20. Sal Ah Tlaih Le Kir

Israel ram le Judah ram cu an pahnih in Pathian sin ah an sual. Sinai Tlang ah Pathian nih a pekmi hna Nawlbia an buar. An sualnak an i ngaihchih i Amah an biak tthan ding in Pathian nih A profet a thlah hna, nain an ngai duh lo.

Cu ruang ah Pathian nih an ram hnih cung ah rawhnak tlunter a sianh. Israel cu a tthawng ngaimi le a sualhrang ngaimi Assyrian ram nih an hrawh. Assyrian pawl nih Israel miphun tam tuk an thah hna leng ah an ngeihchiah thil mansuang vialte an i lak dih i, khua le ram vialte cu an khanghpiak dih hna.

Assyrian miphun nih Israel miphun an hruaitu pawl vialte le, mi rum mi ngei pawl, thiamnak a ngeimi vialte cu an tlaih hna i Assyria ram ah an kalpi dih hna. Israel ram ah cun Assyrian pawl nih an thah lomi, santlailo mi sifak hringhran pawl tete lawng an tang.

Cun Assyrian pawl nih Israel ram ah cun ramdang mi pawl an ratpi hna i i an umter hna. Cu ramdangmi hna nih cun a rawkmi khua pawl vu an hun remhser tthan hna, cu kaa i Israel miphun pawl cu an tthit an vaat hna. Cu hna i an hrinsor cu a hnu ah Samariami ti an hung si.

Israel miphun nih Pathian an zumh lo ruang le a nawl an ngaih lo ruang ah cu bantuk dantatnak an tuar cu Judah miphun nih an hmuh ko. Nain anmah Judah miphun lila ve zong cu siasal milem le Kanan miphun pathiam an bia ttheo rih ko. Pathian nih an sin ah chimhringtu profet a thlah ko hna, nain an ngai duh hlei lo.

Assyrian miphun nih Israel penram an hrawh hnu kum 100 hrawng ah, Judah ram dotu ding ah Pathian nih Babylon ram siangpahrang Nebuchadnezzar a thlah. Babylon cu a tthawng tukmi penram kau pi a si. A donghnak ah cun Judah cu Nebuchadnezzar kut tang ah a tla i, Nebuchadnezzar sin ah kum fatin te ngunkhuai tam tuk a pek lengmang.

Nain a rauh hlan ah Judah miphun nih Babylon miphun cu an doh hna. Cu ruang ah Babylon miphun pawl cu Judah ram doh ah an i thawh ve. Jerusalem khua an lak, Biakinn an hrawh, suingun chawva vialte an i lak dih.

Ral a thomi Judah hremnak ah tiah Nebuchadnezzar raldo pawl nih Judah siangpahrang fapa rual cu an pa hmaika ah an thah hna i, amah siangpahrang pa zong mitcaw ah an canter. Cu hnu ah siangpahrangpa cu Babylon ram thong chung i thi te ding in an i kalpi.

Nebuchadnezzar le a ralkap nih lothlo mi sifak pawl chimlo Judah miphun vialte cu Babylon ah sal ah an kalpi dih hna. Cu cu miphun pi in sal i tlaih le hruaih ti a si.

An sual dantatnak ah cuticun sak ah tlaih le hruaih tong ko hna hmenhsehlaw Pathian nih A mi le A biakam cu a philh hna lo. Pathian nih A mi cu a zohkhenh ko hna i profet hna hmang in an sin ah bia A chim ko. Kum sawmsarih hnu ah Kamh Ram ah an kir tthan te lai, tiah bia a kamh hna.

Kum sawmsarih hrawng hnu ah Persia siangpahrang Cyrus nih Babylon cu a hun tei. Persia pawl cu an tthawng ngai ko nain velngeihnak a ngeimi miphun an si. Israel miphun cu, cu kaa ah cun Jews tiah auh an si i, mi tampi cu an chan chung Babylon ram lawng i a ummi an si. Khuakhua in a upa ngai cangmi tar, mi tlawmte lawng nih Judah ram kong cu an cinken rih.

Cyrus a hun bawi tlawmpal ah, tuanbia ah a um ballo mi thil a hun tuah. Judah ram i kir a duh mi Judah mi cu kir khawh a si, tiah awdar a chuah. Biakinn remhsaknak ding ah tangka hmenh a pek hna. Ramdang ah sal i kum sawmsarih an um hnu ah, Judah mi tlawmte cu Jerusalem ah an kir.

An ram cu an phan i, Biakinn le Jerusalem khua kulhnak vanpang cu an remh an sak tthan. Miphun dang nih an um ko hna nain Kamh Ram ah an um kho tthan i, Biakinn ah Pathian an bia kho.

//Baibal tuanbia laknak: 2 Kings 17; 24-25; 2 Chronicles 36; Ezra 1-10; Nehemiah 1-13//