၃၂။ ယေသှုလွဳ မၞိဟ်ကလော်လုပ်စကဵု မၞိဟ်ဗြဴယဲ

မွဲတ္ၚဲဂှ် ယေသှုကဵုကောန်ကွးတံဝွံ ဒၞာဲဂကူမၞိဟ်'ကဍေရ'တံဒၟံၚ်ဂှ် လှောၚ်အာကဵုဂၠုၚ်ရ။ ညးတံဝွံ စိုပ်ဒေသဂှ်တုဲ တိတ်ကၠုၚ်နူဂၠုၚ်ဂှ်ရ။

စိုပ်ပ္ဍဲဒေသဂှ်တုဲ မၞိဟ်ကလော်လုပ်မွဲဝွံ ဂြိပ်ကၠုၚ်ပ္ဍဲဇရေၚ်ယေသှုရ။

ညးဝွံ ထတ်မ္ၚိုဟ်ဒၟံၚ်တုဲ မၞိဟ်မွဲလေဝ် ထိၚ်ဒက်ဟွံမာန်ရ။ မၞိဟ်တံဝွံ နကဵုဇုက်ခရိဟ်ဂှ် ကၠေၚ်ဒက်လဝ် ဇိုၚ်တဲညးရ။ဆ္ဂး ညးကလေၚ်ထပိုတ်ထောံရ။

ညးဝွံ မံၚ်ဒၟံၚ်အကြာသုသာန်တုဲ ကရေဲဒၟံၚ် အရိုဟ်တ္ၚဲအရိုဟ်ဗ္တံရ။ ညးဝွံ ဟွံလတက် ဂၠိက်ယာတ်တုဲ နကဵုတၟံဂှ် ၜုၚ်တက်ဇကုညး ရ။

မၞိဟ်ကလော်လုပ်ဒၟံၚ်ဂှ် ဂြိပ်ကၠုၚ်ဗ္ဒာဲယေသှုတုဲ ထံက်က္ၜံၚ်ဂတမုက်ယေသှုရ။ ယေသှုလေဝ် “ကၠော်မာပ္ဍဲမၞိဟ်ဏံဂှ် တိတ်ကၠုၚ်စမ်!”ဟီုပၟိၚ်ရ။

မၞိဟ်ကလော်လုပ်စဂှ်လေဝ် လရိုအ်ယာံဗွဲမလောန်တုဲ “ ယေသှု၊ ကောန်ကျာ်မသၠုၚ်ပြဲအိုတ် ၊ လ္တူအဲဂှ် မူပၟိက်နွံရော? လ္ပပျဲအဲညိ”ကရေဲဟီုရ။ ယေသှုလေဝ် သၟာန်ယၟုကလော်မာဂှ်မ္ဂး “ယၟုအဲဂှ် လေဂိအောန်ရ( Legion)ကလေၚ်ဟီုရ၊ မူဟိုတ်ရောမ္ဂး ပိုဲတံဂှ် နွံဒၟံၚ်ဗွဲမဂၠိုၚ်ရ။” ( လေဂိအောန်ဟီုဂှ် မဒှ်ဂကောံကောန်ပၞာန်ရဝ်မ မနွံကဵုလ္ၚီရ )

ကလော်မာဝွံ “ လ္ပဒဍေၚ်ပ္တိတ်ပိုဲတံနူကဵုဒေသဏံညိ! ဗ္ဒာဲဒဵုဏံဂှ် ကၠိက်မွဲသ္ကအ်စဒၟံၚ်စၞရ၊ ကဵုပိုဲလုပ်ပ္ဍဲကၠိက်ဂှ်ညိ” ဒုန်ဂုန်ယေသှုရ။ ယေသှုလေဝ် “ ခိုဟ်!၊ အာညိ”ကလေၚ်ဟီုပၟိၚ်ရ။

သာ်ဂှ်ရ ကလော်မာဝွံ တိတ်အာနူမၞိဟ်ဂှ်တုဲ လုပ်ပ္ဍဲကၠိက်သ္ကအ်ဂှ်ရ။ ကၠိက်တံလေဝ် ဂြိပ်စှ်ေပ္ဍဲဗၚ်တုဲ ဗၠိုက်အာဍာ်ကၟာအိုတ်ရ။ လၟိဟ်ကၠိက်သ္ကအ်ဝွံ 'ၜါလ္ၚီ' မနွံရ။

မၞိဟ်မၚ်ကၠိက်ဝွံ နွံဒၟံၚ်ဗ္ဒာဲဂှ်ကီုတုဲ ဆဵုညာတ်အရာဂှ်မ္ဂး ဂြိပ်စဴအာပ္ဍဲဍုၚ်ရ။ ညးဝွံ အရာယေသှုကၠောန်လဝ်ဂှ် လဴထ္ၜးကဵုမၞိဟ်တံရ။ မၞိဟ်ဂမၠိုၚ်တံလေဝ် တိတ်ကၠုၚ်မ္ၚးဍုၚ်တုဲ ဆဵုမၞိဟ်ကၠော်လုပ်ဂှ်ရ။ညးဝွံ ညံၚ်ရဴမၞိဟ်ဓဝ်မတာမွဲဂှ် တက်လဝ်ဂၠိက်ယာတ်တုဲ ဂဇံဒၟံၚ်ၜိုဟ်ဟ်သြိုဟ်ဟ်ရ။

မၞိဟ်ဂမၠိုၚ်တံဝွံ ဖေက်ယေသှုတုဲ ကဵုတိတ်အာနူဂှ်ရ။သာ်ဂှ်ရ ယေသှုဝွံ လုပ်ပ္ဍဲဂၠုၚ်ရ။ မၞိဟ်ကၠော်လုပ်ဂှ်လေဝ် ဂွံဗက်အာကရောံယေသှုဂှ် ဒုန်ဂုန်အာတ်အခေါၚ်ရ။

ယေသှုလေဝ် “မၞးဗက်ဟွံဂွံပုဟ်၊ စဴသ္ၚိတုဲ ဗီုလဵုကျာ်ကၠောန်လဝ်လ္တူမၞး၊ မေတ္တာကျာ်ဗီုလဵုနွံဒၟံၚ်လ္တူမၞးဂှ် လဴထ္ၜးကဵုဇၟာပ်မၞိဟ်တံညိ” သာ်ဂှ် ကလေၚ်ဟီုကဵုမၞိဟ်ဂှ်ရ။

မၞိဟ်ဂှ်လေဝ် စဴအာတုဲ အရာယေသှုကၠောန်လဝ်ဂှ် လဴထ္ၜးကဵုဇၟာပ်မၞိဟ်တံရ။ မၞိဟ်ဂမၠိုၚ်တံဝွံ မိၚ်ပရိုၚ်ယေသှုတုဲ အံသဝ်အိုတ်ရ။

ယေသှုဝွံ ကလေၚ်စဴကၠုၚ် သြၚ်ကၟာမွဲလ္ပာ်ပၠန်ရ။ အခိၚ်စိုပ်ကၠုၚ်သြၚ်ဂှ် မၞိဟ်ဂမၠိုၚ်တံဝွံ ပကောံကၠုၚ်ဗ္ဒာဲယေသှုအိုတ်ရ။ ပ္ဍဲဂကောံမၞိဟ်ဂမၠိုၚ်ဂှ် မၞိဟ်ဗြဴမွဲတၠဝွံ ဒှ်ဒၟံၚ်ယဲဆီစှ်ေ ပွိုၚ်စှ်ၜါသၞာံရ။ တေံဗြဴဝွံ သြန်သီုဖအိုတ်ဂှ် ကဵုအ္စာဂဥုဲတံတုဲ လွဳဒၟံၚ်ယဲကီုလေဝ် ဟွံဗၠးရ။

တေံဗြဴဝွံ ယေသှုလွဳဒၟံၚ် မၞိဟ်ယဲဗွဲမဂၠိုၚ်ဂှ် မိၚ်တုဲ “ ယဝ်ရ လုက်ဒးဂၠိက်ယာတ်ယေသှုမ္ဂး ယဲအဲဂွံဗၠးဍာံဍာံရောၚ်” ကူချပ်ရ။ တုဲဂှ် တေံဗြဴဝွံ ဗက်ကၠုၚ်လက်ကြဴယေသှုတုဲ လုက်ကေတ်ယာတ်ပလောံညးရ။ လုက်ဒးတုဲ ခြာဟွံလအ် ယဲဆီစှ်ေဒၟံၚ်ပွိုၚ်စှ်ၜါသၞာံဂှ် ဗၠးအာရ။

ဗွဲမပြဟ်ဂှ် ယေသှုတီအာတုဲ ကလေၚ်သၟာန်ရ“ ညးဂှ်လုက်ဒးအဲရော?”။ကောန်ကွးတံလေဝ် “ မၞိဟ်တံနွံဒၟံၚ်ဗ္ဒာဲတဳလဂုန်ဗွဲမဂၠိုၚ်တုဲ လုက်ဒးတဳလဂုန်အိုတ်ရ။ ညးဂှ်လုက်ဒးဂှ် မူဟိုတ်သၟာန်အဲဍိက်ရော”။

မၞိဟ်ဗြဴဝွံ ဖေက်ဂတဝ်တုဲ ထံက်က္ၜံၚ်ဂတမုက်ယေသှုရ။၊ တေံဗြဴဂှ်လေဝ် မူညးကၠောန်လဝ်ဂှ် လဴကဵုယေသှုရ။ ယေသှုဝွံ “ စိုတ်ပ္တေဟ်မၞးဂှ် ဗၠးကဵုမၞးတုဲရ၊ စဴအာၜိုဟ်ဟ်သြိုဟ်ဟ်ညိ”ဟီုကဵုမၞိဟ်ဗြဴဂှ်ရ။

ပုံသၠပတ်သမ္မာ : ခရေတ်ဝၚ်မာတ်သာဲ ၈း၂၈-၃၄၊ ၉း၂၀-၂၂၊ ခရေတ်ဝၚ်မာကု ၅း၁-၂၀၊ ၅း၂၄-၃၄၊ ခရေတ်ဝၚ်လုကာ ၈း၂၆-၃၉၊ ၈း၄၂-၄၈