၄၄။ ပေတရုကဵုယဝ်ဟာန် လွဳမၞိဟ်ခဲါဒုဟ်

မွဲတ္ၚဲဝွံ ပေတရုကဵုယဝ်ဟာန် လုပ်အာပ္ဍဲဘာလွဳမာန်ရ။ ဗ္ဒာဲပါၚ်တြၚ်လွဳမာန်ဂှ် မၞိဟ်ဇိုၚ်တဲဟွံခံၚ်မွဲတၠဂဇအ်ဒၟံၚ်တုဲ အာတ်ခရၚ်ဒၟံၚ်သြန်ရ။

ပေတရုဝွံ ဗဵုမၞိဟ်ဂှ်တုဲ “ပ္ဍဲအဲဂှ် သြန်ဟွံမွဲပုဟ်၊ ဆမ္ဂး အရာနွံဒၟံၚ်ပ္ဍဲအဲဂှ် အဲကဵုမၞးရောၚ်၊ နကဵုနာမနာဲယေသှုဂှ် က္တဵုတုဲကွာၚ်ဂါံအာညိ” ဟီုရ။

ကျာ်ထာဝရဝွံ မၞိဟ်ဇိုၚ်တဲဟွံခံၚ်ဂှ် ကဵုဗၠးဗွဲပြဟ်ရ။ ညးဝွံ က္တဵုကွာ်ဂွံတုဲ ဒံၚ်လှ်ေထိုၚ်သးဂုန်ကျာ်ရ။ မၞိဟ်နွံဒၟံၚ်ဗ္ဒာဲလွဳမာန်ဂှ်လေဝ် ဒှ်တဴအံသဝ်အိုတ်ရ။

မၞိဟ်ဂမၠိုၚ် စိုပ်ကၠုၚ်တုဲ ဗဵုမၞိဟ်ယဲဗၠးဂှ်ရ။ ပေတရုဝွံ “ မၞးတံဗဵုမၞိဟ်ဂှ်တုဲ မူဟိုတ်ဒှ်တဴအံသဝ်ဒၟံၚ်ရော၊ သွက်ဂွံဗၠးအာမာန်ဂှ် နကဵုဣဓိပိုဲ ဟွံသေၚ်ပုဟ်၊ နကဵုဣဓိနာဲယေသှုဂှ် ဂွံဗၠးမာန်ရ”သာ်ဂှ် ဟီုဂးရ။

" မၞးတံဝွံ ဂွံဂစိုတ်ယေသှုဂှ် ဟီုကဵုသၟိၚ်ရဝ်မတုဲ ဂစိုတ်လဝ် ယေသှုကီုရ။ ၜိုန်ဂှ်လေဝ် ကျာ်ထာဝရဝွံ ကဵုညးကလေၚ်ဂျိုၚ်တိုန်နူဂမ္စိုတ်ရ။ အရာမၞးတံကၠောန်လဝ်ဂှ် ဟွံတီကၠိုဟ်ၜိုန်ဒှ်ကီု အခိၚ်တၠညးဟံၚ်ပြာ်ဒးဒုၚ်ဂစိုတ်ကဵုဒဒိုက်ဝေဒနာဂှ် ကျာ်ထာဝရသုၚ်စောဲလဝ်မၞးတံတုဲ အရေဝ်ပရောဗက်ဂွံဍိုက်ပေၚ်ကၠုၚ်ရ။ သာ်ဂှ်ရ လၟုဟ်ဂွံသံၚ်ဝေဂတုဲ ကလေၚ်ကၠုၚ်ထာန်ကျာ်ညိ၊ သာ်ဂှ်ကၠောန်မ္ဂး ကျာ်ထာဝရ ကြာတ်ကြဴကဵုဒုဟ်မၞးတံရောၚ်။”

က္ဍိုပ်သ္ကိုပ်ပ္ဍဲဘာလွဳမာန်တံဝွံ မိၚ်ဒးအရေဝ် ပေတရုကဵုယဝ်ဟာန်တုဲ ဒေါသတိတ်ရ။ သာ်ဂှ်ရ ရပ်ညးတံတုဲ ပၠုပ်စုတ်ပ္ဍဲထံံၚ်ရ။ ဆမ္ဂး မၞိဟ်ဂမၠိုၚ်ၚ်တံဝွံ မိၚ်အရေဝ်ပေတရုတုဲ ပ္တေဟ်ကၠုၚ်နာဲယေသှုရ။မၞိဟ်တြုံဟေၚ် ပ္တေဟ်ကၠုၚ် မသုန်လ္ၚီရ။

မွဲတ္ၚဲပၠန်၊ က္ဍိုပ်သ္ကိုပ်ဘာသာယုဍတံဝွံ ပေတရုကဵုယဝ်ဟာန်ဂှ် ရပ်နၚ်ပ္ဍဲယတ်ပရောဟိတ်ဇၞော်ကဵု က္ဍိုပ်သ္ကိုပ်ဘာသာတၞဟ်တံရ။ မၞိဟ်ဇိုၚ်တဲဟွံခံၚ်လေဝ် ပါကီုရ။ ညးတံဝွံ “မၞိဟ်ဇိုၚ်တဲဟွံခံၚ်ဏံဂှ် လွဳလဝ်နကဵုအစောန်ညးဂှ်ရော”သၟာန်ပေတရုကဵုယဝ်ဟာန်ရ။

ပေတရုလေဝ် “မၞိဟ်ဒတဴဒၟံၚ်ဂတမၞးတံဂှ် ဗၠးကၠုၚ်နကဵုဣဓိတၠးညးဟံၚ်ပြာ် နာဲယေသှုရ။ မၞးတံဂစိုတ်နာဲယေသှုကီုလေဝ် ကျာ်ထာဝရကဵုညးဂျိုၚ်တိုန်ရ။ ဆမ္ဂးမၞးတံတၚ်ပဲါညးဂှ်ရ။ သွက်ဂွံဟံၚ်ပြာ်မာန်ဂှ် ပဲါနူဣဓိနာဲယေသှု နဲကဲတၞဟ်ဟွံမွဲပုဟ!”ကလေၚ်သွဟ်ရ။

ပေတရုကဵုယဝ်ဟာန်ဝွံ ဟီုအရေဝ်ဂံၚ်သ္ကာတုဲ က္ဍိုပ်သ္ကိုပ်ဘာသာတံလေဝ် ဖေက်လကိုတ်အိုတ်ရ။ မူဟိုတ်ရောမ္ဂး ပေတရုကဵုယဝ်ဟာန်ဝွံ ဒှ်မၞိဟ်ဓဝ်မတာ၊ မၞိဟ်ဟွံမွဲကဵုပညာဂှ် ညးတံတီဒၟံၚ်တုဲရ။ လက်ကြဴဂှ် သမ္တီဂွံ မၞိဟ်နွံဒၟံၚ်ကရောံယေသှုရ။ ညးတံဝွံ သၟာန်သၟုက်ပေတရုကဵုယဝ်ဟာန်တုဲ ကလေၚ်ဗၠးဏာရ။

ပုံသၠပတ်သမ္မာ : ဝတ္ထုကလုတ် ၃း၁-၄း၂၂