ka rat na ka hmuh te lai,” thilpuan hruk lio mi cu aa thleh dih i, aw thang pi in, “Biahngaltu dang ho hmanh kan herh ti lo. Pathian Fapa ka si tiah a chim nan theih dih cang ko hi. Zeitin dah nan ruah cio?” a ti hna.

An zate in an thawh i, “A thih hrimhrim a hau!” tiah an au colh. Cun a mit an huh, cil an chak i, an bengh i, capo ah an saih.

Inn leng ah cun nu pakhat nih Peter cu hmu kaw, “Nangmah zong hi Jesuh he nan rak um tti bal si lo mei!” a ti. Peter nih aa pheh. A hnu tlawmpal ah nu dang pakhat nih, tuan deuh bia bang cun a hal tthan, nain Peter nih aa pheh tthan. A donghnak ah mibupi nih cun, “Nangmah zong Jesuh bang Galilee mi na si ve ko i nan rak um tti ko,” an ti hna.

Peter cu chiat aa serh i, “Mah pa ka hngalh a si ahcun Pathian nih ka cung ah zei poh tlunter ko seh!” a ti. Cu lecangka ar a khuang, Jesuh cu aa mer i Peter cu a hei zoh.

Peter cu khualeng lei ah a chuak i thinlung kekkuai in a ttap. Cu lio ah cun, Jesuh a leirawitu Judah nih Jesuh cu sual puh in a um cang ti a hmuh tikah, a ngaihchia tuk hringhran i, a kal i amah le amah aa that.

A thaizing zingka te ah Judah hruaitu pawl nih Jesuh cu thah a si khawh nak lai Rom mangkibawi Pilate sin ah a rak chuahpi. Pilate nih bia cu a vun hal, “Judah Siangpahrang na si maw?” tiah.

Jesuh nih, “Na chim ning bang ka si ko, nain kei ka Penram cu vawlei penram a si lo. Rak si sehlaw cu, ka mirian pawl nih an kan dohpiak diam cang hnga. Nain vawlei i ka run cu Pathian biatak kong chimh ruah ah a si. Biatak a duh mi poh nih ka bia an ngaih,” a ti. Pilate nih, “Biaktak cu zei dah a si?” a ti.

Jesuh he an i chawnh dih in Pilate cu leng ah a chuak i, mibupi cu a thawh hna i, “Hi pa ah hin zei sualnak hmanh ka hmu lo,” a ti hna. Nain Judah hruaitu pawl le mibupi nih cun Pilate cu, “Amah cu vailam ah that ko!” tiah an hun au hnawh lulhmalh. Pilate nih, “Amah cu a sual ttung lo,” a ti hna. Nain thang chinchin in an au. Cun Pilate nih, “Amah cu a sual ttung lo!” a vawi thumnak a ti tthan.

Nain Pilate cu mibupi nih buainak an chuahpi lai ti phang kaw, Jesuh cu vailam i thah awk ah a pek hna. Ralkap nih Jesuh cu an tuk, siangpahrang puan an aih i, hling in tah mi siangpahrawngluchin an chinh, cun serhsat nuamsaihnak in, “Zoh hmanh u, Judah Siangpahrang hi!” an ti.

//Baibal tuanbia laknak: Matthew 26:57-27:26; Mark 14:53-15:15; Luke 22:54-23:25; John 18:12-19:16//