12. Luatchuahnak

Israel miphun pawl cu Izip ram in an chuak kho i, an i lawm tuk hringhran. Sal an si ti lo i, Kamh Ram ah a kal ding an si cang! Israel miphun hna nih an hal mi hna poh, sui le ngun le thil mansung phunphun, Izip miphun nih an pek hna. Ram dang miphun dang minung cheukhat nih Pathian an zumh ve i, Israel miphun Izip ram in an chuah ah an sin ah an kal ve.

Pathian nih Israel miphun pawl cu chun ah minmeitom tung sang pi in, cu cu zan ah meiceu tung sang pi ah i cang in, lam a hruai hna. An kalnak poh ah Pathian nih a umpi hna, lam a hruai hna. An tuah ding cu zulh lawng a si ko.

Tlawmpal hnu ah Faro le a mi hna cu an lung aa dang ṭhan i Israel miphun cu an sal ah canter an duh ṭhan hna. Pathian nih cuti Faro lung a hahter cu, mi nih Pathian Dik a si, ti an hmuh khawh nak ding le, Yahweh cu Faro le a pathian hna nakin a ṭhawn deuh cikcek kong an hngalhfiannak ding ah a si.

Cuticun Faro le a ralkap rual nih Israel miphun pawl cu an sal siter ṭhan ding in an dawi hna. Israel miphun nih Izip ralkap i an dawi hna cu an hmuh tikah Faro ralkap le Rili Sen kar ah an i tartahak an hmuh. An thinphang tuk i, “Zei ruang ko ah dah Izip ram kan rak chuahtak? Kan thi dih cang lai hi!” tiah an au.

Moses nih Israel mi hna cu a thawh hna i,“Phang hlah u! Pathian nih nihin ah ral a'n dohpiak hna lai i a'n khawmh ko hna lai,” a ti hna. Pathian nih Moses cu a thawh i, “Mi cu Rili Sen lei ah kal chin thluahmah ding in chim hna,” a ti.

Cu ah cun Pathian nih minmeitom tungpi cu Israel miphun le Izip miphun lakkar ah aa ṭhial i Izip miphun nih Israel miphun cu an hmu kho hna lo.

Pathian nih Moses cu rililei hoih in a kut a hlerter, cun, rili pi ti cu aa cheu lai kong a chimh. Cuticun Pathian nih thli a hranter ciammam i, rili ti cu keh le awrh ah a nam i, rili chung ah cun lam aa ser.

Israel miphun cu rili chung lei ro cung in le an sir veve i ti vanpang pi kar in an kal nguahmah.

Cu ah cun Pathian nih minmeitom cu kalnak lam in a lak i, Izip miphun nih Israel miphun pawl an zam lio cu an hmuh khawh hna. Izip miphun nih Israel miphun cu dawi an timh colh hna.

Cucaah rili chung lam cun Israel miphun cu an dawi hna, nain Pathian nih Izip miphun cu i tuai hmerhmur in a tuah hna i an rangleng vialte an i sawhkalh dih. An i thawh i, “Tli u! Pathian nih Israel miphun ral a dohpiak hna hi!” tiah an au lulhmalh.

Israel miphun cu an zate him tein rili khattelei ral an chuah dih tikah Pathian nih Moses cu a kut hler a fial ṭhan. Cuti a kut a hler tikah ti nih Izip ralkap vialte cu a khuh dih hna i a hlan bantuk te in aa fon dih ṭhan. Izip ralkap cu an zate ti chung ah an thi dih hirhiar.

Israel miphun nih Izip miphun an thih an hmuh tikah Pathian cu an i bochan i Moses zong cu Pathian profet a si tiah an zumh.

Israel miphun cu Pathian nih thihnak in le salsinak in a khamh hna ruang ah thanuamnak le lawmhnak in an khat! Atu cu Pathian rian ṭuan kho ding in an luat cang. Israel miphun cu an luatnak thar lawm in le Pathian nih Izip ralkap hna kut in a khamhnak hna thangṭhat in hla tampi an sa.

Pathian nih Israel miphun cu Izip miphun a teipiaknak hna le salsinak in a luatter hna philhlonak ah kum fatin te Lanhtak Puai tuah ding ah nawlbia a pek hna. Dotla tufa an thah, a sa cu thilnu tello chang he an ei i, lawmhnak puai cu an tuah.

//Baibal tuanbia laknak: Exodus 12:33-15:21//