၁၇။ တၚ်တုပ်စိုတ် ကျာ်ကဵုဍာဝိက်
သှဝ်လုဝွံ ပ္ဍဲကဵုဂကူဣသရေလဂှ် မဒှ်ဨကရာတ်ကၠာအိုတ်ရ။ ညးဝွံ ရုပ်သာ်ဂေါဝ်ဆာဲသၠုၚ်ဒၟံၚ်တုဲ ဗီုပြၚ်ကောန်ဍုၚ်ကောန်ကွာန်တံ နွံပၟိက်ဂှ်ရ။အခိၚ်ကၠာတေံဂှ် သှဝ်လုဝွံ ညံၚ်ရဴဨကရာတ်ခိုဟ်မွဲဂှ် အုပ်ဓုပ်ဂကူဣသရေလတံရ။စိုပ်အခိၚ်လက်ကြဴမ္ဂး ဒှ်ကၠုၚ်ဨကရာတ်ယုတ်မာတုဲ ဟွံကလၚ်အရေဝ်ကျာ်ရ။ သာ်ဂှ်ရ အခိၚ်မွဲတ္ၚဲ ဒၞာဲသှဝ်လုဂှ် ကျာ်ရုဲကံက်ဨကရာတ်တၞဟ်ရ။
ဨကရာတ်သှဝ်လုတုဲ နူကဵုဂကူဣသရလေဂှ် ကျာ်ရုဲကံက်ဗၠာဲသၟတ် မနွံယၟုဍာဝိက်မွဲရ။ ညးတေံဂွံသ္ပဨကရာတ်ဂကူဣသရေလဂှ် ရုဲကံက်လဝ်ရ။ ဍာဝိက်ဝွံ ပ္ဍဲဍုၚ်ၝေသလိမ်ဂှ် ဒှ်မၞိဟ်မၚ်သဵုရ။အခိၚ်မၚ်ဒၟံၚ်သဵုအပါဂှ် ဍာဝိက်ဂစိုတ်ထောံ ဇာဒိသိုၚ်၊ ကၟီကၠိက်၊ သၞကၠုၚ်ကိတ်သဵုသ္ကအ်တံဂှ်ရ။ ဍာဝိက်ဝွံ စိုတ်သဝ်တုဲ သ္တပ်လ္ဂူရ။ ဍာဝိက်ဝွံ ပ္တေဟ်ကျာ်တုဲ ကလၚ်အရေဝ်ကျာ်ရ။
ဍာဝိက်ဝွံ ၜိုန်ရဒှ်ဒၟံၚ် ဗၠာဲသၟတ်မွဲကီုလေဝ် ဗ္တိုက်ကဵု မၞိဟ်မနွံယၟုဂေါလျာတ်ဇြဟတ်ဇၞော်ဂှ်ရ။ဂေါလျာတ်ဝွံ ဆဵုဂဗကွတ်ပၞာန်နွံတုဲ သၠုၚ်တဴ တြဴဟတ်မွဲဍရ။ကျာ်ဝွံ ဂွံဟံၚ်ပြာ်မၞိဟ်ဣသရေလတံဂှ် ရီုဗၚ်ဍာဝိက်တုဲ ဂစိုတ်ဂေါလျာတ်ရ။ ဒါဝိက်ဝွံ အံၚ်ဇၞးပၞာန် လ္တူသၞတံဗွဲမဂၠိုၚ်ရ။ ဍာဝိက်ဒှ်ကၠုၚ်မၞိဟ်ဇၞော်ပၞာန်တုဲ ပ္ဍဲပေဲါဗ္တိုက်ဗွဲမဂၠိုၚ်ဂှ် ဒှ်က္ဍိုပ်သ္ကိုပ်ပၞာန်ရ။ မၞိဟ်ဂမၠိုၚ်တံလေဝ် ထိုၚ်သးဍာဝိက်ရ။
ဟိုတ်နူမၞိဟ်ဣသရေလတံ ဆာန်ဒါဝိက်တုဲ ဨကရာတ်သှဝ်လုစိုတ်ၚံက်ကၠုၚ်ရ။ ဨကရာတ်သှဝ်လုဝွံ မိက်ဂွံဂစိုတ်ဒါဝိက်မ္ဂး ဒါဝိက်အောပ်ထောံဨကရာတ်သှဝ်လုရ။ မွဲတ္ၚဲဂှ် သှဝ်လုဝ်ကဵုကောန်ပၞာန်တံ ဂွံဂစိုတ်ဒါဝိက်ဂှ် ဂၠာဲဒၟံၚ်ရ။ ဒါဝိက်လေဝ် ဂြိပ်တိတ်နူကဵုသှဝ်လုတုဲ အောပ်ဒၟံၚ်ပ္ဍဲထီုတၟံရ။ သှဝ်လုဂၠာဲဒၟံၚ်ပ္ဍဲထီုတၟံဂှ်ကီုလေဝ် ဟွံဆဵုဍာဝိက်ရ။ ဒါဝိက်ဝွံ နွံလက်ကြဴသှဝ်လုတုဲ ၜိုန်ရအခေါၚ်ဂစိုတ်သှဝ်လုနွံဒၟံၚ်ကီုလေဝ် ဟွံဂစိုတ်ရ။ ဍာဝိက်ရေက်ကေတ်တၞုၚ်ယာတ်သှဝ်လုမွဲဒကုတ်တုဲသီကေတ်လဝ် ယာတ်ရ။ မူဟိုတ်မ္ဂး ညးဝွံ သွက်ဂွံဒှ်ကၠုၚ်ဨကရာတ်ဂှ် ဟွံဂစိုတ်သှဝ်လုတုဲ ဂွံထ္ၜးသက်သဳဂှ် ကေတ်လဝ်ယာတ်ဒကုတ်ဂှ်ရ။
လက်ကြဴဂှ် သှဝ်လုချိုတ်အာပ္ဍဲပေါဲဗ္တိုက်ပၞာန်ဂှ်တုဲ ဍာဝိက်ဒှ်ကၠုၚ်ဨကရာတ်ဂကူဣသရေလတံရ။ ဍာဝိက်ဝွံ ဒှ်ဨကရာတ်ခိုဟ်မွဲတၠတုဲ ကောန်ဍုၚ်ကွာန်တံဆာန်ညးတေံရ။ ကျာ်ကဵုဍာဝိက်မ္ၚဵုမၚ်္ဂလတုဲ ကဵုညးတေံအံၚ်ဇၞးရ။ ဍာဝိက် ဗ္တိုက်ပေဲါပၞာန်ဗွဲမဂၠိုၚ်တုဲ ကျာ်ရီုဗၚ် ဂွံအံၚ်ဇၞးသၞတံရ။ ဍာဝိက်ဝွံ သီကေတ်ဍုၚ်ယေရုသလေၚ်တုဲ သ္ပဍုၚ်ဂကူဣသရေလတံရ။အခိၚ်ဍာဝိက်အုပ်ဓုပ်ဒၟံၚ်ဍုၚ်ဂှ် မၞိဟ်ဣသရေလတံဝွံ သြဇာအဝဵုဇၞော်တုဲ ထဝ်သြန်ပေၚ်ကၟိုဟ်ဒၟံၚ်ရ။
ဨကရာတ်ဍာဝိက်ဝွံ သွက်ဂွံသြိုၚ်ပ္တန်လွဳမာန် ဒၞာဲမၞိဟ်ဣသရေလသီုဖအိုတ်ဂွံလ္ၚောဝ်ကျာ်ဂှ် ပၟိက်နွံဒၟံၚ်ရ။ မူဟိုတ်မ္ဂး တာဲမဝ်သှေသြိုၚ်လဝ်ကဵုညးတံဂှ် သ္ပဝတ်ကျာ် လအ်ကၠုၚ် ပန်ကၠံ သၞာံရ။
ပရောဗက် 'နာထာန်'ဂှ် ကျာ်ပလံၚ်ကဵုပ္ဍဲဨကရာတ်ဒါဝိက်တုဲကဵုသတိရ။ "ဟိုတ်နူဗတိုက်ကၠုၚ်ပေဲါပၞာန်ဗွဲမဂၠိုၚ်တုဲ သွက်လွဳမာန်အဲဂှ်မၞးဟွံဂွံသိုၚ်ပုဟ်။ ကောန်မၞးဂှ် ဒးသြိုၚ်ရောၚ်။ ဆမ္ဂး အဲကဵုမၞးမ္ၚဵုမၚ်္ဂလရောၚ်။ ပ္ဍဲကဵု မဇမၞး မၞိဟ်မွဲတၠဂွံဒှ်ဨကရာတ်ဂှ် အဲရုဲကံက်တုဲ ကဵုပိုၚ်ပြဳ မၞိဟ်အဲလအိတ်တဝဵုရောၚ်"။ အဆက်ကောန်ဇာတ်စှ်ေကၠုၚ်နူကဵုဒါဝိက်ဂှ် ဒှ်မၞိဟ်အုပ်ဓုပ်ထာဝရ၊ဒှ်တၠညးဟံၚ်ပြာ်ရောၚ်။ မဒှ်တၠညးဟံၚ်ပြာ်ကျာ်ရုဲကံက်လဝ် မွဲဇကုဟေၚ် ဟံၚ်ပြာ်ဒုဟ်မၞိဟ်ပ္ဍဲလောကဏံရောၚ် ။
အခိၚ်ဒါဝိက်မိၚ်ဒးအရေဝ်ဂှ်တုဲ ဗွဲပြဟ် ထိုၚ်သးဂုန်ကျာ်ရ။ မူဟိုတ်ရောမ္ဂး ကျာ်ပ္တိုန်ဂုန်စရာဲညးတေံတုဲ ကဵုမ္ၚဵုမၚ်္ဂလဗွဲမဂၠိုၚ်ရ။ အရာဏံဂှ် ကျာ်ကၠောန်ကဵုအခိၚ်လဵုဂှ် ဒါဝိက်ဟွံတီပုဟ်။ ဆမ္ဂးဂှ် ကျာ်ကဵုလဝ်ဂတိမၞိဟ်ဟံၚ်ပြာ်က္ညစှ်ေကၠုၚ်ဏောၚ်ဂှ် မၞိဟ်ဣသရေလေတံမၚ်ဒၟံၚ်လ္ၚီသၞာံဒှ်ရ။
ဨကရာတ်ဍာဝိက်ဝွံ နကဵုသစ္စဓဝ်ဍာံဂှ် အုပ်ဓုပ်ကၠုၚ်သၞာံဗွဲမဂၠိုၚ်ရ။ဆမ္ဂး ဍာဝိက်စိုပ်အခိၚ်ဘဝလက်ကြဴအိုတ်ဂှ် ကၠောန်ဒုဟ်ဇၞော်ဇၞော်တုဲပၠန်ဂတးကျာ်ရ။
မွဲတ္ၚဲဂှ် ကောန်ပၞာန်ဨကရာတ်ဍာဝိက်တံဝွံ တိတ်အာဗ္တိုက်ပၞာန်ရ။ အခိၚ်ဗ္တိုက်ဒၟံၚ်ပၞာန်ဂှ် ဨကရာတ်ဒါဝိက်ဝွံ နူကဵုနန်ထဝ်ဂှ် ဆဵုညာတ် မၞိဟ်ဗြဴကျေဝ်ဂေါဝ်မွဲ ဟုံဒၟံၚ်ဍာ်ရ။ ယၟုမၞိဟ်ဗြဴဂှ် 'ၜါထယှေၜ'မဒှ်ရ။
ဨကရာတ်ဍာဝိက်ဝွံ စၞးဒးပဲါမုက်ဂှ် ဗၠးဏာမၞိဟ်မွဲတုဲ ဗြဴဂှ် ကဵုကော်နၚ်ပ္ဍဲနန်ရ။ ဨကရာတ်ဍာဝိက်ဝွံ တိက်ကဵုဗြဴဂှ်တုဲ ဗလံၚ်ဖျဴသ္ၚိရ။ လက်ကြဴဂှ် 'ၜါထယှေၜ' ပလံၚ်ပရိုၚ်ကဵုဨကရာတ်ဍာဝိက်ရ။ညးဝွံ မနွံဒၟံၚ်ကဵုဗုၚ်ရ။
တြုံ'ၜါထယှေၜ'ဂှ် ဒှ်'ဥရိယ'ရ။ ညးဝွံ ဒှ်ကောန်ပၞာန်စဳစောန်ဨကရာတ်ဍာဝိက်မွဲရ။ ဨကရာတ်ဍာဝိက်ဝွံ 'ဥရိယ'စဴသ္ၚိတုဲဂွံဒၟံၚ်ကရောံဗြဴဂှ်ကဵုဇြဟတ်ရ။ ဆမ္ဂး 'ဥရိယ' တၚ်ပါဲထောံရ။ သာ်ဂှ်ရ ဨကရာတ်ဍာဝိက်ဝွံ သွက်ဂွံဗ္တိုက်ပၞာန်ဂှ် ကလေၚ်ဗၠးဏာ'ဥရိယ'ပၠန်ရ။ သွက်ဥရိယဂွံချိုတ်ပ္ဍဲပေဲါဗ္တိုက်ဂှ် ဍာဝိက်ဗ္ကန်ဏာက္ဍိုပ်သ္ကိုပ်ပၞာန်ဂွံဗလးဏာဒၞာဲသၞဇြဟတ်ဇၞော်ဇၞော်ရ။
ဥရိယချိုတ်အာပ္ဍဲပၞာန်တုဲ ဨကရာတ်ဍာဝိက်ဝွံ သီကေတ်'ၜါထယှေၜ'ရ။ခြာဟွံလအ် 'ၜါထယှေၜ'ဝွံ ကလိဂွံ ကောန်ဍာဝိက်ရ။ဟိုတ်နူဨကရာတ်ဍာဝိက်ကၠောန်အရာဏံတုဲ ကျာ်ပၞောတ်တိတ်ရ။ သာ်ဂှ်ရ သွက်ဂွံလဴထ္ၜးကဵုဒုဟ်ဍာဝိက်ကၠောန်လဝ်ဂှ် ကျာ်ဗလးဏာပရောဗက်နာထာန်ရ။ဍာဝိက်လေဝ် ကလေၚ်ဂွံသံၚ်ဝေဂဒုဟ်ညးတေံတုဲ ကျာ်သၠးကဵုအခေါၚ်ရ။ အခိၚ်ဘဝဍာဝိက်သေဟ်ဒၟံၚ်ဂှ် ၜိုန်ရဒှ်ဒဒိုက်ကီုလေဝ် ညးတေံကလၚ်အရေဝ်ကျာ်တုဲ ဗက်လက်ကြဴကျာ်ရ။
ဟိုတ်နူဨကရာတ်ဍာဝိက်ကၠောန်လဝ်ဒုဟ်တုဲ ကျာ်ကလေၚ်သီကေတ် လမျီုကောန်ညးတေံရ။ အယုက်ဍာဝိက်သေဟ်ဒၟံၚ်ဂှ် ပြသနာဗွဲမဂၠိုၚ်ဒှ်ကၠုၚ်ပ္ဍဲသ္ၚိကၟိန်ညးတေံတုဲ အဝဵုသြဇာညးတေံလေဝ် ဇြဟတ်အောန်ကၠုၚ်ရ။ ၜိုန်ရဨကရာတ်ဍာဝိက်ဟွံကလၚ်အရေဝ်ကျာ်ကီုလေဝ် ကတိကျာ်ကဵုလဝ် လ္တူဨကရာတ်ဍာဝိက်ဂှ် ညးသစ္စနွံဒၟံၚ်ဏီရ။ လက်ကြဴဂှ် ဨကရာတ်ဍာဝိက်ကဵုၜါသှယှေၜ ဂွံကောန်တြုံမွဲရ။ ယၟုကောန်ဂှ် 'သှဝ်လမောန်'မဒှ်ရ။
ပုံသၠပတ်သမ္မာ : ဓမ္မရာဇာဝၚ်ပထမဝက် ၁၀-၁၉၊ ၂၄၊ ၃၁၊ ဓမ္မရာဇာဝၚ်ဒုတိယဝက် ၅၊ ၇၊ ၁၁-၁၂