၂၆။ ယေသှုစကၠောန်သာသနာ
ယေသှုဝွံ စာတန်လှေံလှန်တုဲ ကလေၚ်စဴကၠုၚ် ပ္ဍဲရးဂါလိလဲရ။ ဝိညာန်မသ္အးဇ္ၚးဝွံ ကဵုဍိုက်ပေၚ်လ္တူယေသှုတုဲ အာစိုပ်အလုံမွဲရးမ္ဂး ဒလောံဗ္တောန်ကဵုမၞိဟ်တံရ။ ဇၟာပ်ပ်မၞိဟ်တံလေဝ် လဴထ္ၜးပရိုၚ်ယေသှုခိုဟ်ရ။
ယေသှုဝွံ က္ညအာဍုၚ်နာဇရက်၊ဇာတိညးဂှ်ရ။ ပ္ဍဲတ္ၚဲသဳဂှ်၊ ယေသှုလုပ်အာ ဇြပ်လ္ၚောဝ်ကျာ်ရ။ က္ဍိုပ်သ္ကိုပ်ဘာသာတံဝွံ လိက်'ပရောဗက်ဟေသှာယျ'မွဲသၟူဂှ် ဒုၚ်ကဵုညးတုဲ ကဵုဗှ်ရ။ သာ်ဂှ်ရ ယေသှုပၠးလိက်ဂှ်တုဲ ဗှ်ထ္ၜးကဵုမၞိဟ်တံမွဲပိုဒ်ရ။
ယေသှုဗှ် “ ဝိညာန်မသ္အးဇ္ၚးကျာ်ဂှ် နွံဒၟံၚ်ပ္ဍဲအဲရ၊ သာ်ဂှ်ရ ဂွံလဴထ္ၜးကဵုမၞိဟ်ဝါတ်ဒိုက်တံပရူခိုဟ်မာန်ကီု၊ ညးမဒုၚ်ပၠုပ်ဒၟံၚ်ထံၚ်တံ ဂွံဗၠးၜးမာန်ကီု၊ ညးမတ်မကၠက်တံ ဂွံကၠေၚ်ညာတ်မာန်ကီု၊ ညးဒးဒုၚ်ပျဲတံ ဂွံမိၚ်ပရိုၚ်ခိုဟ်မာန်ကီုဂှ် အဲကၠုၚ်လဴထ္ၜးကဵုပရိုၚ်မ္ၚဵုမၚ်္ဂလကျာ်ရ။
ဟီုသာ်ဂှ်တုဲ ယေသှုဂဇအ်စှ်ေမ္ဂး ဇၟာပ်မၞိဟ်တံ စောဝ်ဒၟံၚ်ချိုတ်တ်ပၠိုတ်တ်ရ။ ပ္ဍဲသၠပတ်ယေသှုဗှ်လဝ်ဂှ် ထမံက်ထ္ၜးဒၟံၚ်တၠညးဟံၚ်ပြာ်ဟေၚ်ဂှ် ညးတံတီဒၟံၚ်ရ။ ယေသှုဝွံ “ ပရူအဲဗှ်ထ္ၜးလဝ်ဂှ် လၟုဟ်ဒှ်ကၠုၚ်ယျ” ဟီုရ။ မၞိဟ်ဂမၠိုၚ်တံလေဝ် “ ညးဂှ် ကောန်ယဝ်သာတ်ဟွံသေၚ်ဟာ” ဟီုဂးညးသ္ကအ်တုဲ အံသဝ်အိုတ်ရ။
ယေသှုလေဝ်“ ဍာံရ၊ ပရောဗက်တံဝွံ ဒၞာဲညးတံဒၟံၚ်ဂှ် ဟွံဂွံမုက်ရ။တေံခေတ်ပရောဗက်ဨလိယပ္ဍဲဍုၚ်ဣသရေလဂှ် ဗြဴကၟာဲနွံဗွဲမဂၠိုၚ်ရ။ ပွိုၚ်ပိသၞာံဘာ် ဍာ်မဇတ်သ္ကဟ်ဒၟံၚ်ရ။ ဨလိယဝွံ ဟွံရီုဗၚ်ဗြဴကၟာဲပ္ဍဲဍုၚ်ဣသရေလဂှ်တုဲ အတိုၚ်ပၟိက်ကျာ်ဂှ် ရီုဗၚ် ဗြဴကၟာဲဍုၚ်တၞဟ်တံဂှ်ရ။
ပ္ဍဲဍုၚ်ဣသရေလ လက်ထက်ပရောဗက်ဨလိယှာဲလေဝ် မၞိဟ်ယဲခဲါဒုတ်နွံဗွဲမဂၠိုၚ်ရ။ ဆမ္ဂး ဨလိယှာဲဝွံ ဟွံလွဳကဵုညးတံတုဲ မၞိဟ်သၞဣသရေလသၟိၚ်ပၞာန် နေမာန်မွဲဟေၚ်လွဳကဵုရ” ။ ဆမ္ဂး မၞိဟ်ကလၚ်ဒၟံၚ်အရေဝ်ယေသှုတံဂှ် ဒှ်ဂကူယုဍရ။ ဟိုတ်ဂှ်ရ ညးတံဝွံ မိၚ်အရေဝ်ယေသှုတုဲ ဒေါသတိတ်ဗွဲမလောန်ရ။
သာ်ဂှ်ရ ကောန်ဍုၚ်နာဇရက်တံဝွံ ဒဍေၚ်ပ္တိတ်ယေသှုနူမ္ၚးဇြပ်လ္ၚောဝ်ကျာ်ဂှ်ရ။ ညးတံဝွံ ဂွံထောံဖျေံပ္ဍဲဗၚ်ဂှ် ကော်ဏာယေသှုကၞောတ်ဒဵုရ ။ ဆမ္ဂး ယေသှုဝွံ တတ်အာအကြာမၞိဟ်ဂမၠိုၚ်တုဲ တိတ်အာနူဍုၚ်နာဇရက်ရ။
ယေသှုက္ညအာ ပ္ဍဲရးဂါလိလဲတုဲ ပူရိသာတ်ဂမၠိုၚ်တံလေဝ် ဗက်ကၠုၚ်ညးအိုတ်ရ။ မၞိဟ်တံဝွံ ညးမယဲ၊ ညးမဝဲလီု၊ ညးမတ်ဟွံညာတ်၊ ညးကွာ်ဟွံဂွံ၊ ညးက္တောဝ်ဍိုၚ်၊ ညးဟီုအရေဝ်ဟွံဂွံတံဂှ် ကေတ်နၚ်ကဵုယေသှုရ။ ယေသှုလေဝ် ဗၠးကဵုယဲညးတံသီုဖအိုတ်ရ။
မၞိဟ်ကၠော်လုပ်စဗွဲမဂၠိုၚ်တံလေဝ် ကေတ်နၚ်ပ္ဍဲယေသှုမ္ဂး နူညးတံကၠော်ဂွံတိတ်ကၠုၚ်ဂှ်ယေသှုကဵုပၟိၚ်တုဲ ကၠော်တံတိတ်အာရ။ ကၠော်မာပ္ဍဲညးတံဝွံ“မၞးဂှ်ကောန်ကျာ်ရ”ဟီုရ။ မၞိဟ်ဂမၠိုၚ်တံလေဝ် ဒှ်တဴအံသဝ်တုဲ ထိုၚ်သးဂုန်ကျာ်အိုတ်ရ။
တုဲဂှ် ယေသှုရုဲကံက် ကောန်ကွး စှ်ၜါတၠရ။ ကောန်တွးစှ်ၜါတၠတံဂှ် ညးကော်ခဴစ “ကလုတ်” ရ။ တေံကလုတ်တံဝွံ တိတ်တြဴကရောံယေသှုတုဲ ကတ်ဗ္တောန်နူကဵုညးရ။
ပုံသၠပတ်သမ္မာ : ခရေတ်ဝၚ်မာတ်သာဲ ၄း၁၂-၂၅၊ ခရေတ်ဝၚ်မာကု ၁း၁၄-၁၅၊၃၅-၃၉၊ ၃း၁၃-၂၁၊ ခရေတ်ဝၚ်လုကာ ၄း၁၄-၃၀၊ ၃၈-၄၄