၇။ ကျာ်ကဵုမ္ၚဵုမၚ်္ဂလကဵုယျာကောပ်

ကောန်ၚာ်တံလေဝ် ဇၞော်တိုန်ကၠုၚ်ရ။ ယျာကောပ်ဝွံ မံၚ်ပ္ဍဲသ္ၚိဂှ် ဝါသနာနွံတုဲ ဨသောဝ် ဝွံ ဂၠာဲစသတ်ဂြိုပ်ဂှ် ဝါသနာနွံရ။ရေၜေကဝွံ ဆာန်"ယျာကောပ်"တုဲ ဣဇက်ဂှ် ဆာန် "ဨသောဝ်"ရ။

မွဲတ္ၚဲဂှ်၊ အခိၚ်ဨသောဝ်ကလေၚ်စိုပ်ကၠုၚ်နူဂၠာဲသတ်ဂြိုပ်တုဲ ဗျဵုထၚ်ကွေံရ။ ဨသောဝ် ဟီုကဵုယျာကောပ် " စၞစဗှ်ေကၠောန်လဝ်မွဲမွဲသာ်ဂှ် ကဵုအဲစညိ။” ယျာကောပ်လေဝ် "ကၠာအိုတ်ကဵုအဲဂတိမွဲ! မူဟိုတ်ရောတှ်ေ ဗှ်ေဂှ် ဒှ်ကောန်ဂၠုတုဲ စၞးဒၞာဲကောန်ဂၠုဂှ် ဗှ်ေဒးကဵုအဲသီုဖအိုတ်ရောၚ်"ဟီုရ။ တုဲဂှ် ဨသောဝ်ဝွံ ကဵုဂတိကဵုယျာကောပ်တုဲ ယျာကောပ်လေဝ် ကဵုစၞစရ။

ဣဇက်ဝွံ မိက်ဂွံကဵုဨသောဝ် မ္ၚဵုမၚ်္ဂလရ။ ဆမ္ဂး ကၠာညးဟွံဂွံကဵုမ္ၚဵုမၚ်္ဂလဏီဂှ် "ရေၜေက"တီတုဲ သွက်ဂွံသ္ပအဇာဒၞာဲဨသောဝ်ဂှ် "ရေၜေက"ကဵုယျာကောပ် လှေံလှန် ဣဇက်ရ။ ဣဇက်လေဝ်ဗျုတုဲ လညာတ်ဟွံကၠးရ။ သာ်ဂှ်တုဲ ယျာကောပ်ဝွံ ပ္ဍဲကအ်ကဵုတဲဂှ်ဂြောပ်သၞာံဗၜေံတုဲ လ္တက်ကဵုဂၠိက်ယာတ်ဨသောဝ်ရ။

ယျာကောပ်ဝွံ ကၠုၚ်ပ္ဍဲဣဇက်တုဲ " အဲဨသောဝ်စိုပ်ကၠုၚ်ယျ ကဵုအဲမ္ၚဵုမၚ်္ဂလညိ”အာတ်ကေတ်ရ။ အခိၚ်ဣဇက်ဂွံသၟူဗၜေံပ္ဍဲယာတ်ပလောံဂှ် ထေၚ်ဟယျ"ဨသောဝ်"တုဲကဵုမ္ၚဵုမၚ်္ဂလကဵုဣဇက်ရ။

ဟိုတ်နူယျာကောပ် ကၠတ်ကေတ်ဒၞာဲကောန်ဂၠုကဵုမ္ၚဵုမၚ်္ဂလညးတေံတုဲ ဨသောဝ်က္ဍုဟ်မၠေံယျာကောပ်ရ။ သာ်ဂှ်ရ အခိၚ်အပါညးတံချိုတ်အာတုဲ ဂွံဂစိုတ်ယျာကောပ်ဂှ် ဨသောဝ်စဳဇန်လဝ်ရ။

ဆမ္ဂး ရေၜေကဝွံ တီအာအစဳဇန်ဨသောဝ်ရ။ ဟိုတ်ဂှ်ရ ရေၜေကကဵုဣဇက်တံဝွံ ပလံၚ်ဏာယျာကောပ် ဒၞာဲမသ တံနွံဂှ်ရ။

ယျာကောပ်ဝွံ မံၚ်ဒၟံၚ်ကရောံ မသ"ရေၜေက"ဂှ် ဂၠိုၚ်ကဵုသၞာံရ။ အခိၚ်ဂှ် ယျာကောပ်လေဝ်စှ်ေဒၞာဲဂှ်တုဲ ဂွံကောန်တြုံစှ်ၜါကဵုကောန်ဗြဴမွဲရ။ ပိုန်ဒြပ်ဗွဲမဂၠိုၚ်ဂှ်လေဝ် ကျာ်ကဵု ယျာကောပ်ရ။

ယျာကောပ်သ္ၚောဲဒၟံၚ်ကဵုသ္ၚိပ္ဍဲဍုၚ်ခါနာန်ဂှ် လအ်ကၠုၚ်ၜါစှ်ောသၞာံတုဲ ယျာကောပ်ကလေၚ်စဴကၠုၚ်သ္ၚိပ္ဍဲဍုၚ်ခါနာန်ဂှ် သီုကဵုသ္ၚိကၟိန်ညးတေံ၊ သီုကဵုကောန်ရဲကဵုသတ္တိရစ္ဆာန်လွဳလဝ်သီုဖအိုတ်ရ။

ယျာကောပ်ဖေက်ဒၟံၚ်ရ။မူဟိုတ်ရောမ္ဂး ညးတေံထေၚ်ဟယျမံၚ်ဨသောဝ်ဂှ် မိက်ဂွံဂစိုတ်မံၚ်ညးတေံဏီရ။ သာ်ဂှ်ရ ယျာကောပ်ဝွံသတ္တိရစ္ဆာန်လွဳလဝ်ဗွဲမဂၠိုၚ် နကဵုပြၚ်တဲဂှ် ပလံၚ်ဏာကဵုဨသောဝ်ရ။ကောန်လိၚ် ပလံၚ် သတ္တိရစ္ဆာန်လေဝ် ဟီုကဵုဨသောဝ် “ ယျာကောပ် ကဵုနၚ်ပြၚ်တဲ သတ္တိရစ္ဆာန်ဏံရ။ ခြာဟွံလအ် ညးကၠုၚ်ဏောၚ်။”

ဆမ္ဂး ဨသောဝ်ဝွံ ဟွံမိက်သ္ပသၞကဵုယျာကောပ်ရ။ စၞးဂှ် ဂွံဆဵုယျာကောပ်မွဲဝါပၠန်ဂှ် ညးတေံမိပ်စိုတ်ဗွဲမလောန်ရ။ ယျာကောပ်လေဝ် ဂွံမံၚ်ပ္ဍဲဍုၚ်ခါနာန်ဂှ် ၜိုဟ်ဟ်သြိုဟ်ဟ်ရ။ ဣဇက်ချိုတ်အာတုဲ ယျာကောပ်ကဵုဨသောဝ်တိုပ်ထောံညးရ။ ကတ္တိက ဂတိကျာ်ကဵုလဝ်အာဗြဟာမ်ဂှ် လၟုဟ်ဝွံ နူလ္တူဣဇက်ဂှ်စိုပ်ကၠုၚ်လ္တူယျာကောပ်ရ။

ပုံသၠပတ်သမ္မာ : သၠပတ်ပထမကဝ် ၂၅း၂၇-၃၅း၂၉