47. Filipi Ah Paul Le Silas

Kum zeimaw zat hnu ah, Paul le a hawipa Silas cu Filipi khua ah, Jesuh kong Thawng Tha chim ah an kal. Lydia timi nu pakhat, puanthan a zuarmi nu, he an i hmu. Cu nu cu Pathian a daw a bia mi a si.

Pathian nih Jesuh bia tliang kho lak in a thinlung innka a hun i, cuticun amah le a chungkhar cu tipil an ing. Paul le Silas cu a inn ah caam a sawm hna i, cuticun an caam.

Paul le Silas cu Filipi khua i an caam liotan ah cun thlacamnak in caan an hmang tawn. Cuti nifatin thlacamnak hmun i an kal ah cun, salnu te pakhat, khuachia nih a tlaihmi, nih zulh hna. Hmailei kong a chim kho mi si kaw, a pule hna ca ah phaisa tam ngai a hmu.

Cu nu cu, “Mah hna hi Cungnung Bik Pathian mirian pawl an si. Khamh nan si nak hnga lam an in chimh hna a si hi!” tiah thangpi in a au. Cuticu au tuk lengmang kaw, Paul cu a thinhung.

Ni khat cu, Paul cu mah nu lei cu a hoih i, a chung i khuachia cu, “Jesuh min in, mah nu chung hin atu chuak,” a ti. Cu lecangka khuachua nih a chuak colh.

Cu salnu te a ngeitu le a hmangtu pa pawl nih thilcang kong an hmuh tikah, an phaisa hmuhnak lam a um ti lai lo, an ruat i an thin a khenh tuk hna.

Cu ruang ah Paul le Silas cu an tlaih, an tuk hna i thong an thlak hna.

Paul le Silas cu a ke hreng an khenh hna i, thong chung hmun him bik ah an chiah hna. Zan ttim ah Pathian thangtthatnak hla an sa.

Laktekhat ah, vawlei aa hnin i thong innka vialte an i hung dih. Thongtla pawl an cikcin vialte a poih dih.

Thongcawngpa nih innka vialte an i hun dih a hmuh tikah, thongtla vialte an tli dih cang rua, tiah a ruah i amah le mah thah aa tim. (Thongtla pawl an tlikzam dih ahcun thah a si lai aa hngalh cia.) Paul nih a hmuh i, “Ngol zau! Nangmah le nangmah fahnak i pe hlah. Kan zate kan um dih ko hi,” a ti.

Thongcawngpa cu a thinphang tuk! Paul le Silas cu inn ah aa kalpi hna, rawl a pek hna i, an hma a ttawlpiak hna. Cun a thawh hna i, “Khamh ka sinak lai zei dah ka tuah lai?” tiah a hal hna.

Paul nih, “Bawi Jesuh Khrih zun law, cuticun nangmah he na chungkhar he khamh nan si lai,” a ti. Cun Paul nih thongcawngpa le a chungle cu tipil a pek hna i nuam ngai in caan an hmang tti hna.

A thaizing ah khuachung hruaitu pawl nih Paul le Silas cu an thlah hna i Filipi khua chuah tak ding in an ti hna. Paul le Silas nih Lydia le hawikom dangdang pawl an lenkai tak hna i, khua cu an chuah tak. Jesuh Thawng Tha cu a vak chin lengmang i, Khrihfabu zong cu a tthang chin thluahmah.

Paul le Khrihfa hruaitu pawl cu khua tampi ah kal in Jesuh thawngtha an phuang, mi an cawnpiak hna. Cun khrihfabu tam pi sin ah ca tampi an kuat hna i, Pathian Biatiam Thar kong cawnpiaknak le thazang peknak an ngei fawn. Cu cakuat pawl cu a hnu ah cun Biakam Thar ti an si.

//Baibal tuanbia laknak: Acts 16:11-40//