43. Khrihfabu Aa Thawk

Jesuh vancung i a tlun hnu ah, a lamkal pawl cu Jesuh nih a fial hna bang in Jerusalem ah an um rih ko. Jesuh a zultu pawl vialte cu hmun khat te ah an i pum i thla an cam tti lengmang.

Cu lio ah cun Pentecost timi Judah puai pakhat caan a hun phan. Pentecost cu lunglawmh biachim caan a si ko. Hmun kip ram kip um Judah miphun minung vialte hi puai tuah ruah ah Jesusalem ah an rak ra dih hna.

Cuti zumtu pawl hmun khat te i an i pumh lio ah cun, lakhruak pi in thli fak pi hran thawng bantuk le inn chung a khat dih bantuk an theih. Zumtu hna lu cung zawn ah mei alh lio meizik tete bantuk an hung lang. An zate in Thiang Thlarau in khahter an si i, holh phundang in an hun holh.

Hi kong hi Jesusalem i a ummi hna nih an theih tikah, zei dah a cang hnga, tiah mibupi an rak chuak. Zumtu hna nih anmah Jerusalem khuami hna kokek holh bakte in an holh an hmuh hna tikah an khuaruahhar tuk i, Pathian riantuannak khuaruahhar cu an thangtthat.

Mi cheukhat nih cun lamkal pawl cu zu ri ah an ruah hna, nain Peter a hung tho i, “Ka bia hi ka ngaihpiak hmanh u! Hi mi hna hi zu an ri lo. Hi thilcang hi, profet Joel nih a rak chim mi, ‘Hmannung bik ni ah cun Ka Thlarua ka bungh hna,’ a rak timi a tlinnak a si.”

“Israel pa vialte hna, Nan rak hmuh le nan rak hngalh ko bang in Jesuh cu thilmak le khuaruahhar lianngan tampi a tuahmi pa a si. Amah cu vailam ah nan thah cang fom cu!”

“Nain amah cu Pathian nih a nung ah a thawhter tthan i, cu cu, ‘Na Mi Thiang Pa cu thlan chung ah na thutter lai lo,’ timi profet bia a tlinnak ah a si. Pathian nih hi Jesuh hi dahkaw a thimi sinak in a thawhter cu. Kanmah hi biahngaltu cu kan si.”

“Jesuh cu a tu ah cun Pa Pathian awrhlei ah cawisan in a um cang. Kan Pa nih a kan kamh mi Thiang Thlarau a run thlah i, cu cu atu nan hmuh le nan theih hi a si.”

“Hiti vailam i nan thah mi Jesuh hrimhrim kha Pathian nih Bawi ah le Messiah ah a canter cang, ti hi i fiang cikcik tuah u!” a ti hna.

Peter bia a thei mi hna cu an lung a cuk tuk hna i an i thawh zau i, “Ulenau hna, zei dah kan tuah awk a si lai?” tiah an hal hna.

Peter nih, “Nan sual i ngaihchih u law, nan zate in sual ngaihthiamnak ca ah Jesuh Khrih min in tipil iing u law, Thiang Thlarau laksawng nan hmuh lai,” a ti hna.

Minung 3,000 hrawng nih Peter bia cu an zumh. Tipil an ing i, Khrihfabu timi, Pathian mi hna chung ah telhchap an hung si.

Zumtu pawl cu lamkal pawl i an cawnpiaknak, i hawikomhnak, eidin ttinak le thlacam ttinak ngei in caan an hmang tti tawn hna. Hmun khat te ah an i tong tawn hna i an ngeih vialte an i hrawm dih. Pathian an thangtthat i, Khrihfa a silo mi hna nih ttha tein an cohlan ko hna.

//Baibal tuanbia laknak: Acts 2//