40. Jesuh Cu Vailam Ah An Thah

Cun Jesuh cu vailam cung i thah awk ah, a vailamtung cu amah lila an putter i an kalpi.

Hmun pakhat “Luruh” timi an phanh in a kut le a ke in vailam ah an khenhchih. Nain Jesuh nih aa thawh i, “Ka Pa, ngaithiam hna, zei kan tuah ti an hngal lo hi,” a ti. Pilate nih Jesuh lu cung zawn ah, “Judah mi hna Siangpahrang,” tiah ca a tarter hna.

Ralkap pawl cu Jesuh thilpuan co ruah ah camcawhfung an zuk. Cuti an tuah cu, profet bia a rak um cang mi, “Ka puan cu an i cheu i, ka thilpuan cu co ruah ah camcawhfung an i kah hna,” ti a hung tlinnak ah a si.

Jesuh cu mifir pahnih hna kar vailam ah an tah. Pakhat nih cun Jesuh cu zawmhtaih ngai in a nihsawh, nain a dang pakhat nih, “Pathian na ttih lo ma? Kannih cu a sualmi kan si, hi pa hi cu sualnakngeilo a si. Jesuh, na penram ah kei hi rak ka philh hlah,” a ti. Jesuh nih cu pa cu a thawh i, “Nihin ah, nangmah cu keimah he Paradise ah na um lai,” a ti.

Mibupi le Judah hruaitu hna nih Jesuh cu an cawhdeh i, “Pathian Fapa na si ahcun, vailam khan rung ttum law nangmah le nangmah i khamh ngat! Cunpei kan in zumh lai cu,” an ti.

Cu lio caan cu chun laicer a si ko, nain cuka ram vialte cu muihnak nih a zelh dih. Chun in zanlei suimilam 3 tiang khua cu a mui.

Cun Jesuh cu aw thang pi in, “Aa lim cang! Ka Pa, ka thlarau na kut chung ah ka chanh cang,” tiah a au. Cun a lu a khun i a thlarau cu a thlah. Cuti a thih tikah li aa hnin i, Biakinn chung i mibupi umnak le Pathian umnak tthennak i zarmi danzar ngapi cu a lu lei in a tanglei tiang aa thler i cheu hnih ah aa chuah.

A thihnak thawng in Jesuh nih mi vialte ca ah Pathian sin kalnak lam a hun. Jesuh a cawngtu ralka pakhat nih thil a cangmi vialte a hmuh tikah, aa thawh i, “A taktak ahcun, hi pa hi sualnak ngei lo a si ko,. Pathian Fapa a si hrimhrim ko lai,” a ti.

Cun Joseph le Nicodemus, Jesuh cu Messiah a si tiah a zummi Judah hruaitu pahnih, nih Pilate cu Jesuh ruak an hal. A ruak cu puan in an zual i, lungpi an kermi thlan ah an vui. A luhnak innka cu lungpher nganpi an hrilhhnawh i an khar.

//Baibal tuanbia laknak: Matthew 27:27-61; Mark 15:16-47; Luke 23:26-56; John 19:17-42//