၁၅။ တိဍာ်ဂတိ 'ခါနာန်'

စိုပ်ကၠုၚ်အခိၚ်လက်ကြဴအိုတ်ဂှ် မၞိဟ်ဣသရေလတံ ဂွံလုပ်တိဍာ်ဂတိ 'ရးခါနာန်'ရ။ ပ္ဍဲကဵုခါနာန်ဂှ် ကော်ခဴစဍုၚ်"ယေရိခေါဝ်"နွံဒၟံၚ်ရ။ "ဍုၚ်ယေရိခေါဝ်"ဝွံ ကၟာၚ်ဍုၚ်ခိုၚ်ဒၟံၚ်တုဲစဵုဒၞာဲလဝ်ဍုၚ် ဒိုဟ်နာနာသာ်ရ။ ပ္ဍဲဍုၚ်ယေရိခေါဝ်ဂှ် ယဝ်သှုဝွံ ဗလးဏာမၞိဟ်ကၠတ်ထံၚ်ပရိုၚ်ၜါ ရ။ ပ္ဍဲဍုၚ်ဂှ် 'ရာခါပ်' မနွံယၟုမၞိဟ်ဗြဴမွဲဂှ် နွံဒၟံၚ်ရ။ ရာခါပ််ဝွံ ပၞုက်ကဵုမၞိဟ်ကၠတ်ထံၚ်ပရိုၚ်တံတုဲ ရီုဗၚ်ဂွံဗၠးတိတ်နူကဵုဍုၚ်ယေရိခေါဝ်ဂှ်ရ။ မူဟိုတ်ရောမ္ဂး ရာခါပ်ဝွံပ္တေဟ်ဒၟံၚ်ကျာ်ရ။ အခိၚ်မၞိဟ်ဣသရေလတံ ပလီုပလာ်ဍုၚ်ယေရိခေါဝ်မ္ဂး ဂွံစဵုဒၞာ'ရာခါပ်'ကဵုသ္ၚိကၟိန်ရာခါပ်ရောၚ်ဂှ် ညးတံကဵုလဝ်ဂတိရ။

မၞိဟ်ဣသရေလတံဝွံ ဂွံလုပ်ပ္ဍဲရးခါနာန်ဂှ် ဒးတတ်အာၜဳ'ယဝ်ဍာန်'ရ။ ကျာ်ဟီုကဵု ယဝ်သှု “ယတ်ပရောဟိတ်တံဂှ် ကဵုတတ်ကၠာအိုတ်။” အဃောယတ်ပရောဟိတ်တံ စကွာ်အာဒၟံၚ်ပ္ဍဲလ္တူၜဳ 'ယဝ်ဍာန်'ဂှ် ဍာ်ဟဳဒေါံအာတုဲ မၞိဟ်ဣသရေလတံလေဝ် ကၠောံအာသြၚ်ၜဳလ္ပာ် ဒၞာဲတိသ္ကဟ် တေံရ။

မၞိဟ်တံဝွံ တတ်အာၜဳယဝ်ဍာန်ဂှ်တုဲ ကျာ်ဟီုကဵုယဝ်သှု သွက်ဂွံဗ္တိုက်ဍုၚ်ယေရိခေါဝ်ဂှ် ပလေဝ်ပလေတ်လဝ်ညိ။ ၜိုန်ရဍုၚ်ဂှ် ဇြဟတ်ဇၞော်ဒၟံၚ်ကီုလေဝ် ကျာ်ဟီုကဵု ယတ်ပရောဟိတ်ကဵုကောန်ပၞာန်တံ မွဲတ္ၚဲမွဲဝါ ပွိုၚ်တြဴတ္ၚဲဂှ် ဒးဂေတ်ဇရေၚ်ကၟာၚ်ဍုၚ်ယေရိခေါဝ် ရောၚ်။ သာ်ဂှ်ရ ယတ်ပရောဟိတ်ကဵု ကောန်ပၞာန်တံလေဝ် အတိုၚ်ကျာ်ဗ္ကန်လဝ်ဂှ်ကၠောန်ရ။

စိုပ်တ္ၚဲသတ္တမမ္ဂး၊ မၞိဟ်ဣသရေလတံ ဂေတ်ဒၟံၚ်ဇရေၚ်ကၟာၚ်ဍုၚ်ယေရိခေါဝ်ဂှ် ပေၚ်အာထပှ်ဝါရ။ ဂေတ်ဒၟံၚ်ဇရေၚ်ကၟာၚ်ဍုၚ်ပေၚ်အာထပှ်ဝါတုဲဂှ် ယတ်ပရောဟိတ်တံဗဂိုဟ်ခပဵုခရာတုဲ ကောန်ပၞာန်တံလေဝ် ကရေဲဗက်ကီုရ။

အခိၚ်ဂှ်ကၟာၚ်ဍုၚ်ယေရိခေါဝ်ဝွံ ခရိုဟ်စှ်ေအိုတ်ရ။ အတိုၚ်ကျာ်ဟီုပၟိၚ်လဝ်ဂှ် မၞိဟ်ဣသရေတံလေဝ် ပလီုပလာ်အရာနွံဒၟံၚ်ပ္ဍဲဍုၚ်သီုဖအိုတ်ဂှ်ရ။ မ္ၚးနူရာခါပ်ကဵု သ္ၚိကၟိန်ရာခါပ်ဟေၚ် ဗၠးဘဲနူပလီုပလာ်ဂှ်တုဲ ဒှ်ကၠုၚ်မၞိဟ်ဣသရေလကီုရ။ မၞိဟ်ဂကူတၞဟ်သ္အာၚ်နွံဒၟံၚ်ပ္ဍဲရးခါနာန်ဂှ်လေဝ် မိၚ်ပရိုၚ်မၞိဟ်ဣသရေလတံ ပလီုပလာ်ဍုၚ်ယေရိခေါဝ်ဂှ်တုဲ ဖေက်လကိုတ်ညးတံကၠုၚ်ဗ္တိုက်ရ။

ကျာ်ဗ္ကန်လဝ်ကဵုမၞိဟ်ဣသရေလတံမ္ဂးဂှ် လ္ပကၠောန်ပရေၚ်ၜိုဟ်လလံကဵုပ္ဍဲဂကောံမၞိဟ်ခါနာန်မွဲမွဲတံညိ။ ပ္ဍဲရးခါနာန် မၞိဟ်ကော်ခဴစ 'ဂိၜေါန်'မွဲဂကောံဂှ် ဠီဠာန်ယဝ်သှု၊ကၠုၚ်နူကဵုဒေသတၞဟ်တၞဟ်တေံရ။ ညးတံသၟာန်ယဝ်သှု ဂွံကၠောန်ပရေၚ်ၜိုဟ်လလံရ။ ယဝ်သှုကဵုက္ဍိုပ်သ္ကိုပ် မၞိဟ်ဣသရေလတံဝွံ ဟွံသၟာန်ကျာ်တုဲ စၞးဂှ်ကၠောန်ပရေၚ်ၜိုဟ်လလံကဵု 'ဂိၜေါန်'တံရ။

ပိတ္ၚဲလောန်တုဲဂှ် မၞိဟ်ဣသရေလတံဝွံ ဆဵုမၞိဟ်ဂိၜေါန်တံ မံၚ်ဒၟံၚ်ပ္ဍဲရးခါနာန်ဂှ်ရ။ ဟိုတ်နူမၞိဟ်ဂိၜေါန်တံ ဠီဠာန်တုဲယဝ်သှုဒေါသတိတ်ရ။ ဆမ္ဂး မၞိဟ်ဣသရေလတံ ဆက်ထိၚ်ပရေၚ်ၜိုဟ်လလံ ကဵုလဝ်ဂှ်ရ။ မူဟိုတ်ရောမ္ဂး အရာဏံဂှ် နွံကၠာ ကျာ်ဟွံကဵုကတိဂှ်ရ။ အခိၚ်လအ်ကၠုၚ်ညိတုဲဂှ် မဒှ်သၟိၚ်ဨကရာတ်ဂကူတၞဟ် ပ္ဍဲရးခါနာန်၊ဂကူမၞိဟ် 'အာမောဝ်ရိ'တံဝွံ မၞိဟ်ဂိၜေါန်တံ ကေတ်လဝ်ပရေၚ်ၜိုဟ်လလံကဵု မၞိဟ်ဣသရေလတံဂှ် ညးတံမိၚ်အာရ။ သာ်ဂှ်ရ သွက်ဂွံဗ္တိုက် မၞိဟ်ဂိၜေါန်တံဂှ် ပကောံဒပ်ကောန်ပၞာန်ဇၞော်ဇၞော်ရ။ မၞိဟ်ဂိၜေါန်တံလေဝ် ပလံၚ်ပရိုၚ်ကဵုယဝ်သှုတုဲ အာတ်ရီုဗၚ်ရ။

သာ်ဂှ်ရ ယဝ်သှုဝွံ ပကောံကောန်ပၞာန်ဣသရေလတုဲ အလုံမွဲဗ္တံ ဇက်တိုန်အာ ပ္ဍဲမၞိဟ်ဂိၜေါန်တံရ။ စိုပ်ပယာံဂယးပြဟ် ကောန်ပၞာန်အာမောဝ်ရိတံဂွံဒှ်အံသဝ်ဂှ်ထ္ၜးကဵုတုဲ ဗတိုက်ကဵုညးတံရ။

တ္ၚဲဂှ် ကျာ်ဗ္တိုက်ကဵုသွက်မၞိဟ်ဣသရေလတံရ။ မၞိဟ်အာမောဝ်ရိတံ က္တဵုဒှ်ဒဒိုက်ရ။တုဲဂှ်ကျာ်ကဵု ဗြဲမပၠဳဇၞော်ဇၞော်ဂူစှ်ေလ္တူကောန်ပၞာန်အာမောဝ်ရိတံတုဲ ဂစိုတ်ထောံမၞိဟ်အာမောဝ်ရိဗွဲမဂၠိုၚ်ရ။

သွက်မၞိဟ်ဣသရေလတံ ဂွံဗ္တိုက်အခိၚ်ရုံရုံဂပ်ဂပ်တုဲ ဂွံအံၚ်ဇၞးမၞိဟ်အာမောဝ်ရိတံဂှ် ကျာ် ကဵု'တ္ၚဲ'ဒေံါဒၟံၚ်လ္တူဂၠးအကးရ။ တေံတ္ၚဲဂှ် ကျာ်ကဵုမၞိဟ်ဣသရေလတံအံၚ်ဇၞးခိုဟ်ခိုဟ်ရ။

ကျာ်ကဵုအံၚ်ဇၞးကောန်ပၞာန်အာမောဝ်ရိတုဲဂှ်ကောန်ဍုၚ်ခါနာနိတၞဟ်တံဝွံ ဂွံဗ္တိုက်မၞိဟ်ဣသရေလဂှ် ပကောံညးသ္ကအ်ရ။ ယဝ်သှုကဵုမၞိဟ်ဣသရေလတံလေဝ် ဗ္တိုက်ကဵုညးတံတုဲပလီုပလာ်အိုတ်ရ။

ပေဲါဗ္တိုက်တုဲဒှ်အာတုဲဂှ် ဇၟာပ်ဂကောံဣသရေလတံဂွံပိုၚ်ပြဳ'တိကတိ' ဂှ်ကျာ်ဖျေံကဵုဒၞာဲအိုတ်ရ။ကျာ်ကဵု မၞိဟ်ဣသရေလတံ ဒၟံၚ်ၜိုဟ်ဟ်သြိုဟ်ဟ် အလုံဇရေၚ်'တိကတိ'ဂှ်ရ။

အခိၚ်ယဝ်သှုဗျုအာဂှ် ညးကော်ပကောံမၞိဟ်ဣသရေလတံသီုဖအိုတ်ရ။ ကတ္တိကကျာ်ကဵုလဝ်မၞိဟ်ဣသရေလတံ ပ္ဍဲကဵုဒၞာဲဒဵုသိဏာဂှ် ယဝ်သှုကဵုသတိမၞိဟ်တံရ။ မၞိဟ်တံလေဝ် ပ္တေဟ်ကျာ်တုဲဒ္ဂေတ်ဗက်အတိုၚ်ဓဝ်ကျာ်ရောၚ်ဂှ် ကဵုလဝ်ကတိရ။

ပုံသၠပတ်သမ္မာ : သၠပတ်သမ္တီယဝ်သှု ၁-၂၄