15. Kamh Ram

A donghnak ah Israel miphun cu Kamh Ram, Canaan, chung lut ding an si cang. Joshua nih Canaan ram i Jericho timi khua pakhat, lung vanpang chah pi in kulh mi, ah mingiatu pahnih a thlah hna. Cu khua ah cun Rahab timi hlawhhlangtu a um i, cu nih cun mingiatu hna cu a rak thuh hna i, a hnu ah a luatnak ding a rak bawmh hna. Cuti a ruah cu Pathian a zumh ruang ah a si. Mingiatu hna nih cun Rahab le a chungkhar cu Israel mi hna nih Jericho khua an hrawh te tik i an kilven te hna lai kong bia an kamh tak hna.

Kamh Ram chung lut ding cun Israel miphun cu Jordan Tiva tan a hau. Pathian nih Joshua cu, “Tlangbawi nih tan hmasa hna seh,” tiah a chimh. Tlangbawi hna an ke nih Jordan Tiva ti a tawngh lecangka ti cu a chaklei in a rung luang ti lo i, cuticun Israel miphun cu lei ro cung in khattelei ral ah an chuak kho.

Mizapi nih Jordan Tiva an tan dih in Pathian nih Joshua cu khua ṭhawngṭha Jericho tuk ding ningcang vialte a chimh dih. Mipi nih Pathian nawl an ngaih. Pathian nih a chimh hna ning te in ralkap rual le tlangbawi rual nih Jericho khua cu ni khat ah vawi khat lengmang, ni ruk chung an vel.

A ni sarihnak ni ah, Israel mi hna nih khua cu vawi sarih an vel chap. A donghnak bik an vel ah ralkap rual cu an au, tlangbawi pawl nih an muko an tum.

Cun Jericho khua kulhnak vanpang vialte cu a cim dih! Pathian nih a fial hna bang in Israel mi hna nih khua chung i zeizong te an hrawhhmal dih. Israel lei i a ṭang mi Rahab le a chungkhar lawng an zuah hna. Israel mi hna nih Jericho khua an hrawh dih kong cu Canaan ram um miphun dangdang nih an theih tikah Israel mi hna nih an tuk ve hna ding an ṭih tuk.

Canaan ram chung um zeibantuk mi he hmenh remnak tuah lo ding in Israel mi hna cu Pathian nih a chimh hna. Nain Canaan mi hna lak in Gibeon phun nih Joshua cu an hlen ziar i, annih cu Canaan ram in lamhlat pi i a ummi miphun si in an i chim. Joshua cu anmah he remdaihnak ngei ding in an nawl. Joshua le Israel mi hna nih Gibeon miphun cu khoika mi dah an si kong Pathian an hal hmasa ta lo. Cuticun Joshua nih anmah he remdaih hnatlaknak cu a ser.

Gibeon miphun nih an kan hlen ziar, ti an hngalh tik ah Israel mi hna cu an thinhung, nain Pathian hmai bia an i kam cang mi a si ruang ah remdaih hnatlaknak an tuah cang mi cu an hmunhter ko. A hnu ah, Canaan ram chung um miphun dang pakhat, Amor mi hna, miphun dang pawl nih Israel miphun he Gibeon miphun nih remdaihnak an ser an theih tikah, an raldo pawl he an pok ciammam i Gibeon pawl cu an tuk hna. Gibeon miphun nih Joshua cu ral nih an tuk hna kong thawng an thanh i bawmh an hal.

Joshua cu hlen a si aa hngalh tikah a thinhung, nain Israel raldo pawl cu a khawmh hna i Gibeon miphun pawl tuk ding ah zankhuadei an kal. Zingka te ah an ral Kanan miphun pawl cu lakhruak pi in an nam an tuk hna.

Pathian nih Kanan miphun cu buai dih lak in a tuah hna. Cu ni ah Pathian nih Israel pawl cu ral a dohpiak hna, rial mangtarara a tlakter ciammam i Kanan miphun cu tam tuk an thi.

Pathian nih van ah ni cu kal lo in a dirter i Israel miphun nih Kanan miphun cu an tei khawh cikcek hna. Cu ni ah cun Pathian nih Israel cu teinak lianngan a ngeihter hna.

Cuti ral an tei hnu ah, Kanan miphun a tang rihmi pawl an i khawm i Israel cu an tuk. Joshua le Israel miphun nih an doh hna i an hrawh dih hna.

Cu raltuknak a dih in, Pathian nih Israel miphun phun khat cio cu Kamh Ram chung i an co ding ram a pek cio hna. Cun Pathian nih Isarel cu an ramri vialte ah daihnak a pek hna.

Joshua cu tar a hung si tikah Israel miphun vialte cu hmun khat ah a pumh hna. Pathian nih Sinai Tlang ah Israel miphun sin i biatiam a rak ngeihmi kong vialte a thar in a chimhrelh dih hna. Mi vialte nih Pathian sinah zumh awktlak si peng ding le a nawlbia zul ding in bia an i kam.

//Baibal tuanbia laknak: Joshua 1-24//