35. Velngei Pa Tuanbia

Ni khat cu, Jesuh cu amah sin i a ummi hna ngunkhuaikhawl le misual tampi a cawnpiak hna.

Biaknaklei hruaitu pawl cu an tlokciar, a ruang cu Jesuh nih hi minung pawl hi hawikom ah aa serh hna. Cu ruang ah Jesuh nih tuanbia a chimh hna.

“Fapa pahnih a ngeimi pa a rak um. A ngakchia deuh pa nih a pa cu a thawh i, ‘Ka pa, ka co hnga cu atu ah hin ka duh ko hnga!’ a ti. Cuca'h a pa nih a ngeih ro cu a fale pahnih cu a cheuh hna.”

“Tlawmpal ah a hniang deuh pa nih a ngeih vialte cu a khawmh i lamhlat pi ah a kal i sual nun nuamtawlnak ah a phaisa vialte cu a va pham dih.”

“Cu lio ah cun cu kaa ram ah cun mangttam a tlung, rawl cawknak phaisa a ngei ti lo. Cu ruang ah a hmuh khawh mi rian, vok rawl pek rian, a ttuan. Hnabeidong le chungvang in a um cang i, vok rawl hmenh ei ning, ti a duh cang.”

“A donghnak ah, fapa ngakchia deuh nih cun, aa thawh i, ‘Zei dah ka tuah a tu hi? Ka pa inn i a mirian pawl kha ei awk tawrcheng an ngeih ko ttung, kei vial hi kaa ah ei awk ngeilo in ka um hi. Ka pa sin ah ka kir lai i, a mirian pakhat bantuk tal in rak ka cohlang ve ko, ka ti lai,’ a ti.”

“A fapa ngakchia deuh pa cu lam hlat pi i a um ko rih lio ah khin a lang in a hei hmuh i a zaangfak tuk. A va tli i a kuh i a hnamh.”

“A fap nih cun, ‘Ka pa, Pathian ralchanh in le nangmah ralchanh in ka sual cang. na fa si awk ka tlak ti lo. Na mirian pakhat tu si ko ning,” a ti.

“Nain a pa nih a mirian pakhat a auh zau i, ‘Khah, i hnawh tuah! Thilpuan tha bikbik rak pu law ka fapa hi hruk tuah! A kutdong ah kutdonghrolh hrolh law a ke ah keden denh tuah. Cun caw no a ttha bik pakhat in va that law rawl einak puai kan tuah lai, a ruang cu ka fapa hi a rak thi, nain atu cu a nung cang hi! A rak tlau, nain atu cu hmuh a si cang!’ a ti.”

“Cuticun puai cu an tuah. Tlawmpal ah lo in a u pa a rak tlung. Hla sak thawng le laam thawng cu a theih i, zei dah a cang hnga, tiah a khuaruahhar.”

“A naupa a rak tlun ruang ah nuamhnak puai an tuah, ti a hnu i a hun hngalh tikah, a thinhung tuk i, inn chung luh zong a duh lo. A pa a rak chuak i nuamhnak ah i tel ve ding in a sawm, nain a duh lo.”

“Aa thawh i, ‘Kum mah vialte chung zumhtlak tein na ca ah rian ka ttuan! Na ka chimh mi tuah lo i ka um zong a um ballo, nain ka hawikom rual he kan i nuamhnak hnga meheh hmete pakhat hmenh na ka pe ballo. Na ngeihchia a hlohral i sual nuamh ah aa ciah mi na fapa vialcang cu cawfa vialte lak i cawfa ttha bik na hei thah piak!’ a ti.”

“A pa nih cun a thawh i, ‘Ka fapa, nang thamtham cu ka sin ah pei na um zungzal ko cu, ka ngeih vialte cu na ngeih a si ve ko cu. Atu bantuk i lawmhnak puai kan tuah cu tuah hrimhrim awk kan si ko, a ruang cu, na nau hi a rak thi, nain atu a nung tthan cang. a rak tlau, nain atu hmuh a si cang!’ a ti.”

//Baibal tuanbia laknak: Luke 15:11-32//