48. Jesus Cu Kamhmi Messiah A Si

Pathian nih vawleicung a rak ser lio ah cun zeizong te hi a rak tlamtling dih ko. Sualnak a rak um lo. Adam le Eve cu anmah le anmah zong an i daw, Pathian zong an daw. Thihnak silole zawtfahnak silole nganfahnak a rak um lo. Cu cu Pathian nih thil an si ning ding i a rak duh mi a si.

Setan cu dum chugn ah rul in aa langh i Eve cu hleng kaw, amah he Adam he Pathian hmai ah an hun sual. Cuti an sual ruang ah, thihnak, zawtfahnak, nganfahnak tehna hi vawlei mi vialte nun i a um chih mi ah a hun i cang.

Cu nak i a poi deuh rih mi cu Pathian he an i pehtlaihnak a cah a si. Cu hnu cun mi vialte Pathian ral si cia in an chuak. Nain Pathian nih sualnak rawkmi vialte remh ding ah khua a khan ziar.

Pathian nih bia kamh hna i, Eve tefa pakhat nih Setan lu a rial lai i, anih Setan nih a kedil cuk aa zuam lai, tiah a rak ti hna. Cu nih a chim duhmi cu, Setan nih Jesuh cu a thah lai, nain Pathian nih ni thum hnu ah a thawhter tthan lai tinak a si. Jesuh nih Setan tthawnnak cu zungzal daih in a hrawh te lai kong chimnak a si.

Pathian nih hi vawlei hi buanchukcho in a rak hrawh lio ah, Amah a zum mi khamhnak ding ah sangphawlawng a rak pek hna. Cu bantuk in, an sual ruang ah mi vialte thi dih ding an si ko nain Jesuh a zummi vialte khamhnak ding Pathian nih lam a ser.

Melchizedek Abraham thluachuah a petu tlangbawi a si. Melchizedek bantuk in Jesuh cu tlangbawi a si ve, nain Jesuh cu Tlangbawi Lianngan Pi a si. Jesuh nih amah lila i hmang in vawi khat telawng raithawinak a tuah. Cu raithawinak cu vawlei mi vialte sual thianhnak ca ah a herh.

Pathian nih Abraham cu, “Nangmah hin, vawleimi vialte thlua chuah an si lai,” a rak ti. Jesuh cu Abraham tefa a si. Vawleimi vialte Jesuh thawng in thlua chuah an si, zeicahtiah amah a zummi cu Pathian mithim ah an cang i, Abraham i thlarau tefa an si.

Pathian nih Abraham cu raithawinak ah Isak si lo in tukawng tu a pek. Kanmah thih ding a kan thihpiak tu Jesuh cu, cu tukawng bantuk cu a si. Nangmah zong i tel chih in, vawleimi vialte an sualnak cio ruang ah thi ding an si ko! Nain Pathian nih na aiawh ah raithawinak i thi ding in Jesuh a kan pek.

Pathian ih Izip ram i chiat hmanung bik a rak tlunter liotan ah, Israel chungkhar a simi kip cu sitling tufa thah i an innka ba i a thisen theh le thuh a rak fial hna. Pathian vanmi nih thi a hmuh tikah, an inn cu a lanh tak i an fater fapa a that hna lo.

Jesuh cu kan Lanhtak Tufa a si. Amah cu soisel awk ngeilo le sualnak ngeilo a si i Lanhtak Puai lio i thahmi a si. Jesuh a zummi ca ah cun, Jesuh thisen nih an pumpak sualnak cu a thianh dih cang ruang ah Pathian dantatnak nih a lanh tak hna.

Pathian nih Amah mithim Israel miphun he biatiamnak a rakt uah. Pathian Biatiam Thar ah cun zei miphun si ko zong le zei bantuk minung si ko zong ah Jesuh zumh ko poh ahcun Pathian mithim si dih khawh cio a si.

Moses cu Pathian Bia kong a rak phuangtu profet lianngan a si. Moses bang Jesuh cu profet a si, nain Jesuh cu profet ngan bik a si. Amah cu Pathian Bia a si.

Pathian nih David sin ah Messiah cu amah hrinsor chung pakhatkhat in a si te lai kong a rak kamh. Messiah a simi, Jesuh, cu David hrinsor maldang ngai a si.

David bantuk in, Jesuh cu siangpahrang a si, nain Jesuh cu zeizong vialte siangpahrang a si. A ra tthan te lai i a Penram cu diknak le daihnak he a uk te lai.

//Baibal tuanbia laknak: Genesis 1-3, 6, 14, 22; Exodus 12, 20; 2 Samuel 7; Hebrew 3:1-6, 4:14-5:10, 7:1-8:13, 9:11-10:18; Revelation 21//