၃၆။ ပြံၚ်လှာဲဗီုပြၚ်
မွဲတ္ၚဲဂှ် ယေသှုဝွံ ကော်ကောန်ကွး ပေတရု၊ ယျာကုက်ကဵု ယဝ်ဟာန်ပိတံတုဲ ဂွံရာဒနာမိက်ဂှ် တိုန်အာလ္တူဒဵုသၠုၚ်ရ။( ယဝ်ဟာန်ဏံဝွံ ယဝ်ဟာန်ကဵုၜါတ္တိဇာံကဵုနာဲယေသှုဂှ်ဟွံသေၚ်)
အခိၚ်ယေသှုရာဒနာမိက်ဂှ် မုက်ညးဝွံ ညံၚ်ရဴလျးတ္ၚဲဂှ်တၟးဒၟံၚ်တုဲ ဗွိုက်လ္တက်လေဝ်တၟးဒၟံၚ်ရ။ ဗီုလျးတၟးဒၟံၚ်ဂှ် မၞိဟ်မွဲလေဝ် ကၠောန်ဟွံမာန်ရ။
တုဲဂှ် မဝ်သေကဵု ဗရောဗက်ဨလိယ မံက်တိုန်တုဲ ဟီုအရေဝ်ကဵုယေသှုရ။ ညးတံဝွံ ဒှ်မၞိဟ်ဂျိုၚ်ဒၟံၚ် လောန်ကၠုၚ်ကၠံစှ်ောသၞာံတေံဂှ် ရ။ညးတံဝွံ ဟီုဒၟံၚ်ပရူ ယေသှုဒးဒုၚ်ဂစိုတ်ပ္ဍဲဍုၚ်ယေရုသလေၚ်ဂှ်ရ။
ညးတံဟီုဒၟံၚ်အရေဝ်ဂှ် ပေတရုညာတ်တုဲ စိုတ်မိပ်သၠောၚ်မ္ဂး “ ဒၞာဲဏံဂှ် သွက်ဂွံမံၚ်ဂှ်ခိုဟ်ကွေံရ။ တဳလဂုန်နွံပၟိက်မ္ဂး သွက်တဳလဂုန် တာဲမွဲ၊ သွက်မဝ်သေဂှ် တာဲမွဲ၊ သွက်ဨလိယဂှ် တာဲမွဲ၊ သီုဖအိုတ်တာဲပိမဂှ် ပိုဲဍိက်တံသိုၚ်ခၞံကဵုရောၚ် “ ဟီုကဵုယေသှုရ။ ဆမ္ဂးပေတရုဝွံ မူညးဟီုလဝ်ဂှ် ဟွံတီရ။
အခိၚ်ပေတရုဟီုဒၟံၚ်ဂှ် မတ်ဗြဲလျးတၟးဝွံ စှ်ေ ကၠုၚ်ဗိုၚ်ဂေတ်ကွးတံတုဲ “ညးဝွံ ဒှ်မၞိဟ်အဲသ္ဍိက်မၠိက် ကောန်ဆာန်အဲရောၚ်”နူမတ်ဗြဲဂှ် ညးတံဂွံမိၚ်ရမျာၚ်ရ။ ကောန်တွးတံလေဝ် ဖေက်လကိုတ်တုဲ အောပ်မာဖျေံလ္တူတိအိုတ်ရ။
ယေသှုဝွံ လုက်ကောန်တွးတံကဵုတဲတုဲ “ က္တဵုညိ၊ လ္ပဖေက်အိုတ် ” ဟီုရ။ အခိၚ်ကောန်တွးတံကလေၚ်ရံၚ်ဂှ် ဆဵုယေသှုမွဲဟေၚ်ရ။
ယေသှုကဵုကောန်တွးပိတၠတံဝွံ စှ်ေကၠုၚ် နူဒဵုရ။ယေသှုဝွံ “ ခြာဟွံလအ် အဲဒးဒုၚ်ဂမ္စိုတ်ရောၚ်၊ ကၠာအဲဟွံကလေၚ်ဂျိုၚ်နူဂမ္စိုတ်ဏီဂှ် အရာမၞးတံဆဵုညာတ်လဝ်ဒၞာဲဏံဂှ် လ္ပလဴကဵုမၞိဟ်တံညိ” ဗ္ကန်လဝ်ကဵုကောန်တွးတံရ။
ပုံသၠပတ်သမ္မာ : ခရေတ်ဝၚ်မာတ်သာဲ ၁၇:၁-၉၊ ခရေတ်ဝၚ်မာကု ၉:၂-၈၊ ၉: ၂၈-၃၆။