၂၀။ ဒးဒုၚ်ဘာတ်ပ္တိတ်နူဍုၚ်ကေုာံကလေၚ်စိုပ်ကၠုၚ်

ဍုၚ်ဣသရလေကဵုဍုၚ်ယုဍ ၜါဍုၚ်တံဝွံ ပၠန်ဂတးကၠုၚ်ကျာ်ရ။ ကတ္တိကစွံလဝ်ပ္ဍဲကဵုဒဵုသိဏာတေံဂှ်လေဝ် ညးတံပလီုပလာ်ထောံရ။မၞိဟ်တံဂွံသံၚ်ဝေဂတုဲ ဂွံကလေၚ်ရေဟ်သေဟ်ကျာ်ပၠန်ဂှ် ကျာ်ပလံၚ်လဝ်ကဵုမၞိဟ်ဟီုကဵုအရေဝ်ကျာ်တုဲကဵုသတိရ။ ဆမ္ဂးညးတံဝွံ တၚ်ပဲါထောံရ။

သာ်ဂှ်ရ သၞတံဂွံပလီုပလာ်သီုၜါဍုၚ်ဂှ်ကျာ်ကဵုအခေါၚ်ရ။ ဂကူ'အာသှုရိ'တံဝွံ ဇြဟတ်ဇၞော်ဗွဲမလောန်တုဲ ကြံကြယုတ်မာ လ္တူဂကူတၞဟ်တၞဟ်တံရ။ညးတံဝွံ ပလီုပလာ်ဍုၚ်ဣသရေလတုဲ စံၚ်ကဵုပၟတ်၊ဂစိုတ်ထောံမၞိဟ်ဣသရေလဗွဲမဂၠိုၚ်ရ။ပိုန်ဒြပ်ၚုဟ်မးနွံတံဂှ်လေဝ် သီကေတ်ဏာသီုဖအိုတ်ရ။

က္ဍိုပ်သ္ကိုပ်ဂမၠိုၚ်၊ သေဌဳကဵုတၠပညာတံဂှ် ဂကူ'အာသှုရိ'တံသီကေတ်တုဲ ကော်ဏာပ္ဍဲဍုၚ်ညးတံရ။ မၞိဟ်ဝါတ်ဒိုက်ဟေၚ် သေဟ်ဒၟံၚ်ပ္ဍဲဍုၚ်ဣသရေလဂှ်ရ။

တုဲဂှ်ကောန်ဍုၚ်အာသှုရိတံဝွံ ကော်နၚ်ကောန်ဍုၚ်တၞဟ်တုဲ ကဵုဒၟံၚ်ပ္ဍဲဍုၚ်ဣသရေလလီုလာ်ဂှ်ရ။ ညးတံဝွံ ကလေၚ်သိုၚ်ပ္တန်ဍုၚ်ဂှ်ပၠန်ရ။ ညးတံဝွံ သ္ပမ္ၚဵုထပ်တဲကဵုဂကူဣသရေလသေဟ်ဒၟံၚ်ဂှ်ရ။ အဆက်အဆေန်ညးတံဂှ် ကော်ခဴဂကူ "သှမာရိ" ရ။

ကောန်ဍုၚ်ဣသရေလတံဟွံပ္တေဟ်ကျာ် ဟွံကလၚ်အရေဝ်ကျာ်တုဲ ဒးဒုၚ်ဒုဟ်ဒန်ပလီုပလာ်ဍုၚ်ဂှ် ကောန်ဍုၚ်ယုဍတံတီဒၟံၚ်ကီုလေဝ် ဆက်ရေဟ်သေဟ်ဒၟံၚ် ကျာ်ခါနာန်ကဵုပတ္တိမာရုပ်တံဏီရ။ ကျာ်ထာဝရဝွံ ပလံၚ်ကဵုမၞိဟ်ဟီုအရေဝ်ကျာ်တုဲ ကဵုသတိမၞိဟ်တံရ။ဆမ္ဂး ဂွံကလၚ်အရေဝ်ဂှ် ညးတံတၚ်ပဲါထောံရ။

'အာသှုရိ'ဝွံ ပလီုပလာ်ဍုၚ်ဣသရေလဂှ်ကၠံသၞာံလောန်ကၠုၚ်တုဲ သွက်ဂွံဗ္တိုက်ဍုၚ်ယုဍဂှ် ကျာ်ပလံၚ်ကဵု'သၟိၚ်နေၜုခါတ်နေဇာ'၊ဨကရာတ်ၜါၜုလုၚ်ရ။ ဍုၚ်ၜါၜုလုၚ်ဝွံ ဒှ်ဂကူဇြဟတ်ဇၞော်မွဲရ။ ဨကရာတ်ယုဍဝွံ တုပ်စိုတ်ဂွံသ္ပဍိက်တုဲ'သၟိၚ်နေၜုခါတ်နေဇာ'သီကေတ်ဍုၚ်ယုဍရ။ဇၟာပ်သၞာံလေဝ် သြန်ဗွဲမဂၠိုၚ်ဂှ်ဒးကဵုရ။

လောန်ကၠုၚ်သၞာံညိတုဲဂှ် ဨကရာတ်ယုဍဝွံ ကလေၚ်ပၠန်ဂတး 'ၜါၜုလုၚ်'ရ။ သာ်ဂှ်ရ ကောန်ဍုၚ်ၜါၜုလုၚ်တံ ကလေၚ်ဗ္တိုက်ဍုၚ်ယုဍပၠန်ရ။ ညးတံဝွံ သီကေတ်ဍုၚ်ယေရုသလၚ်တုဲ ပလီုပလာ်ဘာလွဳမာန်ရ။ ထဝ်သြန်ပ္ဍဲဍုၚ်ကဵုထဝ်သြန်ပ္ဍဲဘာလွဳမာန်ဂှ်လေဝ် ကေတ်ဏာသီုဖအိုတ်ရ။

ဟိုတ်နူဨကရာတ်ယုဍပၠန်ဂတးတုဲ ကောန်ပၞာန်နေၜုခါတ်နေဇာတံဝွံ ဂတမုက်ဨကရာတ်ယုဍဂှ်ဂစိုတ်ကောန်ညးရ။မတ်ညးဂှ်ကဵုကၠက်ရ။ တုဲပၠန်ဂှ် ဨကရာတ်ယုဍဂှ် ညးတံကော်ဏာပ္ဍဲထံၚ်ၜါၜုလုၚ်တုဲ ကဵုချိုတ်ဒၞာဲဂှ်ရ။

'နေၜုခါတ်နေဇာ'ကဵုကောန်ပၞာန်တံဝွံ ကောန်ဍုၚ်ယုဍဗွဲမဂၠိုၚ်ဂှ် ကော်နၚ်ပ္ဍဲဍုၚ်ၜါၜုလုၚ်ရ။ သွက်ဂွံတဵုတိဝါဂှ် စွံလဝ်မၞိဟ်ဝါတ်ဂါတ်သၟးရ။အခိၚ် မၞိဟ်ပ္တေဟ်ကျာ်တံဒးဒုၚ်ပျဲတုဲ ဒးတိတ်အာနူကဵုတိကတိဂှ် ကော်ခဴ "အခိၚ်ဒးဘာတ်ပ္တိတ်နူကဵုဍုၚ်"ရ။

ကျာ်ဝွံ ဟိုတ်နူဒုဟ်ဒန်မၞိဟ်တံဂှ် ဘာတ်ပ္တိတ်နူဍုၚ်ကီုလေဝ် ဟွံဝိုတ်ကတိညးကဵုမၞိဟ်တံရ။ ကျာ်ဝွံနကဵုမၞိဟ်ဟီုကဵုအရေဝ်ကျာ်ဂှ် ဟီုဒၟံၚ်အရေဝ်တုဲ လ္တူမၞိဟ်ညးလေဝ်ရံၚ်စံၚ်ဒၟံၚ်လၟိုန်ရ။ ထပှ်စှ်ောသၞာံလောန်တုဲမ္ဂး ကလေၚ်ပလံၚ်ကဵုပ္ဍဲတိကတိပၠန်ရောၚ်ဂှ် ကျာ်ကဵုလဝ်ကတိရ။

ထပှ်စှ်ောသၞာံလောန်တုဲဂှ် ဨကရာတ်ပေရသိ "သၟိၚ်ကုရု"ဝွံ ဇၞးကေတ်ဍုၚ်ၜါၜုလုၚ်ရ။သာ်ဂှ်ရ ဒၞာဲအဇာ'အီပဲါယျာၜါၜုလုၚ်'ဂှ် 'အီပဲါယျာပေရသိ'တံပိုၚ်ပြဳကၠုၚ်ရ။ လၟုဟ်ဝွံ ဂကူဣသရေလတံဂှ် ကော်ခဴ "ဂကူယုဍ"ရ။လၟိုန်ကာလဂကူဣသရေလဗွဲမဂၠိုၚ်တံဝွံ မံၚ်ဒၟံၚ်ပ္ဍဲဍုၚ်ၜါၜုလုၚ်ရ။ မၞိဟ်အဝဲဇၞော်တံသၟး ဗှ်သၞာတိဍာ်ယုဍဂှ်ရ။

'အီပဲါယျာပေရသိ'ဝွံ ဇြဟတ်ဇၞော်လောန်ကီုလေဝ် ဆာန်ဍူဒၟံၚ်လ္တူမၞိဟ်ကျပၞာန်တံရ။"ကုရု"ဒှ်သၟိၚ်ပေရသိတုဲ ခြာဟွံလအ်ဂှ် မၞိဟ်နွံပၟိက်ဂွံကလေၚ်စဴဍုၚ်ယုဍဂှ် ကဵုအခေါၚ်စဴရ။ သြန်သွက်ဂွံကလေၚ်သိုၚ်ပ္တန်ဘာလွဳမာန်ဂှ်လေဝ် ကဵုဏာကီုရ။သ္ပဍိက်ပွိုၚ်ထပှ်စှ်ောသၞာံတုဲ မၞိဟ်ယုဍဗွဲမအောန်တံဟေၚ် ကလေၚ်စဴအာရးယုဍ ပ္ဍဲဍုၚ်ယေရုသှလေၚ်ဂှ်ရ။

မၞိဟ်ယုဍတံဝွံ စိုပ်ကၠုၚ်ဍုၚ်ယေရုသလေၚ်တုဲဘာလွဳမာန်ကျာ်ကဵုကၟာၚ်ဍုၚ်ဂှ် သိုၚ်ပ္တန်ရ။ ညးတံဝွံ နွံဒၟံၚ်သၟဝ်တဲအဝဵုဍုၚ်ပေရသိကီုလေဝ်အခေါၚ်ဂွံမံၚ်ပ္ဍဲတိကတိ၊ အခေါၚ်ဂွံရေဟ်သေဟ်ကျာ်ဂှ် ကလေၚ်ဂွံပၠန်ရ။

ပုံသၠပတ်သမ္မာ : ဓမ္မရာဇာဝၚ်စတုတ္ထဝက် ၁၆-၁၈၊ ရာဇာဝၚ်ဗွဲသရုပ်ဒုတိယဝက် ၃၆၊ သၠပတ်သမ္တီသၞောဝ်ဨဇရ ၁-၁၀၊ သၠပတ်သမ္တီနေဟမိ ၁-၁၃