3. Buanchukcho

Kum tampi hnu ah vawleicung ah mi tampi an hung um. An sual tuk, an puarhrang tuk hringhran. Cuti an sual tuk ruang ah Pathian cu buanchukcho hmang in vawleicung vialte hrawh aa tim cang.

Nain Noah nih Pathian lung a ton. Miṭhalo vialte lak ah anih cu mi dingfel a si. Pathian nih Noah cu buanchukcho a tlunter lai kong a chimh. Noah cu sangphawlawng nganpi sa ding in a chimh.

Pathian nih Noah cu a sau meter 140, a vang meter 23, a san meter 13.5 a simi tilawng sa ding in a chimh. Noah nih cu tilawng cu thing in, dot thum in a sak ding a si i, khaan tampi, cungkhuh, le innka a ngei ding a si. Cu tilawng nih Noah le a chungkhar le saram khuah khat cio cu buanchukcho a tlun tik ah a luatter hna ding a si.

Noah nih Pathian bia a ngaih. A fapale pathum he tilawng cu Pathian chim ning te in an sak. Tilawng cu ngan tuk kaw, a saknak ah kum tampi an rau. Noah nih mi vialte hna cu, buanchukcho a tlun lai kong le Pathian lei ah i mer ding in ralrinbia a chimh ko hna nain a bia cu an zum lo.

Pathian nih Noah le a chungkhar cu anmah ca le an saram vialte ca i a za ding in rawl khon a fial hna. Zeizongte timhcia dih a si in Pathian nih Noah cu, amah le a nupi, a fapale pathum le an nupile cio—an zate minung pariat—tilawng chung i lut cang ding in a chimh.

Pathian nih saram le va phunkip in a pa pakhat le a nu pakhat cio, buanchukcho in luatter ding ah tilawng chung i lut kho ding in Noah sin ah a thlah hna. Raithawinak i hman awk ah saram phunkip chung in a pa pasarih le a nu pasarih Pathian nih a thlah hna. An zate tilawng chung i an luh dih hnu ah, amah Pathian nih innka a khar.

Cun ruahpi cu a sur thluahmah cang. Ni sawmli le zan sawmli chung, ruahpi cu cat lo in a sur! Vawlei chung in ti a hung chuak urhmarh fawn. Vawleicung i zeizong vialte, tlang sang bikbik tiang in, ti nih a khuh dih.

Tilawng chung um minung le saram hna dah tilo vawlei ro cung um zeizong vialte an thi dih. Tilawng pi cu ti cung ah a vuan i, a chung i a ummi vialte cu an him dih.

Ruah a han hnu ah tilawng cu ti cung ah thla nga chung a vuan rih i, cu chung ah ti cu reu hram aa thawk. Cun ni khhat cu tlang pakhat cung ah tilawng cu a tang. nain ti nih vawleicung khuazakip a khuh dih rih ko. cu hnu thla thum hnu ah tlang cu an par tete an hung lang.

Cu dihhnu ni sawmli hnu ah ti cu a reu cang hnga maw, ti hngalh duh ah Noah nh langak a thlah. Langak cu vawlei ro kawl in a zuang, a vakvai lengmang nain vawlei ro a hmu kho lo.

A hnu ah Noah nih va phun khat, ṭhuro, a thlah. Nain anih zong nih cun vawlei ro a hmu kho ve lo i, Noah sin ah a rak kir ṭhan. Zarh khat hnu ah ṭhuro te cu a thlah ṭhan i, a hmur in olive nge te a rak i tlunpi! Ti cu a reu chin thluahmah i, a hnu ah cun thlaikung pawl an hung um ṭhan!

Noah nih zarh khat a hngah chap hnu ah ṭhuro te cu a vawi thumnak a thlah ṭhan. Umnak hmun aa hmuh khawh cang ruang ah ṭhuro te cu a rak kir ti lo. Ti vialte a reu dih cang!

Thla hnih hnu ah Pathian nih Noah cu, “Nangmah le na chungkhar le saram vialte, tilawng chung in chuak cang u. Tefa le hrinsor tampi in ngei ulaw vawlei hi khahter u,” a ti. Cuticun Noah le a chungkhar cu tilawng chung in an chuak.

Tilawng in a chuah hnu ah Noah nih biakṭheng a ser i, raithawinak i hman khawh ding saram phun khat cio chung in saram zeimawzat in raithawinak a tuah. Pathian cu raithawinak nih a lawmhter i Noah le a chungkhar cu thlua a chuah hna.

Pathian nih aa thawh i, “Minung an sual ruang ah vawlei hi chiat ka serh bal ti lai lo, silole minung hi an ngakchiat lio te in sual ko hna hmanh sehlaw vawleicung hi buanchukcho in ka hrawk bal ti lai lo,” a ti.

Cuticun Pathian nih a biakam langhternak ah chuncha hmasa bik a rak ser. Van i chuncha a langh fatin Pathian nih a biakam a hngalh ṭhan lai i, a mi hna zong nih an hngalh ve lai.

//Baibal tuanbia laknak: Genesis 6-8//