14. Ramkaro Lak Ah An Vakvai

Israel miphun cu Pathian nih an sin i a biatiam chung in zulh awk phung pawl a chim dih hna hnu ah, Sinai Tlang in an chuak. Canaan ti zong in auh mi Kamh Ram ah Pathian nih a hruai hna. Canaan lei ah cun minmeitom tung pi nih lam hmai a sak hna i, cu cu an zul.

Pathian nih Abraham le Isaac le Jacob cu an hrinsor hna sin i Kamh Ram a pek te hna lai kong bia a rak kamh hna, nain cuka ram ah cun minung phun tampi an rak um cia cang. Cu hna cu Canaan miphun ti an si. Cu Canaan miphun hna cu Pathian a bia lo mi le a nawl a ngai lo mi an si. Pathian deu a bia mi an si i sualnak phunphun an tuah.

Pathian nih Israel miphun cu a thawh hna i, “Kamh Ram chung um Canaan miphun vialte nan thah dih hna lai. Anmah he daihnak nan ser lai lo i nan ṭhi nan va fawn hna lai lo. An milem vialte zong nan hrawh dih hna lai. Ka bia nan ngaih lo ahcun keimah biak lo in an milum tu nan biak sual hna lai," a ti hna.

Israel miphun cu Canaan ramri an phak tikah Moses nih Israel miphun phun hleihnih chung in pa pakhat cio a thim hna. Cu hleihnih hna cu ram chung ah va luh i zeidah a lawh ti va ngia ding in bia a chimh hna. Canaan miphun cu an thazang a ṭhawng maw a der dah, ti zong va ngia ding an si.

Pa hleihnih rual cu Canaan ram chung vialte ni sawmli chung an vah dih hnu ah an rak tlung. Mizapi cu an thawh hna i, “Ram cu a ṭha tuk hringhran i thlairawl zong a voi a ṭha ngai ko!" an ti. Nain mingiatu pahra nih, "An khua cu an fek tuk i a chung minung zong an ngan tuk! Kan doh hna ahcun an kan tei hrimhrim ko lai i, an kan thah dih ko lai!” an ti.

Mingiatu dang pahnih, Caleb le Joshua, nih an i thawh zau i, “Canaan rammi hna cu an sang an ṭhawng ti cu a dik ko, nain kan tei khawh hrimhrim ko hna lai. Pathian nih pei ral cu a kan dohpiak ko lai cu!” an hun ti.

Nain mizapi nih Caleb le Joshua bia cu an ngai duh lo. Moses le Aaron cung ah an thinhung ciammam i, an thawh hna i, “A zei ruang ah dah mahhi ram celngel ah hin nan kan ratpi? Raltuknak i thih dih le kan nupile le kan fale vialte sal i tlaih dih nakcun Izip ram ah pei kan rak um awk a si ko cu,” an ti. Mipi nih cun Izip ram i a kirpitu hna ding hruaitu pakhat thim an duh.

Pathian cu a thinghung tuk hringhran i Tonnak Thlam ah a ra. A thawh hna i, “Ka bia ngai duh lo in nan ka doh ruang ah mi vialte thetse ramkaro lak ah an vakvai lai. Joshua le Caleb dah tilo, kum kul ri in a cunglei poh cu cuka ramkaro ah an thi lai i, Kamh Ram cu an phan bal lai lo,” a ti hna.

Cu bia an theih in mipi cu an sualnak kong ah an i ngaihchih tuk. An hriamnam an i lak i Canaan ram tu ding in an i thawh. Pathian a umpi hna lo kong Moses nih ralrinbia a chimh ko hna nain a bia cu an ngai duh lo.

Pathian nih an raltuknak i a umkalpi hna lo ruang ah ral an sung i mi tampi thah an huah. Cun Israel miphun cu Canaan ram in an kir i these ramlak ramkaro ah kum sawmli chung an vai.

Cuti ramkaro lak i kum pi kum sawmli chung an vahvaih lio ah cun Israel mi hna cu Pathian nih a cawm hna. Vancung in, “manna” timi chang a pek hna. Cu leng ah sa an ei khawh nak ding ah nimte ruun (a hme tuk lo mi va phun khat) zong an riahbuk ciacia ah a pek fawn hna. Cu vialte chung, an thilpuan le an kedan hmenh ṭet lo tiang in Pathian nih a zohkhenh hna.

Pathian nih khuaruahhar thil a tuahpiak hna i, lungpi chung in ti a chuahter i a pek hna. Cuti a si ko bu in, Israel mipi cu Pathian le Moses cung ah an lungsi lo i an phunzai rih ko. Cu zong ah cun Pathian cu Abraham le Isaac le Jacob sin i a biakam a leet hlei lo. .

Vawi khat cu mizapi cu din awk ti an ngei ti lo. Pathian nih Moses cu a thawh i, “Lungpi kha chawn, law ti a rak chuak ko lai,” a ti. Nain Moses nih mizapi hmai ah Pathian cu zei ah a rel lo i, lungpi cu a chawnh i chawnh lo in a ṭhiangṭhunh in vawi hnih a tuk. Lungpi chung in mi vialte din awk ti cu a chuak ko, nain Pathian cu Moses cung ah a thinhung i, “Nangmah cu Kamh Ram chung ah na lut kho lai lo,” a ti.

Israel miphun cu kum pi kum sawmli chung ramkaro lak i an vahvaih hnu ah cun, Pathian a ralchanh mi vialte cu an thi dih cang. Pathian nih mizapi cu Kamh Ram rika ah a hruai ṭhan hna. Moses cu tar tuk cang kaw, Pathian nih mizapi hruaih rian bawmtu ding ah Joshua a thimpiak. Pathian nih ni khatkhat ah amah Moses bantuk profet dang a run thlah te lai kong Moses cu bia a kamh fawn.

Cun Pathian nih Moses cu Kamh Ram vialte a hmuh khawh naklai tlang pakhat par ah kai a fial. Moses nih Kamh Ram cu a hmuh khawh dih ko, nain a chung luh cu Pathian nih a sianh lo. Cun Moses cu a thi i Israel miphun nih ni sawmthum chung an ṭah. Joshua cu an hruaitu thar ah a hung cang. Joshua cu Pathian aa bochan mi le a nawl a ngai mi a si ruang ah hruaitu ṭha a si.

//Baibal tuanbia laknak: Exodus 16-17; Numbers 10-14; 20; 27; Deuteronomy 34//