8. Pathian Nih Joseph Le A Chungkhar A Khamh Hna

Kum tampi hnu, Jacob cu a tar cang tikah a fapa dawt Joseph cu saṭilrun a khalmi a unaurual zeidah an lawh ti va zoh ding in a kalter.

Joseph cu a pa nih a dawt bik ruang ah le anmah uktu si ding in mang a manh bal ruang ah a unaule nih an huat. A ule sin a va phak tikah an rak tlaih i sal a cawzuarmi hna sin ah an zuar.

Inn an tlun hlan ah a unaurual nih cun Joseph thilpuan cu an thlehbaoh dih i thisen chung ah an hnim. Cu thilpuan cu an pa an hmuhsak i Joseph cu sahrang nih a seh, tiah lihbia an chimh. Jacob cu a ngaihchia tuk hringhran.

Salchawlet pawl nih cun Joseph cu Izip ram ah an i kalpi. Izip ram cu Nile Tiva kam ah a ummi ram lianngan ram tthawngttha a si. Salchawletpawl nih Joseph cu cozah bawi a rum ngaimi pakhat sin ah sal ah an zuar. Joseph nih a bawipa cu ttha tein a rianh i, Pathian nih Joseph cu thlua a chuah.

A bawipa nupi nih Joseph he ihtti a duh, nain Joseph nih cuti Pathian hmai i sual ding cu a duh lo. A bawipa nupi cu a thinhung ciammam i Joseph cu a tlaihter hna i thong a thlak. Thong chung zong ah cun Joseph cu Pathian sinah zumhtlak tein a um i Pathian nih thlua a chuah.

Kum tam nawn hnu tiang, Joseph cu zei sualnak hmanh a tuah lo nain thong ah cun an thlak rih ko. Faro tiah auhmi Izip siangpahrang nih cu lio ah cun mang pahnih a manh i cu a mang nih cun a lungre a theihter ngaingai. A ruahnak petu ho hmanh nih a mang sullam cu an chim kho lo.

Pathian nih Joseph cu mang leh khawhnak a pek ruang ah Faro nih thong i a ummi Joseph cu a auhter hna. Joseph nih a mang cu a lehpiak i, a thawh i, “Pathian nih ngeih kum kum sarih a tlunter lai i, cu cu mangttam kum sarih nih a zulh lai,” a ti.

Faro cu Joseph cung ah a lung a si tuk i amah cu Izip ram ah nawlngei bik changtu sinak rian ah a chiah!

Ngeih kum kum sarih chung ah cun Joseph nih rammi hna cu rawl tampi in a khonter hna. Cun mangttam kum sarih a tlun tikah rammi hna nih an ei khim an ngeih khawh cio nak lai Joseph nih rawl cu a zuarh hna.

Mangttam cu Izip ram chung lawng ah si lo in Jacob le a chungkhar umnak Kanan ram zong ah a zualcei tuk hringhran.

Cucaah Jacob nih a fapale rual cu Izip ram i rawl cawk ah a kalter hna. Rawl cawk ding ah Joseph hmai i an chuah tikah unau rual nih cun Joseph cu ho a si an hngal lo. Joseph nih cun ho dah an si a hngalh ko hna.

An i thleng maw ti hngalh duh ah a hneksak hmasa hna hnu ah, Joseph nih a thawh hna i, “Nan nau Joseph ka si! Nan thinphang hlah u. Sal i nan rak ka zuar ah khan sualnak tuah nan rak i zuam, nain Pathian nih tthatlonak cu tthatnak tu ah a hman! Izip ram ah khua sa u law, cuticun nanmah he nan chungkhar cio he ka'n zohkhenh khawh hna lai,” a ti hna.

Unau rual cu an ram ah an tlung i Jacob cu Joseph a nun rih kong an chimh tikah aa lawm tuk hringhran.

Jacon cu a tar ngai cang nain, a chungkhar dihlak he Izip ram ah an kal i cu kaa ah cun khua an sa. Jacob cu nih a thih hlan ah a fapale vialte thluachuahnak a pek tak dih hna.

Pathian nih Abraham sin i a rak i tiamkammi biakamnak vialte cu Isak sin ah, cun jacob sin ah, cu dih in Jacob fale hleihnih le an chungkhar ah chanhchin a si. A hnu ah cun hi Jacob fale hleihnih i an hrinsor hi Israel miphun phun hleihnih ah an hun i cang.

//Baibal tuanbia laknak: Genesis 37-50//