23. Jesuh Chuahnak Kong

Joseph nih Mary cu fa a pawi ti a theih tikah, naute cu amah fa a si lo ti a hngalh i, cu ruang ah a thli tein tthen ding ah khua a khan. Cuti a tuah khawh taktak hlan ah, a mang ah vancungmi a rung lang.

Vanmi nih cun a thawh i, “Joseph, Mary hi na nupi ca ding i tthit awk ah ttih hlah. A chung i fa cu Thiang Thlarau thawng in a pawimi a si. Fapa a hrin lai. Jesuh tiah min na sak lai, zeicah tiah mi vialte an sualnak in a khamh hna lai,” a ti.

Cuticun Joseph nih Mary cu a tthit i a nupi si in inn ah aa kalpi, nain fa a hrin hlan cu a ihpi lo.

Mary cu nau aa tthen ding a si lai te ah, Rom cozah nih rammi vialte cu milurelnak tuah ding in anmah le an chuahkehnak khua cio ah kal an fial hna. Mary le Joseph cu an umnak Nazareth khua in Bethlehem ah khuallam sau ngai kal ding an si.

Bethlehem khua an phak tik ah cun riahcamnak ding hmun an ngei lo. Hmun pakhat an hmuh umchun cu saram pawl riahnak a si. Cu kaa ah cun naute a chuak i, a nu nih naute cu saram pawl an rawl einak kuang chung ah a thlim, zeicahtiah naute ca ah hmun dang a um lo. Naute cu Jesuh tiah min an sak.

Cu zan ah cun, tukhal cheukhat cu cu kaa hmun pawl ramlak ah an thu an khal. Lakhruak pi in vanmi pakhat, ceu ngai in aa thuammi an sin ah a rung lang i, an thinpang tuk hringhran. Vanmi nih, “Ttih hlah u, zeicah tiah nan sinah thawngttha chim awka ngei. Messiah cu a chuak cang!” a ti hna.

“Kal u law naute cu kawl zau tuah u. Puan in an zual lai i, caw rawl einak kuang chung ah an thlim nan hmuh ko lai,” a ti hna. Cu lecangka, van ah vanmirun an khat i, Pathian cu hla in an thangtthat, “Pathian cu van ah khin surparnak co ko seh, A dawtmi hna umnak hi leicung ah hin daihnak tlung ko seh!” an ti.

Naute Jesuh umnak hmun i tukhal pawl an phak tikah, vanmi nih a chimh hna bantuk te in naute cu cawrawleinak kuang chung ah an hmuh. Lawmhnak in an khat. Mary zong aa lawm tuk ve. Tukhal pawl cu ramlak ah a kal tthan i, an hmuh le an theihmi vialte ah Pathian an thangtthat.

Cu hnu tlawmpal ah, nichuahlei ram in mifim rual nih van ah arfu phundang ngai an hmuh. Judah mi hna i an siangpahrang a chuak, tiah a sullam a lakning cu a si. Cu ruang ah, cu siangpahrang ton ruah ah lam hlat pi ah kal an i thawh. Bethlehem ah an ra i, Jesuh an thlimnak hmun cu an hmuh.

Sunghno a nu sin i naute Jesuh an hmuh tikah, an khuk an i bil i an biak. Jesuh cu a man a fak ngaimi laksawng an pek. Cun an ram ah an tlung.

//Baibal tuanbia laknak: Matthew 1; Luke 2//