၃။ ဍာ်ဇၞော်
လောန်ကၠုၚ်အခိၚ်ဗွဲမဂၠိုၚ်တုဲ မၞိဟ်ဂမၠိုၚ်တံဝွံ မံၚ်ဒၟံၚ်ပ္ဍဲလောကဏံရ။ မၞိဟ်တံဝွံ ယုတ်မာတုဲကြံၚ်ကြတိုန်ကၠုၚ်ရ။ ဟိုတ်နူညးတံကၠောန်ဟွံခိုဟ်တုဲ နကဵုဍာ်ဇၞော်ဇၞော်မွဲ သွက်ဂွံပလီုပလာ်အလုံတိဇၞော်ဂှ် ကျာ်ဖျေံသ္ဂုတ်သွာတ်ရ။
ဆမ္ဂး နဝ်ဨဝွံ ဂွံမုက်ဂတကျာ်ထာဝရရ။ ညးဝွံ ဒှ်မၞိဟ်တပ်တးတုဲ မံၚ်ဒၟံၚ်အကြာမၞိဟ်ယုတ်မာတံရ။ ညးကဵုဍာ်ဇၞော်ဏောၚ်ဂှ် ကျာ်ဟီုလဝ်ကဵုနဝ်ဨရ။ သာ်ဂှ်ရ၊ ညးကဵုနဝ်ဨ သိုၚ်က္ၜၚ်ဇၞော်ဇၞော်မွဲရ။
ကျာ်ဟီုကဵုနဝ်ဨ၊ သွက်ဂွံသိုၚ်က္ၜၚ်ဂှ် ဇမၠိၚ် (ပိကၠံဟတ်)၊ အနာံ (မသုန်စှ်ောဟတ်)၊ သၠုၚ် (ပိစှ်ောဟတ်)မဒှ်ရ။ နဝ်ဨဝွံ နကဵုဆုဂှ် သိုၚ်လဝ်က္ၜၚ်ပိထပ်တုဲ ဒၞာဲဒၟံၚ်ဗွဲမဂၠိုၚ်၊ သီုကၟဳမွဲကဵု ဗ္တၚ်မွဲလေဝ်နွံကီုရ။ က္ၜၚ်ဏံဝွံ အဃောဍာ်ဇၞော်မ္ဂး သွက်ဂွံရီုဗၚ် နဝ်ဨကဵုသ္ၚိကၟိန်နဝ်ဨကေုာံ ဇၟာပ်ဂကူသတ္တိရစ္ဆာန်သီုဖအိုတ်တံရ။
နဝ်ဨဝွံ ကလၚ်ဒၟံၚ်အရေဝ်ကျာ်ရ။ ညးကဵုကောန်တြုံညးပိတံဝွံ အတိုၚ်ကျာ်ဟီုပၟိၚ်လဝ်ဂှ်သိုၚ်က္ၜၚ်ရ။ ဂွံသိုၚ်က္ၜၚ်ဂှ် ဒးကေတ်အခိၚ်ဂၠိုၚ်ကဵုသၞာံရ။ မူဟိုတ်ရောမ္ဂး က္ၜၚ်ဝွံ ဇၞော်လောန်ကွေံရ။ နဝ်ဨလေဝ် လဴထ္ၜးကဵုမၞိဟ်ဂမၠိုၚ်တံပရူ ဍာ်ဇၞော်တုဲမၞိဟ်တံဂွံကလေၚ်ကၠုၚ်ပ္ဍဲထာန်ကျာ်ပၠန်ဂှ် ကဵုသတိရ။ ဆမ္ဂး မၞိဟ်တံဟွံပ္တေဟ်နဝ်ဨရ။
ကျာ်ဟီုပၟိၚ်ကဵုနဝ်ဨဂှ် "သွက်သ္ၚိကၟိန်နဝ်ဨကဵုသွက်သတ္တိရစ္ဆာန်ဂမၠိုၚ်တံ ဂွံစစၞရုံရုံဂပ်ဂပ်ဂှ်ကဵုပကောံလဝ်စၞစညိ။” အခိၚ်သိုၚ်က္ၜၚ်တုဲအာအိုတ်ဂှ် နဝ်ဨ၊ ဗြဴနဝ်ဨ၊ ကောန်တြုံနဝ်ဨပိကဵုဗြဴကောန်နဝ်ဨ (သီုဖအိုတ်ဂှ်ဒစာံ)ဂှ်ကျာ်ကဵုလုပ်ပ္ဍဲက္ၜၚ်ရ။
ဇၟာပ်သတ္တိရစ္ဆာန်ၝောံမွဲကၟက်မွဲကဵုဂစေံၝောံမွဲကၟက်မွဲတံဂှ် ကျာ်ပလံၚ်နၚ်ကဵုနဝ်ဨရ။ ဟိုတ်ဂှ်ရ အဃောဍာ်ဇၞော်မ္ဂး သတ်တံ ဂွံဗၠးနူဘဲဍာ်ဂှ် လုပ်အာပ္ဍဲက္ၜၚ်အိုတ်ရ။ ကျာ်ဝွံသွက်ဂွံသုၚ်စောဲ ပူဇဴယတ်ဂှ်ဇၟာပ်ပ်ဂကူသတ္တိရိစ္ဆာန်၊ ၝောံထပှ်ကဵုကၟက်ထပှ်ဂှ်လေဝ်ပလံၚ်နၚ်ကဵုကီုရ။ အခိၚ်ညးတံလုပ်အာပ္ဍဲက္ၜၚ်သီုဖအိုတ်တုဲဂှ်၊ ကျာ်ကၟာတ်ထောံပြၚ်က္ၜၚ်ဂှ်ရ။
တုဲဂှ် ဗြဲစဂူရ။ ဗြဲဂူ ပွိုၚ် ပန်စှ်ောတ္ၚဲ၊ ပန်စှ်ောဗ္တံ ဟွံဒေါံရ။ ဍာ်လေဝ်ဂစောတ်တိတ်ကၠုၚ်နူတိရ။ အရာနွံဒၟံၚ်ပ္ဍဲအလုံဂၠးတိသီုဖအိုတ် သီုကဵုဒဵုသၠုၚ်အိုတ်လေဝ် ဍာ်ဂြောပ်ဒလီုအာအိုတ်ရ။
ပါဲနူမၞိဟ်ကဵုသတ္တိရစ္ဆာန်နွံမံၚ်ပ္ဍဲက္ၜၚ်ဂှ်တုဲ အရာဂျိုၚ်ဒၟံၚ်လ္တူတိသီုဖအိုတ်တံ ချိုတ်အိုတ်ရ။ က္ၜၚ်ဂှ်လေ ဟဳမံၚ်လ္တူဍာ်တုဲ အရာသီုဖအိုတ်နွံမံၚ်ပ္ဍဲက္ၜၚ်ဂှ် ဂွံဗၠးဘဲဍာ်ဂှ်ရ။
အခိၚ်ဗြဲဒေါံအာတုဲဂှ်၊ က္ၜၚ်လေဝ် ဆက်ဟဳဒၟံၚ် လ္တူဍာ် ပွိုၚ်မသုန်ဂိတုရ။ တုဲဂှ် အခိၚ်ဍာ်စေဟ်စိုပ်မွဲတ္ၚဲဂှ် က္ၜၚ်လေဝ် ဂၚ်မံၚ်လတူက္ဍိုပ်ဒဵုမွဲမရ။ ဆမ္ဂး လ္တူတိဇၞော်ဂှ် ဍာ်ပေၚ်ဒၟံၚ်ဏီရ။ လောန်အာပိဂိတုပြၚ်ပြၚ်တုဲဂွံညာတ်တိုန်က္ဍိုပ်ဒဵုဂှ်ရ။
ပန်စှ်ောတ္ၚဲပြၚ်ပြၚ်လောန်အာတုဲပၠန်ဂှ် နဝ်ဨဝွံ ဂွံတီဍာ်ဇတ်ဂှ် ဗလးဏာဂစေံခ္ဍာ်မွဲရ။ ခဍာ်ဂှ် ပဝ်အာတုဲ ဂၠာဲဗဵုဒၞာဲတိသ္ကဟ်ကီုလေဝ် ဟွံဆဵုတုဲ ကလေၚ်ပဝ်စဴကၠုၚ်ပၠန်ရ။
လက်ကြဴဂှ် နဝ်ဨ ဗၠးဏာဂစေံပူမွဲပၠန်ရ။ ဆမ္ဂး ပူဂှ်လေဝ် ဒၞာဲတိသ္ကဟ်ဂှ် ဂၠာဲဟွံဆဵုတုဲ ကလေၚ်ပဝ်စဴကၠုၚ် ပ္ဍဲနဝ်ဨပၠန်ရ။ လောန်ကၠုၚ်မွဲသတ္တဟတုဲပၠန် နဝ်ဨ ထပ်ဗၠးဏာပူမွဲပၠန်ရ။ ပူဂှ်လေဝ် နကဵုခၟဴဂှ်ခိုၚ်နၚ်တၞာၚ်ပလောန်မွဲတၞာၚ်တုဲကလေၚ်ပဝ်စဴကၠုၚ်ရ။ ဍာ်ဇတ်စှ်ေအာတုဲ တၞံဆုတံလေ ဇၞော်တိုန်ကၠုၚ်မွဲဝါပၠန်ရ။
နဝ်ဨမၚ်မွဲသတ္တဟတုဲပၠန်ဂှ် ဗၠးဏာပူမွဲ အလန်တတိယရ။ အလန်ဏံ ပူဂှ် ဆဵုဒၞာဲဌာန်ဒၟံၚ်တုဲ ဟွံကလေၚ်စဴကၠုၚ်ရ။ ဍာ်လေဝ် ဇတ်သ္ကဟ်အာယျ၊
လအ်အာၜါဂိတုတုဲ ကျာ်ဟီုကဵုနဝ်ဨ “အခိၚ်လၟုဟ် သ္ၚိကၟိန်မၞးကဵု သတ္တိရစ္ဆာန်သီုဖအိုတ်တံတိတ်ကၠုၚ်နူက္ၜၚ်ဂှ်ညိ၊ ၜံၚ်ကောန်ဂၠိုၚ်ဂၠိုၚ်တုဲ ဗပေၚ်လ္တူတိဇၞော်ညိ” ဟိုတ်ဂှ်ရ နဝ်ဨ ကဵု သ္ၚိကၟိန်နဝ်ဨတံ တိတ်ကၠုၚ်နူက္ၜၚ်ဂှ်ရ။
နဝ်ဨ တိတ်ကၠုၚ်မ္ၚးက္ၜၚ်ဂှ်တုဲ သွက်ဂွံပူဇဴ သတ္တိရစ္ဆာန်လ္ၚဵုတံဂှ် ကၠောန်ပၞၚ်ယတ် ရ။ ကျာ်ဝွံ နကဵုပူဇဴလဝ်ယတ်ဂှ် မိပ်စိုတ်တုဲ ကဵုမ္ၚဵုမၚ်္ဂလ နဝ်ဨကဵုသ္ၚိထာန်နဝ်ဨရ။
ကျာ်ဟီု “အဲကဵုဂတိ မွဲအလန်ပၠန်ဂှ် ဆလအ်မှ အဲဟွံချဴတိဇၞော်ဏံရပုဟ်။ ၜိုန်ရမၞိဟ်တံကၠောန်မံၚ်အရာပြေံဒုစရိုတ်ကီုလေဝ် နကဵုဍာ်ဇၞော်ဇၞော်ဂှ် အဲဟွံပလီုပလာ်တိဇၞော်ဏံရပုဟ်။ ကာလမၞိဟ်တံအဝဲနူဍောတ်ဂၠိုၚ်မံၚ်ကဵုဒုဟ်ကီုလေဝ် အဲဟွံပလီုပလာ်ရ။”
တုဲဂှ် နကဵုလက်သန်ဂတိကျာ်ဂှ် ညးက္တဵုဗဒှ်ဓမၚ်သုၚ်ဍာ်ကၠာအိုတ်ရ။ ဇၟာပ်အခိၚ် ဓမၚ်သုၚ်ဍာ်မံက်တိုန်ကၠုၚ်နူအကးမ္ဂး ကျာ်ဗှ်သၞာဂတိ အရာညးကဵုလဝ်ကဵုမၞိဟ်တံဂှ်ရ။
ပုံ သၠပတ်သမ္မာ : သၠပတ်ပထမကဝ် ၆-၈