24. John Nih Jesuh Cu Tipil A Pek

John cu a hung tthang i prophet a hung si. Thetse ramkaro ah a um i, khuaihliti le khaubawk in aa cawm i, kalauk phaw in sermi thil an hruk.

John cawnpiaknak ngaih ruah ah minung tampi a sin ah an ra. An sin ah thawngttha a chim i, “Nan sualnak i ngaihchih u, zeicah tiah Pathian Pennak cu a nai cang!” tiah a cawnpiak hna.

Cheukhat cu John cawnpiaknak an theih in an sual an i ngaihchih i tipil an ing, biaknak lei hruaitu tampi cu i ngaihchih lo pi le sualnak i phuang lo pi in tipil ing ding in an rak chuak ve.

John nih biaknak lei hruaitu pawl cu a thawh hna i, “Rul hna! I ngaihchih hmasa u law nan nunzia thleng hmasa ngat u.. Thei ttha a tlai lomi thingkung cu hau an si lai i, mei ah peih an si lai,” a ti hna. Hi nih hin profet Isaiah nih a rak chimchungmi,, “Zo hmanh, nangmah hlan ah lamkal ka thlah hmasa lai i, amah nih lam a'n sialpiak cia lai,” a hung tlinnak ah a si.

Judah cheukhat pawl nih John cu Messiah a si le si lo an hal. John nih, “Keimah cu Messiah cu ka si lo, nain ka hnu i a ra te dingmi cu keimah nakin a ngan deuh suaumau lai. Kei cu a keden hri phoihtu ding hmenh ah ka tlak lo,” tiah a leh hna.

A thaizing ah Jesuh cu John i tipil pek awk ah a ra. John nih a hmuh tikah, “Zo tuah u! Vawlei sualnak kalpitu Pathian Tufa khi,” a ti.

John nih Jesuh cu a thawh i, “Kei cu nangmah tipi petu ding ah ka tlak lo. Nangmah tu nih tipi cu na ka pek awk a si,” a ti. Nain Jesuh nih, “Nangmah nih na ka pek awk a si ko, zeicahtiah cu cu tuah awk ah a dikmi a si ko,” a ti. Cuticun John nih Jesuh cu tipi a pek, a sual ruang tu ah cun a si lo — anih cu a sual ballo.

Jesuh cu ti chung in a hung chuah tikah, Pathian Thlarau cu tthuto bantuk in aa langh i a cung ah a rung fu. Cu sin in vancung in aw pakhat nih, “Nangmah cu Ka Fapa dawt na si, na cung ah lungsinak ka ngei tuk hringhran,” a ti.

Pathian nih John a rak chimh ciami pakhat cu, “Pathian Thiang Thlarau cu tipil na pekmi cung ah a tung ttum lai. Amah cu Pathian Fapa a si lai,” ti a si. Pathian nih pakhat lawng a si. Nain Pathian cu Pa, Fapa Jesuh, Thiang Thlarau tiah mikung sinak phun thum in a um.

//Baibal tuanbia laknak: Matthew 3; Mark 1:9-11; Luke 3:1-23//