38. Jesuh Rawi A Si

Jesuh cu phung a chimnak kum thum hrawng a hung si cang. Cun Izip ram ah kum tam tuk chung sal i an cannak in Pathian nih a chanhchuah hna philhlonak ah Judah miphun nih an tuahmi Lanhtak Puai caan a hun phan. Jesuh nih a cung ah zeidah a tlung lai, ti a hngalh cia i, a zultu pawl cu Jerusalem ah a kal lai kong le cu kaa i thah a si te lai kong a chimh hna.

Jerusalem khua i Judah hruaitu hna nih Jesuh cu Messiah a si, ti hi an cohlang duh lo i, amah thahnak ding khua an khang. Jesuh zultu hna lak ah pakhat cu Judah a si. Zultu hna an phaisa tlaitu a si, nain mi dinglo si kaw, phaisa cu aa fir tawn. Cu Judah nih cun Judah hruaitu hna cu Jesuh a rawiphiarpiak khawh hna ding kong a chimh hna.

Tlangbawi zik nih a hruai hna i, Judah hruaitu pawl nih Judah cu Jesuh rawiphiar man ah ngun tangka sawmthum an pek. Cuti thil a hung can cu profet pawl nih an rak chim cia ning tein a si. Judah cu a lungtling i phaisa cu aa lak dih in Jesuh tlaih a bawmh khawhnak ding lam kawl aa thawk.

Jesuh cu a zulhtu pawl he Lanhtak Puai an hmang. Rawl cu an vun ei i, Jesuh nih changreu a vun lak, a vun cheu i, “Hi hi i lak u law ei tuah u. Na ca i ka cheumi Ka taksa a si. Hi hi keimah philhlonak ah run tuah tawn lengmang u,” a ti hna. Cuticun Jesuh nih a ca i a takpum a pek te ding kong a chimh hna.

Cun mitsurhang hrai aa lak i, “Hi hi ding u. Sual ngaihthiamnak ca i ka thletmi, Biatiam Thar sernak ka thisen a si. Hi mitsurhang nan din fatin keimah philhlonak ah run tuah tawn u,” a ti hna. Cuticun an sual ngaihthiamnak ding ah a thisen a thlet lai kong Jesuh nih a chimh hna.

Cun Jesuh nih a zultu cu a thawh hna i, “Nanmah lak i pakhat nih a ka rawi lai,” a ti hna. A zultu pawl cu an lau tuk i, cu bantuk thil cu ho nih a tuah hnga, ti an hngal lo. Jesuh nih, “Changreu pel ka pek mi cu a ka rawiphiartu a s lai,” a ti. Cun chagreu cu Judah a pek.

Judah cu changreu aa lak lecangka, a chung ah Setan a lut. Judah cu Judah hruaitu pawl i Jesuh an tlaih va bawm ding in a chuak. Cu caan cu zan a si.

Zanriah ei khawh in Jesuh le a zultu hna cu Olives Tlang ah an kai. Jesuh nih a thawh hna i, “Nan zate nih tuzan nan ka hlawt lai. ‘Tukhal ka tuk lai i tu vialte cu an i tthek dih lai,’ tiah aa ttial ko kha.”

Peter nih, “Midang nih in kal tak hna hmenhseh, kei cu ka'n kal tak lai lo!” a ti. Cun Jesuh nih Peter cu, “Setan nih na zeizong te ngeih khawh dih a'n duh, nain Peter, na zumhnak na hlohthlaunak hnga lo thla ka'n campiak. Cuti a si ko bu ah, tuzan ar a khuan hlan ah, a hngalh hmenh ka hngal lo, tiah vawi thum khengte na ka hlawt te lai,” a ti.

Peter nih Jesuh cu a thawh i, “Ka thihnak ding zong si ko seh, nangmah cu ka'n hlaw bal lai lo!” a ti. Zultu dang zong nih cuticun an ti cio.

Cun Jesuh cu a zultu he Gethsemane timi hmun ah an kal. Jesuh nih a zultu pawl cu tukfawrhnak chung a luhnak hnga lo thlacam ding in a chimh hna. Cun Jesuh cu amah telawng i thla cam ding in a chuak.

Jesuh cu vawi thum thla a cam, “Ka Pa, Minung sualnak ngaihthiamnak ah lam dang a um hrat lo a si le cu Na duh ning bang si ko seh,” a ti. Jesuh cu a vansang tuk hringhran i a thlan cu thisen dor bantuk in a chuak. Pathian nih amah hramtu ding ah vanmi a run thlah.

Thla a cam dih fatin, Jesuh cu a zultu hna sin ah a rak ra tthan, nain an rak ngu dih. A vawi thumnak thla a cam khawh in, Jesuh nih a thawh hna i, “Khah, i hlau cang tuah u! A ka rawitu a ra cang hi,” a ti hna.

Judah cu Judah hruaitu hna, ralkap rual le vainam le thingtan aa putmi mibu pi he an rak ra. Jesuh sin ah a ra i, “Cawnpiaktu, Kan in don hi,” a ti i a hnamh. Cu cu Judah hruaitu pawl nih ho dah tlaih ding cu a si, ti an hngalh khawhnak ding langhternak a si. Cun Jesuh nih, “Judah, hnamh in maw na ka rawi ko lai?” a ti.

Ralkap pawl i Jesuh an vun tlaih ah, Peter nih a vainam aa zuh i tlangbawi zik mirianpa hnakhaw a vun pheh. Jesuh nih, “Vainam cu chia zau tuah! Ka duh cun keimah rungtu ding ah vanmibu run thlah ding in ka Pa ka hal khawh ko. Nain ka Pa nawl ka zulh ko lai,” a ti. Cun Jesuh nih mipa a hnakhawh cu a vun hramh, zultu cu an zate in an tli dih.

//Baibal tuanbia laknak: Matthew 26:14-56; Mark 14:10-50; Luke 22:1-53; John 18:1-11//