၃၁။ နာဲယေသှုကွာ်လ္တူဍာ်

ယေသှုဝွံ ဗ္စဖာပ်မၞိဟ်မသုန်လ္ၚီတုဲ ဂွံကၠောံအာသြၚ်ကၟာမွဲလ္ပာ်တေံဂှ် ကဵုကောန်ကွးတံလုပ်ပ္ဍဲဂၠုၚ်ရ။ ကောန်ကွးတံတိတ်အာကဵုဂၠုၚ်တုဲ မၞိဟ်တံဂှ် ယေသှု ပလံၚ်ဖျဴသ္ၚိရ။ တုဲဂှ် ယေသှုဝွံ သွက်ဂွံရာဒနာမိက်ဂှ် တိုန်အာလ္တူဒဵုရ။ ညးဝွံ ပ္ဍဲလ္တူဒဵုဂှ် ရာဒနာမိက်ဒဵုကဵုတ္ၚဲဂၠုရ။

ပ္ဍဲအခိၚ်ဂှ် ကောန်ကွးတံဝွံ ဂစာန်ဒုန်ဂၠုၚ်ကီုလေဝ် ဟိုတ်နူကျာပိုတ်ဗွဲမလောန်တုဲ စိုပ်လ္ဒေါဝ်ကၟာဍာ်ဟေၚ်ရ။ ဗ္တံဂှ် လဇုဲအာတုဲ ညးတံဝွံ နွံဒၟံၚ်လ္ဒေါဝ်ကၟာဍာ်ဂှ်ရ။

ယေသှုဝွံ ရာဒနာမိက်တုဲ ဂွံကလေၚ်ဆဵုကဵုကောန်ကွးတံဂှ် ကလေၚ်စဴကၠုၚ်ရ။ညးဝွံ ဂွံစိုပ်ပ္ဍဲဂၠုၚ်ကောန်ကွးတံနွံဂှ် ကွာ်ကၠုၚ်လ္တူဍာ်ရ။

ကောန်ကွးတံလေဝ် ဆဵုညာတ်ယေသှုမ္ဂးဖေက်လကိုတ်တုဲ ထေၚ်ဟယျ ကလော်ရ။ ယေသှုလေဝ် ကောန်ကွးတံဖေက်ဒၟံၚ်ဂှ်တီတုဲ “ လ္ပဖေက်အိုတ်ညိ၊ မဒှ်အဲရ!” ဟီုကဵုကောန်ကွးတံရ။

တုဲဂှ် ပေတရုဝွံ “ တဳလဂုန် 'မဒှ်တဳလဂုန်ဍာံမ္ဂး ကွာ်လ္တူဍာ်တုဲ ဂွံစိုပ် ဒၞာဲတဳလဂုန်မာန်ဂှ် ပၟိၚ်ကဵုအဲညိ ”သာ်ဂှ်ဟီုတုဲ ယေသှုလေဝ် “ ကွာ်ကၠုၚ်! ”ဟီုကဵုပေတရုရ။

ပေတရုလေဝ် တိတ်ကၠုၚ်နူဂၠုၚ်ဂှ်တုဲ ဂွံစိုပ်ဗ္ဒာဲယေသှုဂှ် ကွာ်ကၠုၚ်လ္တူဍာ်ရ။ ကွာ်ကၠုၚ်ဂွံမွဲလစုတ်ဂှ် ပေတရုဝွံ ဟွံဗဵုယေသှုတုဲ ဗဵုဒၟံၚ်လပှ်ကျာမဇၞော်ကဵုဇြဟတ်ဂှ်ရ။

ပေတရုဝွံ ဖေက်လပှ်ကျာ်မဇၞော်ဂှ်တုဲ ဗၠိုက်စှ်ေပ္ဍဲဍာ်ရ။ ပေတရုလေဝ် “ တဳလဂုန်၊ ဟံၚ်ပြာ်အဲဍိက်ညိ!”လရိုအ်ကော်ရ။ ယေသှုကၠုၚ်တုဲ တံၚ်ပ္တိုန်ပေတရုမ္ဂး “ စိုတ်ပ္တေဟ်မၞးဂှ် အောန်ကွေံသိုအ်! မူဟိုတ် စိုတ်သံသယနွံဒၟံၚ်ရော?”ဟီုဂးရ။

ပေတရုကဵုယေသှုလုပ်အာပ္ဍဲဂၠုၚ်ဂှ်တုဲ ကျာလေဝ်ဒေါံအာဗွဲမပြဟ်ရ။ လပှ်လေဝ် သ္ၚိတ်ဇြအာကီုရ။ ကောန်ကွးတံဝွံ ဒှ်တဴအံသဝ်တုဲ “ တဳလပိုန်ဂှ် မဒှ်ကောန်ကျာ်ဍာံရ ”ဒုၚ်ဝန်ရေဟ်သေဟ်ယေသှုအိုတ်ရ။

ပုံသၠပတ်သမ္မာ : ခရေတ်ဝၚ်မာတ်သာဲ ၁၄း၂၂-၃၃၊ ခရေတ်ဝၚ်မာကု ၆း၄၅-၅၂ ၊ ခရေတ်ဝၚ်ယဝ်ဟာန် ၆း၁၆-၂၁