26. Jesuh Nih A Rian A Thawk

Setan tukfawrhnak a tei dih hnu ah, a khuasaknak Galilee ram ah Thiang Thlarau tthawnnak i khat in a rak tlung. Mi cawnpiak pah in hmun khat hnu hmun khat a kal. Mi kip nih amah kong cu a ttha lei in an i ceih dulmal.

Jesuh cu a rak tthannak Nazareth khua ah a kal. Sabbath ni ah biakpumh hmun ah a kal. Amah cu profet Isaiah cazual an pek. Jesuh nih cazual cu a vun samh i a rel.

“Pathian A Thlarau a ka toih cang, sifakmi hna sin i thawngttha, tlaihhrenmi hna sin i luatnak, mitcawmi hna ca i khuahmuhtthannak, le thongtlami hna sin i luatternak thanh awk ah. Hi hi Bawipa lunglawmhnak kum cu a si,” a ti.

Cun Jesuh cu a tthu. Mizapi nih amah cu naih tein an zoh. Messiah kong chimnak bia a si an hngalh cio dih. Jesuh nih, “Nihin ah hi bia vialte cu a tling dih cang, ti nan theih dih cang hi,” a ti hna. Mi vialte cu an khuaruahhar tuk.“Ziah, Joseph fapa kha a si lo ma?” an ti.

Cun Jesuh nih, “Biatak ka'n chimh hna, zeibantuk profet hmenh a chuahkehnak khua ah cun cohlan an tong lo. Profet Elijah a rak nun lio ah khan Israel ram ah nuhmei tampi an rak um ko. Nain kum thum le cheu chung ruah a rak sur lo lio ah khan Pathian nih Elijah cu Israel nuhmei zuanhnawh ding ah, si loin miphun dang nuhmeinu tu zuanhnawh ding ah a rak thlah.”

“Cun profet Elisha a rak nun lio zong ah khan Israel ram ah vuncuar zawtnak a ngeimi an rak tampi ko. Nain Elisha nih pakhat hmenh a rak damh hna lo, Israel i a ral a simi ralbawipa Naaman tu a rak damh,” a ti. Hi bia an theih in mipi cu an thinhung tuk hringhran.

Biakpumhnak hmun in Jesuh cu an hnu i chengpalang in thlak ding ah an ratpi. Nain Jesuh cu mipi lak ah aa tenh zau i Nazareth khua cu a chuah tak.

Cun Jesuh cu cu kaa hrawng i aa chawhvah tikah mibu tam tuk hringhran a sin ah an ra. mitcaw, kebei, hnachet, holhkholo tehna tel in midamlo phunphun a sin ah an rak ratpi hna i, Jesuh nih a damter hna.

Khuachia tlaihmi mi tampi zong Jesuh sin ah cun an rak ratpi hna. An chung in khuachia cu an chuak i, an chuah pah ah, “nangmah cu Pathian Fapa na si!” tiah an au. Mibupi cu an khuaruahhar tuk i Pathian an lawmhbiak.

Cun Jesuh nih zultu tiah auh mi hna minung hleihnih a thim hna. Zultu cu Jesuh cawnpiakmi hna an si. Amah sin ah khual an tlawng i amah sin in a cawngmi an si.

//Baibal tuanbia laknak:Matthew 4:12-25; Mark 1:14-15, 35-39; 3:13-21; Luke 4:14-30, 38-44//