7. Pathian Nih Jacob Cu Thlua A Chuah

Ngakchia cu an hung thang i, Rebekah nih Jacob a dawt, Isak nih Esau a dawt. Jacob cu inn um a duh i Esau cu ramvaih a duh.

Ni khat cu, Esau cu a ramvaihnak in a rak tlung i a paw a tam ngaingai. Esau nih Jacob cu a thawh i, “Zaangfah tein na rawl chuanmi tlawmpal in ka pe tuah,” tiah a hal. jacob nih, “Sile fa upa na sinak nawlngeihnak ka pe hmasa kun,” a ti. Cuticun Esau nih Jacob cu fapa upabik a sinak a pek. Cun Jacob nih rawl cu a pek.

Isak cu a tar tikah Esau cu a thluachuahnak pek a duh. Nain cuti thluachuahnak a pek hlan ah Rebekah le Jacob nih Jacob cu Esau ah canter in an hlen. Jacob nih Esau thil aa hruk i a hngawng hrawng le a ban tehna ah meheh phaw in aa tuam dih.

Isak cu fiang in khua a hmu kho lo. Jacob cu Isak sin ah a ra i, “Esau ka si, na thluachuah co awk ah ka rak ra cang hi,” a ti. Isak nih meheh phaw cu a tawngh tikah le thilpuan rim cu a hnimh tikah Esau ah a ruah i thluachuahnak a pek.

Esau nih Jacob cu a fapa upa bik sinak nawlvo a a firpiak ruang ah le a thluachuah co ding a lak kanh ruang ah a huat. An pa Isak a thih in Jacob cu thah ding ah khua a khang.

Nain Rebekah nih Esau khuakhan cu a theih ziar. Cu ruang ah Jacob cu lamhlat pi i a ummi chungkhat pawl sin um ding in a kalter.

Jacob cu cu kaa i a va um tikah, nupi pali a ngei i fapa hleihnih le fanu pakhat a ngeih hna. Pathian nih amah cu mi rum tuk hringhran ah a canter.

Kanan ram a inn in a chuahnak in kum kul hnu ah, Jacob cu a chungkhar, a sinum hna, le a satil run he a ram i kir ding ah aa thawh.

Esau nih thah a timh theo rih ding i aa ruah ruang ah a thinphang hringhran. Cu ruang ah Esau cu tlunzoh ah tiah satil run tampi a kuat. Satil run a rak hruaitu hna nih Esau cu an thawh i, “Hi satil run hna hi na sinum Jacob nih tlunzoh a'n kuatmi an si. Amah cu tlawmpal ah a rak phan lai,” an ti.

Nain Esau nih Jacob cu a rak ngaihthiam diam cang i lunglawm tein an i tong. Cuticun Jacob cu Kanan ram ah nuam tein khua a sa. A hnu ah Isak cu a thi i, Jacob le Esau nih an vui. Biatiamnak ngei in Pathian nih Abraham sin ah le cu hnu ah Isak sin ah bia kamhmi hna cu Jacob sin ah pek a si than cang.

//Baibal tuanbia laknak: Genesis 25:27-33:20//