50. Jesuh A Ra Than Lai

Kum 2,000 chung dengmang Messiah a simi Jesuh Thawng Ttha cu a karhvak chin lengmang i Khrihfabu zong a tthang chin lengmang. Jesuh nih vawlei caan dongh tikah a rat tthan lai kong a chim, nain a rak ra rih lo.

Jesuh rat kan hngah lio ah hin, Khrihfa cu thianghlim le Pathian duh ning tein kan nun awk a si. Jesuh nih vawlei i a rak tlonlen lio ah, “Hi Penram Thawng Tha hi vawlei khuazakip le miphun vialte sin ah hngalhpitu dirhmun in chimphuan dih a si hmasa lai i, cun caan donghnak cu a phan te lai,” a rak ti.

Miphun bu tampi nih Jesuh kong an thei rih lo. Vancung i a tlun hlan ah, Jesuh nih Khrihfa pawl cu a thei rih lo mi sin i Thawng Tha chim rian a fial hna. A thawh hna i, “Kal u law miphun vialte lamkal siter hna u. Lo cu rawlvoi ttuan ding ah an cu hmin ding cang!” a ti.

Jesuh nih a ti rih mi cu, “Mirian cu a bawipa nakin a ngan deuh lo. Nannih cu keimah ruang ah hrem le thah nan si lai. Hi vawlei ah hin cun harnak nan tong ko lai, nain nan thachia hlah u. Setan cu ka tei cang! A dongh tiang zumhtlak in um ko u, law khamh nan si lai.”

Jesuh nih caan dongh kong fianternak ah a lamkal pawl cu tuanbia pakhat a chimh hna. “Pathian Penram cu mipa pakhat, a lo ah thaici ttha a tuhmi bantuk a si. Nain zan a ih kar ah a ral a rak ra i rawlkung lak ah cun belh ci a vorh ta i, lodiam a kal.”

“Thlaikung cu an hung keoh tikah, rianttuantu pawl nih an bawipa cu an thawh i, ‘Bawipa, mah lo ah hin ci ttha na duh dara cu kan ti. Zeitin dah belh an um khawh ning a si kun?’ tiah an hal. An bawipa nih a thawh hna i, ‘Ralpa nih a vorh mi an si,’ a ti.”

“An thawh i, ‘Sile belh cu kan bot hna lai maw?’ tiah an hal. An bawipa nih, ‘Belh nan bawh ahcun, rawlkung tete zong nan bawh chih sual lai. Rawl ttuan caan tiang hngak ko rih u law, belh cu khangh awk nan khawmh nan pon te hna lai i, rawl cu ka buk chung ah nan rawn te hna lai,’ a ti hna.”

A lamkal pawl nih cu bia cu an theithiam lo i, Jesuh cu an thawh i, “Hi tuanbia sullam hi kan chim tuah,” an ti. Jesuh nih, “Ci ttha a tuh mi pa cu Messiah a si. Lo cu hi vawlei hi a si. Ci ttha nih Pathian Penram chung minung a chimduhnak a si.”

“Belh nih sualnak penram chung minung pawl a aiawh ve. Belh a vorhtu ral cu khuachia a si. Lo rawl ttuan caan cu vawlei caan dongh ni chim duhnak a si i rawlttuantu cu vanmi runrual an si.”

“Vawlei caan a dongh tikah khuachia nih a ngeih mi hna minung vialte cu pumh an si lai i ttah le hacangrialnak in a khatmi meiphu chung pi ah thlak an si lai. Cun midingmi hna cu an Pa Penram chung ah cun nika bang an ceu camcin lai,” a ti.

Jesuh nih, vancung i a tlun lio i vawlei a rak kaltak bantuk te in, minmei chung in le a mipum taksa hrimhrim in, a rak rat tthan te ding kong a chim. Jesuh nih aa kam rih mi cu, a rak rat tthan tikah, a thi cia Khrihfa vialte thihnak in an tho lai i amah cu van ah an hung don lai, a ti.

Khrihfa a si i, a nung rih mi hna cu a thi cia mi hna he van ah khin cawi ve an si lai i, Khrihfa vialte cu Jesuh he zungzal an umtti lai. Jesuh cu a mi hna he i tthen ti lo in zungzal an leng tti cang lai.

Khrihfa cu nunnak suiluchin pek an si lai. Thih hnihnak a simi hell cu an tep bal ti lai lo. Pathian le a tling khitkhet mi daihnak he tu in an leng tti cang lai.

Nain Jesuh a zum lo mi tu cu Pathian nih bia a ceih hna lai i zungzal in hell chung ah thlak an si lai. Hell chung ah cun minung cu ngol lo in ttah aihram i temhnak in hacang rial ding khi a si. A mit kho bal ti lo mi mei nih a kangh hna i, a thi bal ti lo ding tholung nih a ei hna lai.

Jesuh nih Setan le a penram cu a dih-umnak in a hrawh lai i amah Setan cu a alh zungzal mi mei lidil chung ah a thlak lai. Thihnak zong hell chung i mei lidil ah cun thlak chih a si ve lai.

Jesuh nih Van Thar le Lei Thar a dirh lai. Zeizong vialte hi a tlamtling dih tthan lai i, Adam le Eve an sual hlan bantuk te in a um dih tthan lai.

Cun Jesuh cu zungzal in zungzal tiang uktu a si lai. Mitthli vialte a hnawh hnih lai i thihnak, intuarnak, ngaihchiatnak, ttahnak, thil tthalo le nganfahnak a um ti lai lo. A Penram cu daihnak le diknak in a uk lai i, amah cu a mi hna he zungzal in an um tti cang lai.

//Baibal tuanbia laknak: Matthew 24:14; 28:18; John 15:20, 16:33; Revelation 2:10; Matthew 13:24-30, 36-42; 1 Thessalonians 4:13-5:11; James 1:12; Matthew 22:13; Revelation 20:10, 21:1-22:21//