30. Jesuh Nih Minung Thong Nga Rawl A Pek Hna

Jesuh nih a zultule cu thawngttha chim ding le cawnpiak ding in a thlah hna. A rak kir tikah, an va cawnpiakmi kong le an va tuahmi kong cu Jesuh an chimh. Cun Jesuh nih an zate in a auh hna i amah he a daihnak hmun khat ah zeimawcan i diin ding in a sawm hna. Cuticun lawng ah an cuang i an pok.

Nain Jesuh le a zultu cuti an pawh cu mi tampi nih an hmuh hna. Anmah hlan i khatlei kam phan hmasa ding in tilidil sir in an tli i, an chawhkanh hna. Jesuh le a zultu an phanh tikah cun mibu pi nih an rak don cang hna.

Mibu pi ah cun nu le ngakchia chimlo in pa lawng 5,000 ringlo an si. Mipi cu a zoh hna i, zaangfak tuk in a hmuh hna. Amah Jesuh mit ah cun, hi mi hna hi khaltu ngeilo tuu bantuk an si. Cuca'h a cawnpiak hna i an midamlo zong a damter hna.

Zanlei khua a hung tlai tikah, a zultu nih Jesuh cu an thawh i, “Khua a tlai pah cang i, lamnai ah khua a um fawn lo. Mi hi kalter hna law pakhatkhat ei hna ngat seh,” an ti.

Nain Jesuh nih a thawh hna i, “Nanmah nih ta ei awk cu nan pek hna!” a ti hna. Zultu hna nih cun, “Cu cu zeitin dah kan ti khawh lai? Changreu hlum nga le nga pahnih telawng pei kan ngeih ko cu,” an ti.

Jesuh nih mipi cu a sin ah a auh hna i, a phuphu tete in tthu cio ding in a chimh hna.

Cun changreu hlum nga le nga fang hnih te cu aa lak i, van lei a hoih i rawl cu thla a camh.

Jesuh nih changreu le nga cu a vun cheu hna. Cuti a cheumi tete cu mipi an phawt hna awk ah a zultu cu a pek hna. A zultu pawl nih rawl cu an pek lengmang an pek lengmang hna i, a dih kho bal lo! Mizapi nih rawl cu an ei i an khim dih fawn.

Zultu hna nih ei rih lomi rawl cu an khawmh i rel hleihnih a si. Rawl cu changreu hlum nga le nga fang hnih in a chuakmi a si.

//Baibal tuanbia: Matthew 14:13-21; Mark 6:31-44; Luke 9:10-17; John 6:5-15//