10. Chiattlung Phun Hra

Moses le Aaron cu Faro sin ah an kal. Faro cu an thawh i, “Israel Pathian nih, ‘Ka mi cu chuak hna seh!’ a ti,” tiah an chimh. Faro nih an bia cu a ngaihpiak duh hna lo. Israel miphun pawl luatter cu chimlo, rian har chinchin tu a ṭuanter hna!

Faro nih Israel pawl chuah a sianh hna lo ruang ah Pathian nih Izip ram ah chiat phun hra a tlunter. Hi chiat hmang in Pathian nih Faro nakin le Izip an pathian vialte nakin a ṭhawn deuh zia aa langhter.

Pathian nih Nile Tiva pi cu thisen ah a canter, nain Faro nih Israel miphun cu a kalter duh hlei hna lo.

Pathian nih Izip ram khuazakip khat in utlak a thlah. Faro nih utlak vialte kianter ding ah Moses cu a nawl. Nain utlak vialte an thih dih hnu ah Faro cu a lung aa hahter ṭhan i Israel miphun cu kalter a sianh hna lo.

Cucaah Pathian nih fikfa le tho hmang in chiat a tlunter. Faro nih Moses le Aaron cu a auh hna i, chiat a tlungmi an kham khawh ahcun Israel miphun cu Izip ram in an chuah khawh ko lai kong a chimh hna. Moses cu thla a cam i, Pathian nih tho vialte cu Izip ram in a hloh dih hna. Nain Faro nih a lung aa hahter ṭhan i Israel miphun cu kal a sianh hoi hna lo.

Cu hnu ah Pathian nih Izip miphun an saṭil vialte thihter ding in zawtfahter i thi dih ding in pul a tlunter. Nain Faro thinlung cu a hak i Israel miphun cu kal a sianh hlei hna lo.

Cun Pathian nih Moses cu Faro hmaika ah vutcam hlorh ding in a fial. Cuti a hun hlorh tikah Izip miphun pawl an vun ah hmachia nih a tlunh dih hna, nain Israel miphun pawl cu a tlunh hna lo. Pathian nih Faro lung cu a hahter i, Israel miphun luatchuahter cu a duh nemmam lo.

Cu hnu ah, Pathian nih rial a tlakter ciammam i Izip ram i an thlaicin vialte a hrawh dih hlei ah khualeng a chuakmi vialte thi lak in a den dih hna. Faro nih Moses le Aaron cu a auh hna i, “Ka sual. Kal cang ko u,” a ti hna. Moses cu thla a cam i, rial cu a tla ti lo.

Nain Faro cu a sual ṭhan, a lung a hak ṭhan i, Israel miphun cu kalter a sianh ṭhan hna lo.

Cucaah Pathian nih Izip ram chung hmunkip khat dihlak in khaubok tawrcheng a chuahter. Cu khaubok nih cun rial i a hrawh lomi thlaicin umchun vialte cu an ei dih.

Cun Pathian nih ni thum chung chunmui a tlunter. Khua cu mui tuk hringhran kaw Izip miphun pawl cu an inn in an chuak kho lo. Israel pawl umnak hmun tu ah cun khua a ceu ko.

Hi bantuk chiat phun kua tuar hnu zong ah Faro nih Israel miphun pawl kalchuahter a sianh hlei hna lo. Faro nih zeitihmanh in a lung a ṭhulh hlei lo ruang ah Pathian nih a donghnak bik ah chiat phun khat tlunter rih ding in a timh. Cu nih cun Faro lung a thlen khawh cang lai.

//Baibal tuanbia laknak: Exodus 5-10//