11. Lanhtak

Pathian nih Faro cu Israel miphun a chuahter duh hna lo ahcun minung i an fapale fater vialte, saṭil i a pa fater vialte a thihter dih hna lai kong a chimh. Cu bia a theih hnu zong ah Faro nih Pathian zumh le a bia ngaih cu a duh hlei lo.

Pathian nih amah a zum mi poh i an fater khamhnak ding lam a tuah. Chungkhar cio nih dotla tufa i kawlzalh cio ding le thah ding a si.

Pathian nih Israel miphun pawl cu tufa thisen in an innka ba thuh dih ding in le, tufa sa tu cu rawh i, thilnu cawh lo chang he ei colh ding in a chimh hna. Cuti an ei cun Izip ram chuahtak zau ding in a i timhcia awk a si kong zong a chimh hna.

Israel miphun nih Pathian i a chimh hna ning te in thil vialte an tuah dih. Cu zan zanṭim ah Pathian cu Izip ram chung vialte ah kal in, pa fater vialte a thah dih hna.

Israel miphun an innka ba vialte cu thisen aa neh dih i, Pathian nih cu inn cu a lanhtak dih hna. Cu inn chung i a um mi vialte cu an him. Annih cu tufa thisen thawng in khamh an si.

Izip miphun tu nih cun Pathian an zum lo i, a nawlpeknak bia zong an ngai duh lo. Cu ruang ah Pathian nih an inn cu a lanhtak hna lo. Pathian nih Izip mi hna an fapale fater poh cu a thah dih hna.

Thong chung i thongtla pawl an fater in Faro fater tiang Izip mi hna an fater poh cu an thi dih. Izip rammi hna tampi cu ngaihchia lungkuai in an ṭap, an hraam ruangmang.

Cu zan lila ah cun Faro nih Moses le Aaron cu a auh hna i, “Israel miphun cu au dih hna u law Izip ram in a rannak in chuak dih u!” tiah a ti hna. Anmah Izip miphun pawl hrimhrim nih Israel miphun pawl cu chuak colh ding in an nawl cang hna.

//Baibal tuanbia laknak: Exodus 11:1-12:32//