၂၁။ မဒှ်တၠညးဟံၚ်ပြာ်ပ္ဍဲကတိကျာ်ထာဝရ
ကျာ်ဝွံ နူအခိၚ်က္တဵုပဒှ်လဝ်ဂၠးတိတုဲ လအ်ကၠုၚ်ညိမ္ဂး ဒးဗၠးကဵုတၠညးဟံၚ်ပြာ်ရောၚ်ဂှ် တီဒၟံၚ်ရ။ ကျာ်ဗၠးကဵုတၠညးဟံၚ်ပြာ်ရောၚ်ဂှ်ကကဵုလဝ်ကတိ'အာဍာံကဵုဨဝ'ရ။ တၞောဝ်ဒတောဝ်ဨဝဝွံ ဗုတ်က္ဍိုပ်ဇြုံရောၚ်ဂှ် ကျာ်ဟီုပၟိၚ်လဝ်ရ။ ဇေတ်ဇေတ်တှ်ေ ဇြုံလှေံလှန်ဨဝဂှ် ဒှ်စာတန်ရ။ အဓိပ္ပဲါကျာ်ဟီုဂှ် တၠညးဟံၚ်ပြာ်ဝွံ အံၚ်ဇၞးကေတ် စာတန်ဍိုက်က်ပေၚ်ၚ်ရောၚ်။
ကျာ်ဝွံ နကဵုအာဗြဟာမ်ဂှ် ဂကူမၞိဟ်ပ္ဍဲလောကသီုဖအိုတ်တံဂွံဒုၚ်စမ္ၚဵုမၚ်္ဂလရောၚ်ဂှ် ကဵုလဝ်ကတိရ။ ခြာဟွံလအ် တၠညးဟံၚ်ပြာ်က္ညစှ်ေမ္ဂး ကျာ်ဖဍိုက်ပေၚ်ကတိဂှ်ရောၚ်။တၠညးဟံၚ်ပြာ်ဝွံ ညးမနွံကဵုဒုဟ်ပ္ဍဲလောကသီုဖအိုတ်တံဂှ် ဟံၚ်ပြာ်ကဵုရောၚ်။
ကျာ်ဝွံအနာဂတ်ဏံပရောဗက်ညံၚ်ရဴမဝ်သေမွဲပလံၚ်နၚ်ရောၚ်ဂှ် ကဵုလဝ်ကတိကဵုမဝ်သေရ။ ညးဂှ် ဒှ်တၠညးဟံၚ်ပြာ်ရောၚ်။အရာဏံဝွံ ဒှ်ကတိ ဂွံပလံၚ်ကဵုတၠညးဟံၚ်ပြာ်မွဲဝါပၠန်ရ။
ကျာ်ဝွံ ပ္ဍဲကဵုအဆက်အဆေန်ဍာဝိက်ညးမွဲဂှ် ဒှ်ကၠုၚ်တၠညးဟံၚ်ပြာ်ရောၚ်ဂှ် ကဵုလဝ်ကတိရ။ တၠညးဟံၚ်ပြာ်ဝွံ ဒှ်ဨကရာတ်တုဲ အုပ်ဓုပ်မၞိဟ်တံလၟိန်ကာလရောၚ်။
ကျာ်ဟီုလဝ်ကဵု ပရောဗက်ယေရမိဂှ် မွဲတ္ၚဲညးစွံကတ္တိကတၟိပၠန်ရောၚ်။ ကတ္တိကတၟိဝွံ ဟွံတုပ်ကဵုကတ္တိကတြေံကျာ်ကဵုလဝ်မၞိဟ်ဣသရေလတံပ္ဍဲကဵုဒဵုသိဏာဂှ်ရ။ကတ္တိတၟိဝွံ သွက်မၞိဟ်တံဂွံတီဗီုပြၚ်ကျာ်ရ။ တုဲဂှ် မၞိဟ်တံဆာန်ကၠုၚ်ကျာ်တုဲကလၚ်ကၠုၚ်ဓဝ်သမ္မာရောၚ်။ကတ္တိကတၟိဂှ် ချူစွံလဝ်ပ္ဍဲကောန်စိုတ်ညးတံတုဲ မၞိဟ်တံဝွံ ဒှ်ကၠုၚ်ကောန်ကျာ်ရ။ကျာ်လေဝ်ဗၠးကဵုဒုဟ်ညးတံရ။ ကတ္တိကတၟိဝွံ စနူတၠညးဟံၚ်ပြာ်ရောၚ်။
ပရောဗက်တံဟီုပၟိၚ်လဝ်ဂှ် တၠညးဟံၚ်ပြာ်ဝွံ ယတ်ပရောဟိတ်လေဝ်ဒှ်၊ မၞိဟ်ဟီုကဵုအရေဝ်ကျာ်လေဝ်ဒှ်၊ ဨကရာတ်မွဲလေဝ်ဒှ်ကီုရ။ ညးဝွံ အရာမမိၚ်အရေဝ်နူထာန်ကျာ်ဂှ် လလောၚ်တြးကဵုမၞိဟ်တံပရိုၚ်ကျာ်ရ။ တၠညးဟံၚ်ပြာ်ဂှ် ဒှ်ပရောဗက်ခိုဟ်အိုတ်ရ။ ညးဝွံမိၚ်ပရိုၚ်ခိုဟ်နူထာန်ကျာ်တုဲ၊ အရာညးမကၠိုဟ်တီဂှ် ဗ္တောန်ဖျောန်ကဵုမၞိဟ်သီုဖအိုတ်တံရ။
ယတ်ပရောဟိတ်ဣသရေလတံဝွံ သွက်ဒုဟ်မၞိဟ်တံဂှ် ဆက်ပူဇဴဒၟံၚ်ကဵုကျာ်ရ။ ယတ်ဝွံ မဒှ်စဏးဒုဟ်ဒန်မၞိဟ်တံရ။ ယတ်ပရောဟိတ်တံလေဝ် သွက်မၞိဟ်တံဂှ် ရာဒနာမိက်ကဵုကျာ်ရ။ တၠညးဟံၚ်ပြာ်ဝွံ မဒှ်ယတ်ပရောဟိတ်သၠုၚ်အိုတ်တုဲ ညံၚ်နဲယတ်မခိုဟ်အိုတ်ဂှ် ဒုၚ်ပူဇဴဂန္ဓညးပ္ဍဲကျာ်ရ။ညးဝွံ ဟွံမွဲကဵုဒုဟ်ရ၊ နူအခိၚ်ညးဒုၚ်ဂမ္စိုတ်တုဲဂှ် မၞိဟ်တံဝွံ ဟွံဒးပူဇဴသွက်ဒုဟ်ဒန်ညးတံရ။
ဨကရာတ်မ္ဂးဂှ် မၞိဟ်အုပ်ဓုပ်ဍုၚ်လေဝ်ဒှ်၊ မၞိဟ်ဖျေံသၞောဝ်သ္တပ်လ္ဂူလေဝ်ဒှ်ရ။ မွဲအခိၚ်မွဲဝါမ္ဂး ညးတံကၠောန်ဗၠေတ်ဒၟံၚ်ဏီရ။ ဨကရာတ်ဍာဝိက်ဝွံ အုပ်ဓုပ်ဂကူသရေလသၟးရ။ ဆမ္ဂး တၠညးဟံၚ်ပြာ်ဝွံ 'မဇ'ဂကူဣသရေလကဵုပ္ဍဲဂၠးတိသီုဖအိုတ်ဂှ် အုပ်ဓုပ်လၟိုန်ကာလရောၚ်။ညးဝွံ အုပ်ဓုပ်နကဵုဓဝ်သ္တပပ်လ္ဂူတုဲဖျေံသ္ဂုတ်သွာတ် သ္ဍာံသၟတ်ရောၚ်။
ပရောဗက်တံဝွံ ဟီုပၟိၚ်လဝ်ပရူပရာတၠညးဟံၚ်ပြာ်ဗွဲမဂၠိုၚ်ရ။ ဥပ္ပမာမ္ဂးဂှ် ပရောဗက်'မာလခိ'ဝွံ ကၠာတၠညးဟံၚ်ပြာ်ဟွံက္ညကၠုၚ်ဏီဂှ် ပရောဗက်တၞဟ်တၞဟ်တံစိုပ်ကၠုၚ်ရောၚ်။ပရောဗက်'ဟေသှာဲယျ'လေဝ် တၠညးဟံၚ်ပြာ်ဂှ် သၠးဂဗ္ဘပ္ဍဲကဵုဝုတ်ကညှာရောၚ်။ပရောဗက်'မိခါ'ဝွံ တၠညးဟံၚ်ပြာ်ဂှ် ၜံၚ်ပ္ဍဲဍုၚ်ၝေသလိမ်ရောၚ်ဂှ် ဟီုဂးအိုတ်ရ။
ပရောဗက်'ဟေသှာယျ'ဟီုဂးဂှ် တၠညးဟံၚ်ပြာ်ဝွံ မံၚ်ဒၟံၚ်ပ္ဍဲရးဂါလိလဲတုဲ ညးဝွံ မၞိဟ်မနွံကဵုအောန်စိုတ်တံဂှ် ကဵုပြေစိုတ်ရောၚ်။ ကောန်ထံၚ်တံဂှ်လေဝ် ကဵုဗၠးၜးရောၚ်။ တၠညးဟံၚ်ပြာ်ဝွံ ဗၠးကဵုမၞိဟ်ယဲတံတုဲ မၞိဟ်က္တောဝ်ဟွံမိၚ်၊မတ်ဟွံညာတ်၊ မၞိဟ်ဟီုအရေဝ်ဟွံဂွံ၊မၞိဟ်ကွာ်ဟွံဂွံတံဂှ်လေဝ် ကဵုဗၠးရ။
ပရောဗက်'ဟေသှာဲယျ'ဟီုပၠန်ဂှ် မၞိဟ်တံဝွံက္ဍုဟ်မၠေံတၠညးဟံၚ်ပြာ်တုဲ ဂွံဒုၚ်တဲဂှ်တၚ်ပဲါညးရောၚ်။ပရောဗက်'ဇာခရိ'ဟီုဂးဂှ် မိသဟာဲတၠညးဟံၚ်ပြာ်ဝွံ နူကဵုမၞိဟ်တၞဟ်ဟ်ဂှ် ဒုၚ်ကေတ်သြန်ပိစှ်ေဂတှ်ေတုဲ ဖံက်သစ္စလ္တူညးရောၚ်။ပရောဗက်တၞဟ်ဟ်တံလေဝ် မၞိဟ်တံဝွံ ဂစိုတ်တၠညးဟံၚ်ပြာ်တုဲ ယာတ်ပလောံဂှ်လေဝ် ဝေၚ်လံၚ်စရောၚ်ဂှ် ဟီုပၟိၚ်လဝ်ရ။
ပရောဗက်တံလေဝ် တၠညးဟံၚ်ပြာ်ဗီုလဵုချိုတ်ဂှ် ဟီုလဝ်တုဲရ။ပရောဗက်'ဟေသှာဲယျ'ဟီုလဝ်ဂှ် မၞိဟ်တံဝွံ သ္ပပရေံတၠညးဟံၚ်ပြာ်တုဲတက်ဂဗး၊ချဟ်ကဵုဍာ်ပါၚ်ရောၚ်။ ၜိုန်ရညးဟွံကၠောန်လဝ်ဒုဟ်ကီုလေဝ် မၞိဟ်တံထပက်ကဵုနုဟ်တုဲ ပျဲပျာံဒဵုကဵုချိုတ်ရောၚ်။
ပရောဗက်တံဟီုလဝ်ဂှ် တၠညးဟံၚ်ပြာ်ဝွံဟွံမွဲကဵုဒုဟ်တုဲ ဒှ်မၞိဟ်မဍိုက်ပေၚ်ရ။ ညးဝွံ ဟိုတ်နူကဵုဒုဟ်မၞိဟ်တံဗွဲမဂၠိုၚ်ဂှ် ဒးဒုၚ်စဳရေၚ်ဒုဟ်ရောၚ်။ အခိၚ်ညးချိုတ်အာတုဲဂှ် မၞိဟ်တံလေဝ် ဂွံမံၚ်ကရောံကျာ်ထာဝရ ၜိုဟ်ဟ်သြိုဟ်ဟ်ရ။ မူဟိုတ်ရောမ္ဂး တၠးညးဟံၚ်ပြာ်ဝွံ ဒးချိုတ် နကဵုပၟိက်ကျာ်ရောၚ်။
ပရောဗက်တံဟီုလဝ်ဂှ် ကျာ်ထာဝရဝွံ ကဵုအခေါၚ်တၠညးဟံၚ်ပြာ်ဂွံကလေၚ်ဂျိုၚ်တိုန်နူဂမ္စိုတ်ရ။ အရာဏံဂှ် မဒှ်အစဳဇန်ကျာ်သီုဖအိုတ်တုဲ ဒှ်ကတ္တိကတၟိရ။သာ်ဂှ်ရ ညးကလေၚ်ဟံၚ်ပြာ်မၞိဟ်ကၠောန်လဝ်ဒုဟ်တံဂှ်ရ။
ကျာ်ထာဝရဝွံ ပရူတၠညးဟံၚ်ပြာ်ဗွဲမဂၠိုၚ်ဂှ် တၟံက်ထ္ၜးလဝ်ကဵုပရောဗက်တံရ။ဆမ္ဂး အခိၚ်ပရောဗက်တံနွံဒၟံၚ်ဂှ် တၠညးဟံၚ်ပြာ်ဟွံက္ညကၠုၚ်ရ။ ပရောဗက်လက်ကြဴအိုတ်ဟီုတွံလဝ်ဂှ် လောန်ကၠုၚ်ပန်ကၠံသၞာံပြၚ်ပြၚ်တုဲ စိုပ်အခိၚ်မဍာံပြဂှ် ကျာ်ပလံၚ်ပစိုပ်ကဵုတၠညးဟံၚ်ပြာ်ပ္ဍဲလောကဏံရောၚ်။
ပုံသၠပတ်သမ္မာ : သၠပတ်သမ္မာပထမကဝ် ၃:၁၅၊၁၂:၁-၃၊ သၠပတ်တွံဓဝ် ၁၈:၁၅၊ ဓမ္မရာဇာဝၚ်ဒုတိယဝက် ၇၊ သၠပတ်အနာဂတ္တိယေရမိ ၃၁၊ သၠပတ်အနာဂတ္တိဟေသှာယျ ၅၉:၁၆၊ သၠပတ်အနာဂတ္တိဍာန်ယေလ ၇၊ သၠပတ်အနာဂတ္တိမာလခိ ၄:၅၊ သၠပတ်အနာဂတ္တိဟေသှာယျ ၇:၁၄၊ သၠပတ်အနာဂတ္တိမိက္ခာ ၅:၂၊ သၠပတ်အနာဂတ္တိဟေသှာယျ ၉:၁-၇၊၃၅:၃-၅၊၆၁၊၅၃၊သၠပတ်ဆာလာမ် ၂၂:၁၈၊၃၅:၁၉၊၆၉:၄၊၄၁:၉၊ သၠပတ်အနာဂတ္တိဇာခရိ ၁၁:၁၂-၁၃၊သၠပတ်အနာဂတ္တိဟေသှာယျ ၅၀:၆၊ သၠပတ်ဆာလာမ် ၁၆:၁၀-၁၁။