၅။ ကောန်နူကတိ
အာဗြာမ်ကဵုသာရာဲဝွံစိုပ်ကၠုၚ်ပ္ဍဲရးခါနာန်ဂှ် လအ်ဒၟံၚ်စှ်သၞာံကီုလေဝ် ညးတံဝွံ ကောန်မွဲလေဝ်ဟွံဂွံဏီဖိုအ်ရ။ ဟိုတ်ဂှ်ရ ဗြဴအာဗြာမ် သာရာဲဝွံ ဟီုကဵုအာဗြာမ် “အခိၚ်လၟုဟ်အဲဂွံဂွံကောန်ဂှ် ဗျုလောန်ကွေံတုဲ သွက်ဂွံၜံၚ်ကောန်ဂှ် ကျာ်ဟွံကဵုအဲ အခေါၚ်ရ။” ဣဏံ ကောန်လိၚ်အဲ 'ဟာဂါ'။ ကေတ်မၞိဟ်ဗြဴဏံညိ၊ ဗြဴဏံလေဝ် ၜံၚ်ကဵုကောန်မာန်ဒၟံၚ် သွက်ပိုဲရောၚ်။”
ဟိုတ်ဂှ်ရ အာဗြာမ်ဝွံ ထပ်တဲကဵု 'ဟာဂါ'ရ။ ဟာဂါဝွံ ၜံၚ်ဂွံကောန်တြုံမွဲတုဲ အာဗြာမ်လေဝ် တၚ်ယၟု 'ဣသှမေလ'ရ။သာရာဲဝွံ စိုတ်ၚံက်လ္တူ ဟာဂါရ။ အခိၚ် ဣသှမေလ ပေၚ်အယုက် စှ်ပိသၞာံဂှ် ကျာ်ဟီုအရေဝ်ကဵုအာဗြာမ်မွဲဝါပၠန်ရ။
ကျာ်ဝွံ “အဲဒှ်တၠဣဓိအနန္တကျာ်ဂမျိုၚ်ရ။အဲ ကဵုဗှ်ေစွံကတ္တိကမွဲဏောၚ်။” ဟီုတုဲအာဗြာမ်လေဝ် အောပ်မာလ္တူတိဂှ်ရ။ ကျာ်လေဝ်ဟီုကဵုအာဗြာမ် “မၞးဂှ် ဒှ်အပါ ဂကူမၞိဟ်ဂမၠိုၚ်တံရောၚ်။ မၞးကဵုကောန်စဴကောန်စေက်မၞးတံဝွံ အဲကဵုပိုၚ်ပြဳတိခါနာန်ဂှ်တုဲ အဲဂှ်လေဝ် ဒှ်ကျာ်မၞးတံလၟိုန်ကာလရောၚ်။ဇၟာပ်မၞိဟ်တြုံ ပ္ဍဲဂကူကလောဝေါၚ်သမၞးတံလေဝ် ဒးရေက်တၞုၚ်သၞာံသီုဖအိုတ်ရောၚ်။”
"ဗြဴမၞးသာရာဲဝွံ ဂွံကောန်တြုံမွဲရောၚ်။ ကောန်တြုံဂှ် ဒှ်ကောန်ဂတိရောၚ်။ ဒးတၚ်ယၟု ဣဇက်ရ။ကတ္တိကအဲဂှ် အဲကဵုဣဇက််တုဲ ညးဂှ် အဲကဵုဒှ်ကၠုၚ်ဂကူဇၞော်မွဲရောၚ်။ ဣသှမေလဂှ်လေဝ် အဲကဵုဒှ် ဂကူဇၞော်မွဲကီုရောၚ်။ ဆမ္ဂး ကတ္တိကအဲဂှ် ကဵုတန်ပ္ဍဲဣဇက်မွဲ ဟေၚ်ရ ။” တုဲဂှ် ယၟုအာဗြာမ်ဂှ် ကျာ်ပြံၚ်လှာဲ "အာဗြဟာမ်"ရ။ အဓိပ္ပါဲဂှ် ဒှ် “အပါမၞိဟ်ဂမၠိုၚ် "ရ။ ယၟုသာရာဲဂှ်လေဝ်ကျာ်ပြံၚ်လှာဲ “သာရာ"တုဲ အဓိပ္ပါဲသာရာဂှ် ဒှ် "ကောန်သၟိၚ်ဗြဴ"ရ။
ပ္ဍဲတ္ၚဲဂှ်ရ အာဗြဟာမ်ဝွံ ပ္ဍဲသ္ၚိကၟိန်ဂကူဝေါၚ်သညးတေံမဒှ်ကောန်တြုံသီုဖအိုတ်ဂှ် ရေက်တၞုၚ်သၞာံရ။ လအ်ကၠုၚ်မွဲသၞာံတုဲ အာဗြဟာမ်ပေၚ်အယုက် ကၠံသၞာံတုဲ သာရာလေဝ် ပေၚ်အယုက်ဒစိတ်စှ်ောရ။ သာရာဝွံ သၠးဂွံကောန်တြုံမွဲ သွက်အာဗြဟာမ်ရ။ အတိုၚ်ကျာ်ဗ္ကန်လဝ်ဂှ် ညးတံတၚ်ကဵုယၟု "ဣဇက်"ရ။
အခိၚ်ဣဇက် အယုက်ဍောတ်မံၚ်ဏီဂှ်၊ ကျာ်စံၜတ် စိုတ်ပ္တေဟ် အာဗြဟာမ်တုဲ ဟီု ဂး"ကောန်မၞးဣဇက်ဂှ်ကေတ်တုဲ သွက်အဲဂှ် ပူဇဴညိ။” အာဗြဟာမ်လေဝ် ကလၚ်အရေဝ်ကျာ်မွဲဝါပၠန်တုဲ သွက်ဂွံပူဇဴဣဇက်ဂှ် ပလေဝ်ပလေတ်လဝ်ရ။
အာဗြဟာမ်ကဵုဣဇက်ဝွံ ဂွံပူဇဴယတ်ဂှ်တိတ်ကၠုၚ်တုဲ အဃောကွာ်ကၠုၚ်ဒၟံၚ်ဂှ် ဣဇက်သၟာန် “အပါ၊ သွက်ဂွံပူဇဴယတ်ဂှ် အောဟ်နွံရ၊ ဆဂးသဵုသၟတ်ဂှ် အလဵုရော?။” အာဗြဟာမ်လေဝ် “ ကောန်အဲ၊ သဵုသၟတ်သွက်ဂွံပူဇဴဂှ် ကျာ်ပလေဝ်ပလေတ်ကဵုရောၚ်။”
အခိၚ်ညးတံစိုပ်ကၠုၚ် ဒၞာဲပူဇဴယတ်ဂှ်၊ အာဗြဟာမ် စန်ဒက်ဣဇက်တုဲ သတိက်လဝ်လ္တူ ပၞၚ်ယတ်ဂှ်ရ။ အဃောအာဗြဟာမ် ကြပ်ဂစိုတ်ကောန်ညးတေံဂှ် ကျာ်ဟီုပၟိၚ် “ဒေံါစမ်! လ္ပကဵုဒးကောန်ၚာ်ဂှ်ညိ! လၟုဟ်မၞးဖေက်အဲဂှ်အဲတီယျ၊ မူဟိုတ်ရောမ္ဂး သွက်အဲမ္ဂးကောန်မၞးနွံဒၟံၚ်ဆမွဲဂှ် မၞးဟွံဂိုၚ်စွံရ။”
အာဗြဟာမ်ဝွံ သဵုခက်ဒၟံၚ်ပ္ဍဲအုပ်ခြုံ ဗ္ဒာဲဂှ်ညာတ်ရ။ စၞးဂွံပူဇဴဣဇက်ဂှ် ကျာ်ပြုပြေၚ်လဝ်ကဵု သဵုကၟက်ဂှ်ရ။ အာဗြဟာမ်ဝွံ ကေတ်သဵုကၟက်ဂှ်တုဲပူဇဴမိပ်ပ်ဇြိပ်ပ်ရ။
တုဲပၠန် ကျာ်ဟီုကဵုအာဗြဟာမ် “ၜိုန်ရကောန်ဗှ်ေနွံဒၟံၚ်ဆမွဲကီုလေဝ် သွက်ဂွံကဵုအဲဂှ် စိုတ်ဆန္ဒဗှ်ေနွံမံၚ်ရ။ ဟိုတ်ဂှ်ရ သွက်ဂွံကဵုမ္ၚဵုမၚ်္ဂလကဵုဗှ်ေဂှ် အဲကဵုဂတိရောၚ်။ ကောန်စဴကောန်စေက်မၞးဝွံ ဂၠိုၚ်လောန်နူသၞံၚ်လ္တူအကးရောၚ်။ မူဟိုတ်ရောမ္ဂး မၞးဝွံကလၚ်အရေဝ်အဲတုဲ ကောန်ကၟိန်နွံဒၟံၚ်ပ္ဍဲလောကဏံသီုဖအိုတ်တံဝွံ နကဵုကောန်ကၟိန်မၞးဂှ်ဂွံဒုၚ်မ္ၚဵုမၚ်္ဂလအိုတ်ရောၚ်။”
ပုံသၠပတ်သမ္မာ : သၠပတ်ပထမကဝ် ၁၆-၂၂