၂။ ဒုဟ်လုပ်ကၠုၚ် ပ္ဍဲလောက
အာဍာံကဵု ဗြဴညးဝွံ ပ္ဍဲကၠအ်ဥဒျာန်ကျေဝ်ဂေါဝ်ကျာ်က္တဵုဗဒှ်လဝ်ဂှ် မံၚ်ဒၟံၚ်မိပ်ပ်ဇြိပ်ပ်ရ။ ညးတံဝွံ ဂၠိက်ယာတ်ဟွံမွဲရ။ ၜိုန်ဂှ်လေဝ် ညးမွဲကဵုညးမွဲ ဟွံဂွညးသ္ကအ်ပုဟ်။ မူဟိုတ်ရောမ္ဂး ပ္ဍဲလောကဏံဂှ် ဒုဟ်ဟွံမွဲရ။ ညးတံဝွံ ဟွံလအ်ဟွံလအ် ကွာ်ဝေၚ်ပ္ဍဲကၠအ်ဥဒျာန်တုဲ ဟီုအရေဝ်ကဵုကျာ်ရ။
ဆမ္ဂး ပ္ဍဲဥဒျာန်ဂှ် ဇြုံနွံဒၟံၚ်မွဲရ။ ဇြုံဂှ် ပရိယာဂၠိုၚ်ကွေံရ။ ဇြုံသၟာန်မၞိဟ်ဗြဴဂှ် “ကျာ်ဗ္ကန်လဝ်ကဵုဗှ်ေ ဇၟာပ်ပ်သတ်ဆုနူတၞံဆု ပ္ဍဲဥဒျာန်ဏံဂှ်လ္ပစညိ၊ဂှ်ကွေံရဟာ” သၟာန်ရ။
မၞိဟ်ဗြဴဂှ် ကလေၚ်ဟီု “ကျာ်ဟီုလဝ်ကဵုပိုဲဂှ် ပဲါနူသတ်တၞံဆု(တီခိုဟ်ဟွံခိုဟ်)ဂှ်တုဲ သတ်ဆုသေဟ်ဒၟံၚ်သီုဖအိုတ်ဂှ် အခေါၚ်ဂွံစနွံဒၟံၚ်ရ။ ယဝ်ရ စသတ်ဆု(တီခိုဟ်ဟွံခိုဟ်) ဂှ်(ဟွံသေၚ်) ၜိုန်ရလုက်ဒးသတ်ဆုဂှ်မ္ဂး ဗှ်ေဒးချိုတ်ရောၚ်။”
ဇြုံကလေၚ်ဟီုကဵုမၞိဟ်ဗြဴဂှ် “ကျာ်ဟီုလဝ်ဂှ် ဟွံဍာံပုဟ် ဗှ်ေဟွံချိုတ်ပုဟ်။ ယဝ်စသတ်တုဲဂှ် ခြာဟွံလအ်ဗှ်ေတီခိုဟ်ဟွံခိုဟ်ညံၚ်ရဴကျာ်ရောၚ်ဂှ်ညးတီမံၚ်ရ။”
မၞိဟ်ဗြဴဝွံ ကူချပ်ဒၟံၚ် သတ်ဆုဏံကျေဝ်ဂေါဝ်တုဲ တုပ်ညံၚ်ကဵုရဟ်နွံဒၟံၚ်ရောၚ်။ မၞိဟ်ဗြဴဂှ်လေဝ် မိက်ဂွံဍိုက်ပေၚ်ကဵုလညာတ်ပညာ ဂှ်ဒှ်တုဲ ၜဟ်ကေတ်သတ်ဆုမ္ဂး စရ။ တုဲဂှ် ကဵုစတြုံဂှ်ကီုရ။
မွဲလစုတ်ဓဝ်၊ မတ်ညးတံ ပံက်မၠာ်တုဲ ဇကုညးတံမုလေဝ်ဟွံလတက်လဝ်ဂှ် တီကၠိုဟ်အာရ။ ညးတံလေဝ် နကဵုတၞးဆုဂှ် ဇိၚ်ကၠောန်ဂၠိက်ယာတ်တုဲ ဒစာန်ဂြောပ်ဇကုညးတံရ။
တုဲဂှ် မၞိဟ်တြုံကဵု ဗြဴညးတေံ မိၚ်ရမျှာၚ်ကျာ်ကွာ်ကၠုၚ် ပ္ဍဲဥဒျာန်ဂှ်ရ။ ညးတံသီုၜါ အောပ်ဒၟံၚ်ကျာ်ရ။ တုဲဂှ်ကျာ်ကော်မၞိဟ်တြုံဂှ် “အလဵုဗှ်ေနွံရော။” အာဍာံကလေၚ်ဟီု “မၞးကွာ်ကၠုၚ်မံၚ်ပ္ဍဲဥဒျာန်ဂှ် အဲမိၚ်ဒၟံၚ်ရ၊ အဲဖေက်ဂွဒၟံၚ်ကွေံရ၊ မူဟိုတ်ရောမ္ဂး ဇကုအဲဂှ်ဂၠိက်ယာတ်ဟွံမွဲတုဲ အဲအောပ်ဒၟံၚ်ရ။”
တုဲဂှ် ကျာ်သၟာန် “ညးဂှ်ဟီု မၞးဂၠိက်ယာတ်ဟွံမွဲရော။ သတ်ဆုအဲဟွံကဵုမၞးစဂှ် မၞးစလဝ်တုဲယျဟာ။” မၞိဟ်တြုံဂှ် ကလေၚ်ဟီု “မၞိဟ်ဗြဴက္တဵုဗဒှ်လဝ်သွက်အဲဂှ် ကဵုစ အဲသတ်ဂှ်ရ။” တုဲဂှ်ကျာ်သၟာန် ဗြဴဂှ် “မူမၞးကၠောန်လဝ်ရော။” မၞိဟ်ဗြဴဂှ် ကလေၚ်ဟီု “ဇြုံဂှ် လှေံလှန်လီလာံစအဲရ။”
ကျာ်ဟီုကဵုဇြုံဂှ် “ဗှ်ေဒးဒုၚ်ချဴလက်ရ၊ လ္တူတိဂှ် ဗှ်ေဒးလောဝ်အာကဵုဗုၚ်တုဲ ဒးစတိရောၚ်။ ဗှ်ေကဵု မၞိဟ်ဗြဴဂှ် ညးမွဲကဵုညးမွဲက္ဍုဟ်ရောၚ်။ ကောန်ဗှ်ေကဵု ကောန်မၞိဟ်ဗြဴဂှ်လေဝ် ညးမွဲကဵုညးမွဲ က္ဍုဟ်ကီုရောၚ်။ ကောန်ဇာတ်တၞောဝ်ဒတောဝ်မၞိဟ်ဗြဴဂှ် ပ္ဍဵုဗုတ်က္ဍိုပ်ဗှ်ေတုဲဗှ်ေလေဝ် ဂၞေဟ်ဇိုၚ်ညးဂှ် လိုန်ဓလေက်ရောၚ်။”
တုဲဂှ်ကျာ်ဟီုကဵုမၞိဟ်ဗြဴဂှ် “အခိၚ်ဗှ်ေၜံၚ်ကောန်တှ်ေ ဒးဂိဗွဲမလောန်ရ။ ဗှ်ေဒးဗက်အလိုက်မၞိဟ်တြုံတုဲ တြုံဂှ် အုပ်လဒံလ္တူဗှ်ေဏောၚ်။”
ကျာ်ဟီုကဵုမၞိဟ်တြုံဂှ် “မၞးကလၚ်အရေဝ်ဗြဴမၞးတုဲ အရေဝ်အဲမၞးဟွံကလၚ်ပုဟ်။သာ်ဂှ်ရ လၟုဟ် တိဇၞော်ဂှ် ဒးဒုၚ်ချဴလက်တုဲ သွက်စဏဂွံဇၞော်တိုန်ဂှ် မၞးဒးဂိုတ်ဂစာံကၠောန်ကမၠောန် ရောၚ်။ မၞးဒးချိုတ်ရောၚ်။ အခိၚ်မၞးချိုတ်တုဲဂှ် ခန္ဓမၞးလေဝ် ဒးကလေၚ်ဒှ်အာတိပၠန်ရောၚ်။” မၞိဟ်တြုံဝွံကော်ခဴစဗြဴညးတေံဂှ် “ဨဝ” ရ။ အဓိပ္ပါဲ ဨဝဝွံ “မၞိဟ်ကဵုလမျီု” မဂွံဒှ်ရ။ မုဒှ်ရောဟီုတှ်ေ မၞိဟ်ဗြဴဂှ် ဒှ်ကၠုၚ် မိ မၞိဟ်သီုဖအိုတ်ရောၚ်။ အာဍာံကဵုဨဝဂှ် ကျာ်ဂြောပ်ကဵုဂၠိက်ယာတ်သၞာံသတ္တိရစ္ဆာန်ရ။
တုဲဂှ် ကျာ်ဟီု “လၟုဟ် မၞိဟ်တံတုပ်ကၠုၚ်ဗီုပိုဲတံတုဲ တီခိုဟ်ဟွံခိုဟ်ကီုရ၊ ဂွံစသတ်ဆု နူတၞံဆုလမျီု ဂွံဂျိုၚ်လမျီုထာဝရဂှ်လေဝ် မၞိဟ်တံအခေါၚ်ဟွံမွဲရ။” သာ်ဂှ်ရ ကျာ် ပလံၚ်ပတိတ် အာဍာံကဵုဨဝ နူကဵုဥဒျာန်ဂှ်ရ။ ပ္ဍဲဥဒျာန် မၞိဟ်မွဲမွဲ ညံၚ်ဟွံဂွံစ သတ်ဆုလမျီုဂှ် ကျာ်ထာဝရဝွံ ပ္ဍဲပါၚ်လုပ်ဥဒျာန်ဂှ် စွံလဝ်ကလုတ်ကာသနွံကဵုဣဓိမွဲတုဲ ကဵုမၚ်မွဲလဝ်ရ။
ပုံသၠပတ်သမ္မာ : သၠပတ်ပထမကဝ် ၃