၁၆။ မၞိဟ်မဟံၚ်ပြာ်
ယဝ်သှုချိုတ်အာတုဲ မၞိဟ်ဣသရေလတံဟွံကလၚ်အရေဝ်ကျာ်ရ။ ညးတံဝွံ ဟွံကလၚ် ဓရ်ကျာ်တုဲ မၞိဟ်ခါနာနိသေဟ်ဒၟံၚ်ပ္ဍဲ'တိကတိ'ဂှ်လေဝ် ဟွံဒဍေၚ်ပ္တိတ်ရ။ မၞိဟ်ဣသရေလတံဝွံ ဒၞာဲဒးသ္ပဝတ်ကျာ်ဇုဇဗဴလ၊ ကျာ်မသ္ဍာံသၟတ်ဂှ် သ္ပဝတ်ကဵုကျာ်ခါနာနိတံရ။ မၞိဟ်ဣသရေလတံဝွံ သၟိၚ်ဨကရာတ်ဟွံမွဲတုဲ ဗီုဇကုထေၚ်ညာတ်ဂှ် ကၠောန်ကၠုၚ်အိုတ်ရ။
ဟိုတ်နူ မၞိဟ်ဣသရေလတံ ဟွံကလၚ်အရေဝ်ကျာ်ဂၠိုၚ်ကဵုသၞာံတုဲ သွက်ဒုဟ်ဒန်ဂှ် ကျာ်ကဵုအခေါၚ်သၞတံ ဂွံကေတ်ဇၞးညးတံရ။ တေံသၞတံလေဝ် နူကဵုဂကူဣသရေလဂှ် ကၠတ်ကပေါတ်ကညောတ်တံတုဲ ပလီုပလာ်ပိုန်ဒြပ်ကဵုသ္ၚိဗွဲမဂၠိုၚ်ရ။ သၞတံလေဝ် ဂစိုတ်မၞိဟ်ဣသရေလတံဗွဲမဂၠိုၚ်ရ။ ဟိုတ်နူတၚ်ပါဲဟွံကလၚ် အရေဝ်ကျာ်တုဲ သၞာံဗွဲမဂၠိုၚ်ကျာ်ကဵုဒုၚ်ပယဲခရ ပ္ဍဲသၞညးတံရ။ မၞိဟ်ဣသရေလတံလေဝ် ဟိုတ်နူဒုဟ်ညးတံဂှ် ဂွံသံၚ်ဝေဂမွဲအလန်ပၠန်တုဲ ဂွံဟံၚ်ပြာ်ဂှ် အာတ်မိက်ပ္ဍဲကျာ်ရ။
ဇၟာပ်အခိၚ် မၞိဟ်ဣသရေလတံဂွံသံၚ်ဝေဂ မ္ဂး ကျာ်လေဝ်ကလေၚ်ရီုဗၚ်ညးတံရ။ ကျာ်ဝွံ ဂွံဗ္တိုက်ကဵုသၞညးတံဂှ် ဗၠးနၚ်မၞိဟ်ဟံၚ်ပြာ်မွဲတၠတုဲ အံၚ်ဇၞးကေတ်သၞညးတံရ။ ဒၞာဲတိဂှ်လေဝ်ၜိုဟ်သြိုဟ်အာတုဲ မၞိဟ်မဟံၚ်ပြာ်ဝွံ အုပ်ဓုပ်မၞိဟ်တံရ။ ကျာ်ဝွံ ပလံၚ်ကဵု မၞိဟ်မဟံၚ်ပြာ်ဗွဲမဂၠိုၚ် သွက်ဂွံဟံၚ်ပြာ်မၞိဟ်တံရ။ မၞိဟ်မိဍယျာန်တံ ဂွံကေတ်ဇၞးမၞိဟ်ဣသရေလတံဂှ် ကျာ်ကဵုအခေါၚ်မွဲဝါပၠန်ရ။
မၞိဟ်မိဍယျာန်တံဝွံ မၞိဟ်ဣသရေလတံ ပကောံစွံလဝ်သြောံသွက်ထပှ်သၞာံဂှ် ကေတ်ဏာသီုဖအိုတ်ရ။ မၞိဟ်ဣသရေလတံလေဝ် ဖေက်လကိုတ်တုဲ အောပ်ဒၟံၚ်ပ္ဍဲထီုတုဲ မၞိဟ်မိဍယျာန်တံဂၠာဲညးတံဟွံဆဵုရ။ လက်ကြဴဂှ် ညးတံလရိုအ်ယာံကဵုကျာ်၊ သွက်ဂွံဟံၚ်ပြာ်ညးတံရ။
မၞိဟ်ဣသရေလ မနွံယၟုဂိဍောန်မွဲ နွံဒၟံၚ်ရ။ မွဲတ္ၚဲဂှ် ညးတေံပၠိန်ဒၟံၚ်သြောံ ပ္ဍဲကဵုဒၞာဲအောပ်ဒၟံၚ်မွဲဒၞာဲတုဲ မၞိဟ်မိဍယျာန်တံကၠတ်သြောံညးတံဟွံဂွံရ။ ကလုတ်အကာသကျာ်မွဲဂှ် ကၠုၚ်ပ္ဍဲဂိဍောန်တုဲ “၊ ကောန်ပၞာန်မနွံကဵုဇြဟတ်'ဂိဍောန်'၊ကျာ်နွံဒၟံၚ်ကရောံဗှ်ေရ။ ဟံၚ်ပြာ်မၞိဟ်ဣသရေလတံနူကဵု မၞိဟ်မိဍယျာန်ညိ။” ပၟိၚ်ရ။
အပါဂိဍောန်ဝွံ ဂွံပူဇဴပတ္တိမာရုပ်ဂှ် ပၞုက်လဝ်ပၞၚ်ယတ်မွဲရ။ ကၠာအိုတ် ကျာ်ဟီုကဵုဂိဍောန် ဂွံပလီုပလာ် ပၞၚ်ယတ်ဂှ်ရ။ ဆမ္ဂး ဂိဍောန်ဝွံ ဖေက်ဒၟံၚ်မၞိဟ်တံရ။ သာ်ဂှ်ရ ညးမၚ်ဒၟံၚ်ဒဵုကဵုစိုပ်အခိၚ်ဗ္တံတုဲ ပလီုပလာ်ပၞတ်ယတ်ဂှ်ဒကုတ်တ်ရ။ ဒၞာဲဂှ် ညးတေံကလေၚ်သိုၚ်ကဵုပၞၚ်ယတ်တၟိတုဲ ပူဇဴကျာ်ရ။
ပယဵုယးမွဲတ္ၚဲပၠန်ဂှ် ညးမွဲမွဲပလီုပလာ်လဝ်ပၞၚ်ယတ်ဂှ် မၞိဟ်တံဆဵုညာတ်တုဲ ဒေါသတိတ်ဗွဲမလောန်ရ။ ညးတံဝွံ ဂွံဂစိုတ်ဂိဍောန်ဂှ် အာပ္ဍဲသ္ၚိညးတေံရ။ ဆမ္ဂး အပါဂိဍောန်လေဝ် “ မူဟိုတ်မၞးတံ ဒစာန်ရီုဗၚ်ဒၟံၚ်ကျာ်မၞးတံရော?၊ ယဝ်ရညးဒှ်ကျာ်ဍာံမ္ဂး ဇကုညးဂှ် ကဵုညးဟံၚ်ပြာ်ညိ” ဟီုသာ်ဂှ်ရ။ မၞိဟ်တံလေဝ် ဟိုတ်နူအရေဝ်ဂှ် ဟွံဂစိုတ်ဂိဍောန်ရ။
တုဲဂှ် မၞိဟ်မိဍယျာန်တံဝွံ ဂွံကေတ်ပိုန်ဒြပ်မၞိဟ်ဣသရေလတံဂှ် စိုပ်ကၠုၚ်မွဲဝါပၠန်ရ။ လၟိဟ်မၞိဟ်မိဍယျာန်တံလေဝ် ဂၠိုၚ်ဒၟံၚ်ရိုဟ်ဟွံမာန်ရ။ ဂိဍောန်ဝွံ သွက်ဂွံဗ္တိုက်သၞတံဂှ် ပကောံမၞိဟ်ဣသရေလတံရ။ ဂိဍောန်လေဝ် အရာကိစ္စဏံကျာ်ရုဲကံက်လဝ် သွက်ဂွံချိုတ်ပၠိုတ်ဂှ် အာတ်နိမိတ်ၜါသာ်ရ။
နိမိတ်ပထမဝွံ ဂိဍောန်ကေတ်သၞာံသဵုမွဲဂတေဟ်တုဲ ဖျေံလဝ်လတူတိရ။ အခိၚ်နူဂယးလတိုပ်စှ်ေမ္ဂး "သၞာံသဵုဂှ်ကဵုဍုက်ဒၟံၚ်တုဲ တိဂှ်ကဵုသ္ကဟ်ဒၟံၚ်ညိ" ဟီုကဵုကျာ်သာ်ဂှ်ရ။ ကျာ်လေဝ် ကဵုဒှ်အရာဂှ်ရ။ မွဲဗ္တံပၠန် ညးတေံလေဝ် "တိဂှ်ကဵုဍုက်ဒၟံၚ်တုဲ သၞာံသဵုဂှ်ကဵုသ္ကဟ်ဒၟံၚ်ညိ" အာတ်မိက်မ္ဂး ကျာ်ကၠောန်ကဵုပၠန်ရ။ ဂွံဟံၚ်ပြာ်မၞိဟ်ဣသရေလတံ နူကဵုမၞိဟ်မိဍယျာန်တံဂှ် နကဵုနိမိတ်ၜါသာ်ကဵုချိုတ်ပၠိုတ် တုဲ ဂိဍောန်လေဝ် ပ္တေဟ်ကၠုၚ်ကျာ်ရ။
ဂိဍောန်ဝွံ သွက်ဂွံဗ္တိုက်ပၞာန်ဂှ် ကော်ကောန်ပၞာန်မ္ဂး ကောန်ပၞာန်'ပိလက်ၜါလ္ၚီ' စိုပ်ကၠုၚ်ရ။ ဆမ္ဂး ကျာ်ထာဝရဟီု လၟိဟ်မၞိဟ်ဂၠိုၚ်လောန်ကွေံရ။ သာ်ဂှ်ရ မၞိဟ်ဖေက်သွက်ဂွံဗ္တိုက်ပၞာန် "ၜါလက်ကဵုၜါလ္ၚီ"ဂှ် ကဵုကလေၚ်စဴသ္ၚိရ။ ကျာ်ထာဝရဝွံ လၟိဟ်မၞိဟ်ဂၠိုၚ်ဒၟံၚ်ဏီဂှ် ဟီုကဵုဂိဍောန်ရ။ သာ်ဂှ်ရ ဂိဍောန်ဝွံ မ္ၚးနူကောန်ပၞာန်ပိကၠံဂှ် ကဵုစဴသ္ၚိသီုဖအိုတ်ရ။
ဗ္တံဂှ် ကျာ်ဟီုပၟိၚ်ကဵုဂိဍောန် “စှ်ေအာဒၞာဲမၞိဟ်မိဍယျာန်တံတုဲ အရာညးတံဟီုဒၟံၚ်ဂှ်မိၚ်မ္ဂး သွက်ဂွံဗ္တိုက်ဂှ်ဟွံဒးဖေက်ပုဟ်”။ သာ်ဂှ်ရ ပယာံဗ္တံဂှ် ဂိဍောန်ဝွံစှ်ေအာ ဒၞာဲမၞိဟ်မိဍယျာန်တံဒၟံၚ်ဂှ်တုဲ ကောန်ပၞာန်မိဍယျာန်မွဲဂှ်လ္ပံညာတ်တုဲ လဴထ္ၜးဒၟံၚ်ကဵုရဲညးတေံဂှ် မိၚ်အာရ။ ရဲညးတေံလေဝ်“အဓိပ္ပဲါလ္ပံဂှ် ကောန်ပၞာန်ဂိဍောန်တံ အံၚ်ဇၞးကေတ်ကောန်ပၞာန်မိဍယျာန်တံရောၚ်” ဟီုသာ်ဂှ်ရ။ ဂိဍောန်မိၚ်သာ်ဂှ်မ္ဂး လ္ၚောဝ်ကျာ်ရ။
တုဲဂှ် ဂိဍောန်ဝွံ စဴကၠုၚ် ဒၞာဲကောန်ပၞာန်ညးတေံတုဲ ဇၟာပ်ဇၟာပ်ကောန်ပၞာန်တံဂှ် ကဵုလဝ် ခပဵု၊ ခၟာဲတိကဵု ပၟတ်ကသဴ မွဲမွဲစုံရ။ ကောန်ပၞာန်တံလေဝ် အခိၚ်ကောန်ပၞာန်မိဍယျာန်တံတိက်လှိၚ်ဒၟံၚ်ဂှ် ဗိုၚ်လဝ်တာဲအိုတ်ရ။ ပ္ဍဲကဵုခၟာဲတိဂှ် ကောန်ပၞာန်ဂိဍောန်ပိကၠံတံဝွံ စုတ်လဝ် ပၟတ်ကသဴတုဲ လျးပၟတ်ကသဴဂှ်ကောန်ပၞာန်မိဍယျာန်တံ ဟွံညာတ်ရ။
တုဲဂှ် ကောန်ပၞာန်ဂိဍောန်သီုဖအိုတ်တံဝွံ ထ္ကးဖျေံခၟာဲတိဂှ်ရ။ ဗွဲမပြဟ်ဂှ်ထ္ၜးလျး နူကဵုပၟတ်ကသဴရ။ ဗဂိုဟ်ခပဵုညးတံတုဲ “ဇြၚ်ကျာ်ထာဝရကဵုဂိဍောန်” ကရေဲအိုတ်ရ။
ကျာ်လေဝ် ကဵုမၞိဟ်မိဍယျာန်တံ ယှုက်ထုဲအိုတ်ရ။ မၞိဟ်မိဍယျာန်တံလေဝ် ညးမွဲကဵုညးမွဲ ကလေၚ်ဗ္တိုက်ညးသ္ကံတုဲ ဂစိုတ်အိုတ်ရ။ မၞိဟ်ဣသရေလနွံဒၟံၚ်ပ္ဍဲသ္ၚိတံဂှ်လေဝ် ကၠုၚ်ဗ္တိုက်မိဍယျာန်တံကီုရ။ ညးတံဂစိုတ်ထောံ မၞိဟ်မိဍယျာန်ဗွဲမဂၠိုၚ်တုဲ ဒဍေၚ်ပ္တိတ်နူကဵုတိဣသရေလသီုဖအိုတ်ရ။ တ္ၚဲဂှ် မၞိဟ်မိဍယျာန်တံ ချိုတ်အာ 'မွဲကိုတ်ၜါလက်'ရ။
မၞိဟ်ဂမၠိုၚ်တံဝွံ ဂိဍောန် ဂွံသ္ပဨကရာတ်ဂှ် ပၟိက်နွံရ။ ဂိဍောန်ဟွံမိက်သ္ပဨကရာတ်တုဲ ညးတေံသၟာန်ပရူထဝ်သြန် ဂွံနၚ်နူကဵုမၞိဟ်မိဍယျာန်တံရ။ မၞိဟ်ဣသရေတံလေဝ် ထဝ်သြန်ဗွဲမဂၠိုၚ်ဂှ် ကဵုဂိဍောန်ရ။
ဂိဍောန်ဝွံ သုၚ်စောဲထဝ်သြန်ဂှ်တုဲ ကၠောန်ယာတ်ပလောံပရောဟိတ်ခိုဟ်ဟ်ရ။ဆမ္ဂး မၞိဟ်ဣသရေလတံလေဝ် သ္ပယာတ်ပလောံဂှ် ညံၚ်ရဴပတ္တိမာရုပ်တုဲရေဟ်သေဟ်ကၠုၚ်ရ။ ဟိုတ်နူရေဟ်သေဟ်ပတ္တိမာရုပ်ဂှ်တုဲ ကျာ်ထပ်ကဵုဒုဟ်ဒန်ပၠန်ရ။ သၞတံဂွံကေတ်ဇၞးမၞိဟ်ဣသရေလဂှ် ကျာ်ကဵုအခေါၚ်ရ။ လက်ကြဴအိုတ် သွက်ဂွံရီုဗၚ်ဂှ် မၞိဟ်ဣသရေလတံထပ်ကော်ကျာ်မ္ဂး ကျာ်လေဝ် ဗလးကဵုမၞိဟ်ဟံၚ်ပြာ်ပၠန်ရ။
မၞိဟ်ဣသရေလတံ ကၠောန်ဒုဟ်မ္ဂး ကျာ်စဳရေၚ်ဒုဟ်ရ။ ညးတံကလေၚ်ဂွံသံၚ်ဝေဂတုဲ ဒုန်ဂုန်ကျာ်မ္ဂး ဂွံဗၠးၜးဂှ် ကျာ်ဗလးကဵု မၞိဟ်ဟံၚ်ပြာ်ရ။ ဗီုဏံဂှ် ဒှ်ဒၟံၚ်ဂၠိုၚ်ကဵုဝါရ။ ပ္ဍဲသၞာံဗွဲမဂၠိုၚ်ဂှ် ဂွံဟံၚ်ပြာ်မၞိဟ်ဣသရေလနူတဲသၞဂှ် ကျာ်ဗလးကဵုမၞိဟ်ဟံၚ်ပြာ်ဂမၠိုၚ်ရ။
လက်ကြဴအိုတ်ဂှ် မၞိဟ်ဣသရေလတံဝွံ အာတ်မိက်ပ္ဍဲကျာ်ရ။ ဂကူတၞဟ်တံဨကရာတ်နွံဒၟံၚ်ဂှ် ပ္ဍဲဂကူဣသရေလတံလေဝ်ဨကရာတ်ကီုနွံညိ။သွက်ဂွံသ္ပက္ဍိုပ်သ္ကိုပ်ပ္ဍဲပေါဲဗ္တိုက်ဂှ် နွံပၟိက်ဨကရာတ် 'ဇၞော်ဇၞော်သၠုၚ်သၠုၚ်'မွဲရ။ အရာညးတံအာတ်လဝ်ဂှ် ကျာ်ဟွံဒးစိုတ်ၜိုန်ဂှ်လေဝ် အတိုၚ်ညးတံအာတ်မိက်ဂှ် ကျာ်ကဵု ဨကရာတ်မွဲရ။
ပုံသၠပတ်သမ္မာ : သၠပတ်သမ္တီတၠသၞောဝ် ၁-၃၊ ၆-၈၊ ဓမ္မရာဇဝၚ်ပထမဝက် ၁-၁၀