၁၂။ ပွမဗၠးတိတ်
မၞိဟ်ဣသရေလတံဝွံ ဂွံတိတ်အာနူဍုၚ်အာဲဂုတ္တုဂှ် မိပ်သၠောၚ်ကွေံရ။ ညးတံဝွံ ဍိက်ဟွံသေၚ်ရ။ ညးတံဂွံအာဒၞာဲတိဂတိဂှ်ရ!။ မၞိဟ်ဣသရေလတံ အာတ်လဝ်ထဝ်၊သြန်ကဵုအရာၚုဟ်မးနွံဂှ် ကောန်ဍုၚ်အာဲဂုတ္တုတံ ကဵုဖအိုတ်ရ။ ဂကူတၞဟ်လ္ၚဵုတံလေဝ် ပ္တေဟ်ကၠုၚ်ကျာ်တုဲ နူဍုၚ်အာဲဂုတ္တုဂှ် တိတ်ကၠုၚ်ကရောံမၞိဟ်ဣသရေလတံကီုရ။
အခိၚ်တ္ၚဲမ္ဂး နကဵုတိုၚ်မတ်ဗြဲသၠုၚ်သၠုၚ်မွဲဂှ် ကျာ်ထ္ၜးကဵုဂၠံၚ်ညးတံရ။ အခိၚ်ဗ္တံမ္ဂး ဗီုတိုၚ်ပၟတ်မွဲဂှ် ကျာ်ထ္ၜးဂၠံၚ်ရ။ ကျာ်ဝွံ ဒှ်ဒၟံၚ်နကဵုတိုၚ်မတ်ဗြဲကဵုတိုၚ်ပၟတ်တုဲ နွံဒၟံၚ်ကရောံညးတံလၟိုန်ရ။ ညးဝွံ ဂွံအာကၠုၚ်ဂှ် ကျာ်ထ္ၜးကဵုဂၠံၚ်တုဲ အတိုၚ်ညးထ္ၜးဂၠံၚ်ဂှ် မၞိဟ်သီုဖအိုတ်လေဝ် ဗက်အာရ။
လောန်အာမွဲချိုန်ခဏတုဲ ဨကရာတ်ဖာရောဝ်ကဵုမၞိဟ်ညးတံလေဝ်စိုတ်ပြံၚ်လှာဲအိုတ်ရ။ ညးတံဝွံ မၞိဟ်ဣသရေလတံဂွံကဵုကလေၚ်သ္ပဍိက်ညးတံပၠန်ဂှ်ပၟိက်နွံရ။ သာ်ဂှ်ရ ညးတံဒဍေၚ်ဗက်လက်ကြဴ မၞိဟ်ဣသရေလတံပၠန်ရ။ အရာဏံဂှ် ကျာ်ပြံၚ်လှာဲလဝ်စိုတ် ဨကရာတ်ဖာရောဝ်ရ။ မူဟိုတ်ရောမ္ဂး ကျာ်ထာဝရဝွံဇြဟတ်ဇၞော်လောန်နူကဵု ဨကရာတ်ဖာရောဝ်ကဵု ကျာ်အာဲဂုတ္တုသီုဖအိုတ်ရောၚ်ဂှ်ကဵုဇၟာပ်မၞိဟ်တံဂွံတီညးရ။
ကောန်ပၞာန်အာဲဂုတ္တုတံ ဗက်ကၠုၚ်ဒၟံၚ်လက်ကြဴဂှ် မၞိဟ်ဣသရေလတံညာတ်တုဲ ဒးဒၟံၚ်ဒၞက် ပ္ဍဲအကြာကောန်ပၞာန်ဨကရာတ်ဖာရောဝ်ကဵု ၜဳဗ္ကေတ်ဂှ် ညးတံတီအာရ။ ညးတံဝွံ ဖေက်လောန်တုဲ “မူဟိုတ်ကော်ပ္တိတ်ပိုဲတံ နူဍုၚ်အာဲဂုတ္တုဂှ်ရော?၊ ပိုဲတံဒးချိုတ်ဒၞာဲဏံရဟာ!” ဟီုဂး လရိုအ်ယာံအိုတ်ရ။
မဝ်သေဟီုကဵုမၞိဟ်ဣသရေလတံ “လ္ပဖေက်အိုတ်ညိ! ၊တ္ၚဲဏံကျာ်ဗ္တိုက်ကဵုသွက်မၞးတံတုဲ ဟံၚ်ပြာ်ကဵုမၞးတံရောၚ်။” တုဲဂှ် ဂွံဟီုကဵုမၞိဟ်တံ ဆုဲအာလ္ပာ်ၜဳဗ္ကေတ်ဂှ် ကျာ်ဟီုကဵုမဝ်သေရ။
တုဲပၠန် တိုၚ်မတ်ဗြဲဂှ် ကျာ်ဆုဲစွံလဝ်အကြာမၞိဟ်ဣသရေလကဵုမၞိဟ်အာဲဂုတ္တုတံဂှ်ရ။ သာ်ဂှ်ရ မၞိဟ်အာဲဂုတ္တုတံဝွံ ဟွံဆဵု မၞိဟ်ဣသရေလတံရ။
ကျာ်ဟီုကဵုမဝ်သေ ဗ္စူတဲလ္တူၜဳဂှ်ရ။ ဍာ်နွံပ္ဍဲၜဳဂှ်လေဝ် ကျာ်ကဵုထကး လ္ပာ်ပုၚ်ကဵုလ္ပာ်ပါဲ ၜါကရေက်ရ။ ဟိုတ်ဂှ်ရ ပ္ဍဲၜဳဂှ် ဂၠံၚ်မွဲတၞုၚ် မံက်ကၠုၚ်ရ။
မၞိဟ်ဣသရေလတံလေဝ် ဒၞာဲတိသ္ကဟ် အကြာကၟာၚ်ဍာ်ၜါလ္ပာ်ဂှ် ကွာ်တတ်ရ။
တုဲဂှ် ကျာ်သီတိုၚ်မတ်ဗြဲမ္ဂး ကောန်ဍုၚ်အာဲဂုတ္တုတံလေဝ် မၞိဟ်ဣသရေတံဗၠးတိတ်အာဂှ် ဆဵုညာတ်ရ။ သာ်ဂှ်ရ ကောန်ဍုၚ်အာဲဂုတ္တုတံလေဝ် ဂွံဆက်ဗက်လက်ကြဴညးတံဂှ် ဖျေံသ္ဂုတ်သွာတ်ရ။
သာ်ဂှ်ရ ကောန်ပၞာန်ဖာရောဝ်တံဝွံ ဗက်ကၠုၚ်လက်ကြဴမၞိဟ်ဣသရေလပ္ဍဲဂၠံၚ်ဍာ်ၜဳဂှ် ရ။ ဆမ္ဂး ကျာ်ကဵု လကိုတ်ကောန်ဍုၚ်အာဲဂုတ္တုတံတုဲ ကွဳစက္ကရတ်ညးတံလေဝ်ကဵုလီုလာ်ရ။ အခိၚ်ဂှ် မၞိဟ်ဣသရေလတံ “ဂြိပ်၊ ဂြိပ်! ကျာ်ဗတိုက်ဒၟံၚ်ကဵုသွက်မၞိဟ်ဣသရေလတံဏောၚ်”ကရေဲဟီုအိုတ်ရ။
မၞိဟ်ဣသရေလသီုဖအိုတ်တံစိုပ်အာသြၚ်ၜဳလ္ပာ်တေံတုဲဂှ် ကျာ်ကဵုမဝ်သေ ဂွံဗ္စူတဲလ္တူဍာ်ၜဳမွဲဝါပၠန်ရ။ မဝ်သေဝွံ ဗ္စူတဲလ္တူဍာ်ၜဳမ္ဂး ဍာ်လေဝ်ကလေၚ်စှ်ေဗီုတြေံပၠန်တုဲ ကောန်ပၞာန်အာဲဂုတ္တုသီုဖအိုတ်တံလေဝ် ဗၠိုတ်ဍာ်တုဲချိုတ်အိုတ်ရ။
မၞိဟ်ဣသရေလတံဝွံ ကောန်ဍုၚ်အာဲဂုတ္တုချိုတ်ဒၟံၚ်ဂှ်ညာတ်တုဲပ္တေဟ်ကၠုၚ်ကျာ်ရ။မဝ်သေဝွံ ဒှ်ဒၟံၚ်ပရောဗက်ကျာ်ဂှ် ညးတံပ္တေဟ်ကၠုၚ်ရ။
မၞိဟ်ဣသရေလတံလေဝ် ဟိုတ်နူကျာ်ဟံၚ်ပြံာ်လဝ်နူဘဝဍိက်ကဵုဘဲချိုတ်တုဲ ညးတံမိပ်သၠောၚ်ဒၟံၚ်ရ။ လၟုဟ်ဝွံ ဂွံသ္ပဝတ်ကျာ် ၊ဂွံကလၚ်အရေဝ်ကျာ်ဂှ် ညးတံဂွံအခေါၚ်ရ။ မၞိဟ်ဣသရေလတံဝွံ ဂွံပေါဲအံၚ်ဇၞး ဗၠးၜးကၠုၚ်ကၠာအိုတ်တုဲ သွက်ဂွံထိုၚ်သးဂုန်ကျာ်ဂှ် ဒယှ်ေဒွက်ဗွဲမဂၠိုၚ်ရ။ မူဟိုတ်ရောမ္ဂး ကျာ်ဟံၚ်ပြာ်ကဵုညးတံ နူကဵုကောန်ပၞာန်အာဲဂုတ္တုတံဂှ်ရ၊
ကျာ်ဝွံ "မၞိဟ်ဣသရေလတံ ဗၠးတိတ်ကၠုၚ်နူကဵုဘဝဍိက်ကဵု နူတဲ ကောန်ပၞာန်အာဂုတ္တု ဂှ် စၟတ်သမ္တီတုဲ ကၠောန်ပေဲါသဘၚ် လၟေၚ်လၟေၚ်သၞာံရ။ ပေဲါသဘၚ်ဏံဂှ် ကော်ခဴ 'ပေဲါပသခါ' မဒှ်ရ။ သွက်ဂွံကၠောန်ပေါဲသဘၚ်ဂှ် ဒးဂစိုတ် သဵုကြောံကြောံမွဲတုဲ ကရာၚ်ဖျုန်သဵုဂှ်ရ။ ဖျုန်သဵုကရာၚ်လဝ်ဂှ် ဒးစကဵုကွာၚ်ဟွံမွဲကဵုကွဲတံရောၚ်" ဗ္ကန်လဝ်ရ။
ပုံသၠပတ်သမ္မာ : သၠပတ်ဗၠးတိတ် ၁၂း၃၃-၁၅း၂၁