41. Pathian Nih Jesuh Cu Thihnak In A Thawhter

Jesuh cu vailam i an tah hnu ah amah a zumlomi Judah hruaitu pawl nih Pilate cu an thaw i, “Mah mi lihchimpa Jesuh nih khan ni thum hnu ah a tho tthan te ding in aa chim. A thlan cawngh a hau, a zultu pawl nih a ruak an fir sual lai i, thihnak in a tho tthan e, an ti sual lai,” a ti.

Pilate nih, “Thlan cu a him khawh chung in va tuah ko u,” a ti hna. Cuticun thlan innka kharnak lungphermi cu hmahthahnak an tuah hnu ah a ruak an fir khawh nak hnga lo, thlan cu ralkap an cawnghter hna.

Jesuh an vui a thaizing cu Sabbath ni, dinh ni, a si. Sabbath dih a thaizing zingka te ah a ruak cung i rimhmui zeimaw va chia ding in nu tampi thlan ah an kal.

Li fak pi in aa hnin. Vancung in Bawpa vanmi pakhat, nimtlau tluk ceu in a rung lang. Thla innka kharnak lungpher pi cu a thawn i a cung ah a tthu. Thlan a vengtu hna ralkap pawl cu an ningtti tuk hringhran i mithi bang vawlei ah an i hlonh dih.

Vanmi nih nu rual cu a thawh hna i, “Ttih hlah u. Jesuh cu hi kaa ah a um ti lo. A rak chim bang in thihnak in a tho cang! Thla chung hi rak zoh tuah u,” a ti hna. Nu rual nih cun thlan chung cu an vun zoh i Jesuh an rak zalnak cu an hmuh. A mipum tu cu a um ti lo!

Cun vanmi nih nu rual cu a thawh hna i, “Thihnak in Jesuh a thawh tthan cang kong le nanmah hlan ah Galilee i a rak kal chung kong a zultu va chim hna u,” a ti hna.

Nu rual cu ttihnak le lawmhnak in an khat. Cu thawng ttha cu zultu pawl va chimh ding ah an tli colh.

Lampi ah, an sin ah Jesuh a lang, i an biak. Jesuh nih a thawh hna i, “Ttih hlah u. Zultu pawl kha Galilee ah ka ton te hna lai kong va chim hna u,” a ti.

//Baibal tuanbia laknak: Matthew 27:62-28:15; Mark 16:1-11; Luke 24:1-12; John 20:1-18//