၃၄။ နာဲယေသှုလဴပုံတၞဟ်မွဲ

ယေသှုဝွံ အရာမဆေၚ်ကဵုသန်ထာန်ကျာ်ဂှ် နကဵုပုံပမာဗွဲမဂၠိုၚ် လဴထ္ၜးကဵုမၞိဟ်တံရ။ ပုံယေသှုဝွံ “ သန်ထာန်ကျာ်ဝွံ တုပ်ညံၚ်မရာဲတဵုလဝ်ပ္ဍဲဝါရ။ မရာဲဝွံ ဒှ်မဍောတ်အိုတ် ပ္ဍဲမသီုဖအိုတ်ဂှ် မၞးတံတီရ။

ဆမ္ဂးဂှ် မရာဲဝွံ ဇၞော်တိုန်မ္ဂး ပ္ဍဲကၠအ်ဥဒျာန်ဂှ် ဒှ်ကၠုၚ်တၞံဆုဇၞော်မွဲတၞံရ။ တၞံရာဲဝွံ ဇၞော်ခိုဟ်တုဲ ကၞာၚ်ဆုတံလေဝ် ဂၠိုၚ်ဒၟံၚ်ညံၚ်ရဴဂစေံတံဂွံဇူဒီုရ။

ပုံယေသှုမွဲပၠန်ဂှ် “ သန်ထာန်ကျာ်ဝွံ တုပ်ညံၚ်ကွာၚ်နှဲလဝ်ကဵုကွဲရ။ ဟိုတ်နူကွဲဂှ်တုဲ ကွာၚ်ဝွံ ဂဍအ်ဇၞော်တိုန်ကၠုၚ်ရ။ ”

“သန်ထာန်ကျာ်ဝွံ တုပ်ညံၚ်ထဝ်သြန်ပၞုက်လဝ်ပ္ဍဲဝါရ။ ထဝ်သြန်ညးမွဲမွဲပၞုက်လဝ်ဂှ် မၞိဟ်တၞဟ် ဆဵုတုဲမိက်ဂွံမ္ဂး ကလေၚ်တိုပ်ထောံပၠန်ရ။ တေံမၞိဟ်ဝွံ မိပ်သၠောၚ်တုဲ ပိုန်ဒြပ်သီုဖအိုတ်ဂှ် သွံတုဲရာန်ကေတ်တိဝါ ထဝ်သြန်နွံဒၟံၚ်ဂှ်ရ။”

“သန်ထာန်ကျာ်ဝွံ တုပ်ညံၚ် 'ဗၠဲ'မပြဲကီုရ။ဗၠဲဂှ်သၟာသွံရာန်မတ်မွဲ ဆဵုမ္ဂး ပိုန်ဒြပ်ညးသီုဖအိုတ်ဂှ် သွံတုဲ ရာန်'ဗၠဲ'ရ။”

ယေသှုလေဝ် သွက်မၞိဟ်ထေၚ်ဇၞော်ဇကုဇကုတုဲ ထေၚ်သောဲညးတၞဟ်တံဂှ် လဴထ္ၜးကဵုပုံမွဲပုံရ။ ပုံယေသှုဝွံ“ မၞိဟ်ၜါတၠနွံဒၟံၚ်ရ။ ညးၜါဝွံ သွက်ဂွံရာဒနာမိက်ဂှ် အာစိုပ်ဘာလွဳမာန်ရ။ မွဲတၠဂှ် ဒှ်မၞိဟ်ဗက်အခေါန်တုဲ မွဲပၠန်ဂှ် ဒှ်မၞိဟ်က္ဍိုပ်သ္ကိုပ်ဘာသာရ။

မၞိဟ်က္ဍိုပ်သ္ကိုပ်ဘာသာဝွံ “ တဳလဂုန် အဲဍိက်ဝွံ ညံၚ်ရဴမၞိဟ်တၞဟ်ဂှ် ဟွံကၠတ်၊ ဟွံလီလာန်၊ ဟွံမံၚ်ဗြဴဍောတ်တုဲ ဟွံတုပ်မၞိဟ်ဗက်အခေါန်ဂှ် တၚ်ဂုန်ရ၊”

“ အဲဍိက်ဝွံ လၟေၚ်သတ္တဟမၚ်သဳၜါဝါတုဲ အရာပိုန်ဒြပ်အဲနွံ စှ်ဆမွဲဆဂှ် ကဵုဒါန်ရ”သာ်ဂှ်ရာဒနာမိက်ရ။

ဆမ္ဂး မၞိဟ်ဗက်အခေါန်ဝွံ ဒတဴဒၟံၚ်သ္ၚောဲကဵု က္ဍိုပ်သ္ကိုပ်ဘာသာဂှ်ရ။ ညးဝွံ လ္တူအကာသလေဝ် ဟွံဂံၚ်လ္ၚာ်ရံၚ်ရ။ သြိုဟ်ညးဂှ်ၜုၚ်ကဵုတဲတုဲ “ တဳလဂုန်၊ အဲဍိက်ဝွံ ဒှ်ကောန်ဒုဟ်မွဲရ၊ သ္ပဂုန်တုဲ စွံမေတ္တာလတူအဲညိ ”သာ်ဂှ်ရာဒနာမိက်ရ။

တုဲဂှ်ယေသှုဟီုဂးရ။ “ ကျာ်ဝွံ ရမျာၚ်ရာဒနာမိက် မၞိက်ဗက်အခေါန်ဂှ်ကလၚ်တုဲ စၟတ်သမ္တီမၞိဟ်သ္တပ်လ္ဂူရ။ ဆမ္ဂးဂှ် ရမျာၚ်ရာဒနာမိက်မၞိဟ်က္ဍိုပ်သ္ကိုပ်ဘာသာဂှ် ကျာ်ဟွံစၟတ်သမ္တီရ။ကျာ်ဝွံ မၞိဟ်သၠုၚ်လဝ်မာနတံဂှ် ဖျဝ်ဖျေံတုဲ မၞိဟ်စိုတ်သဝ်တံဂှ် သၠုၚ်ပ္တိုန်ကဵုရောၚ်။”

ပုံသၠပတ်သမ္မာ : ခရေတ်ဝၚ်မာတ်သာဲ ၁၃း၃၁-၃၃၊ ၄၄-၄၆၊ ခရေတ်ဝၚ်မာကု ၄း၃၀-၃၂၊ ခရေတ်ဝၚ်လုကာ ၁၃း၁၈-၂၁၊ ၁၈း၉-၁၄၊