၄၃။ စပ္တံကၠုၚ်သၚ်

ယေသှုက္ညတိုန်လ္တူဘုံအကာသတုဲ၊လက်ကြဴဂှ် ကောန်ကွးတံဝွံ အတိုၚ်ယေသှုဟီုပၟိၚ်လဝ်ဂှ် မၚ်ဒၟံၚ်ပ္ဍဲဍုၚ်ယေရုသလေၚ်ရ။ မၞိဟ်ပ္တေဟ်ယေသှုတံဝွံ ပကောံညးသ္ကအ်တုဲ ဟွံလအ်ဟွံလအ်ရာဒနာမိက်အိုတ်ရ။

ဇၟာပ်ပ်သၞာံ ပေဲါပဿခါတုဲဒှ်တုဲ လောန်ကၠုၚ်မသုန်စှ်ောတ္ၚဲဂှ် ဂကူယုဍတံဝွံ ကၠောန်ဗဒှ်ပေဲါပၟိက်ဇၞော် မကော်ခဴစ'ပေန်တေကုတ္တေ'ဂှ်ရ။ ပေဲါပေန်တေကုတ္တေဝွံ မဒှ်သဘၚ်သီသြောံဂကူယုဍတံရ။ ဂကူယုဍနွံဒၟံၚ် ပ္ဍဲဂၠးတိသီုဖအိုတ်တံဝွံ ဂွံကၠောန်ဗဒှ်ပေဲါ'ပေန်တေကုတ္တေ'ဂှ် ကၠုၚ်စိုပ်ပ္ဍဲဍုၚ်ယေရုသလေၚ်မွဲစွံအိုတ်ရ။အခိၚ်သၞာံယေသှုက္ညတိုန်ပ္ဍဲလ္တူဘုံအကာသလောန်ကၠုၚ်မွဲသတ္တဟတုဲဂှ် သ္ပပေဲါ'ပေန်တေကုတ္တေ'ရ။

မၞိဟ်ပ္တေဟ်ယေသှုတံဝွံ အဃောပကောံဒၟံၚ်ပ္ဍဲသ္ၚိမွဲစွံဂှ် ရမျာၚ်ညံၚ်ရဴကျာမေလံၚ် ပေၚ်တဴရ။ တုဲဂှ် လ္တူက္ဍိုပ်မၞိဟ်ပ္တေဟ်ယေသှုတံဝွံ ညံၚ်ရဴလတာ်ပၟတ်ဂှ် မံက်ကၠုၚ်တုဲတန်ဒၟံၚ်ရ။ ညးတံဝွံ ဍိုက်ပေၚ်ကဵုဝိညာန်မသ္အးဇ္ၚးတုဲ ထိုၚ်းသးဂုန်ကျာ်နကဵုအရေဝ်ဘာသာတၞဟ်တၞဟ်ရ။ ဝိညာန်မသ္အးဇ္ၚးဝွံ ညးတံဂွံဟီုအရေဝ်ဘာသာတၞဟ်တၞဟ်မာန်ဂှ် ကဵုလဝ်အခေါၚ်ရ။

မၞိဟ်ပ္ဍဲဍုၚ်ယေရုသလေၚ်တံဝွံ မိၚ်ရမျာၚ်ညာန်ဒၟံၚ်တုဲ ဂွံဗဵုအရာဒဒှ်ဂှ် စိုပ်ကၠုၚ်အိုတ်ရ။ မၞိဟ်ပ္တေဟ်ယေသှုတံလေဝ် ဟီုတွံဒၟံၚ်ပရူသန်ထာန်ကျာ်ထာဝရ နကဵုအရေဝ်ဘာသာတၟေၚ်ၚ်ဂှ် မၞိဟ်ဂမၠိုၚ်တံမိၚ်တုဲ ဒှ်တဴအံသဝ်အိုတ်ရ။

မၞိဟ်လ္ၚဵုတံဝွံ ထေၚ်ခယျညးတံဗ္ၜူဒၟံၚ်အရက်သုရာတုဲတၚ်ဒုဟ်ရ။ အခိၚ်ဂှ် ပေတရုက္တဵုတုဲ “အဲဟီုဂှ် ကလၚ်အိုတ်၊ တေံညးတံဂှ် ဗ္ၜူဒၟံၚ်အရက်သုရာဟွံသေၚ်!၊ ပရောဗက်'ယဝ်လ'ဟီုပၟိၚ်လဝ်ဂှ် တ္ၚဲလက်ကြဴအိုတ်ဝွံ ကျာ်စဝ်စရိုဟ်ဝိညာန်ညးရောၚ်ဂှ် လၟုဟ်ဍိုက်ပေၚ်ယျ”သာ်ဂှ်ကလေၚ်ဟီုကဵုညးတံရ။

"ယွံ၊ မၞိဟ်ဣသရေလ! နကဵုဣဓိကျာ်ထာဝရဂှ် နာဲယေသှုကၠောန်ထ္ၜးလဝ် နိမိက်လက္ခဏာတၟေၚ်ကဵု ပွမအံသဝ်ဗွဲမဂၠိုၚ်တံဂှ် မၞးတံတီညာတ်တုဲရ။ ဆမ္ဂး မၞးတံ ပ္တိုန်လ္တူတိုၚ်မဒၚ်တုဲ ဂစိုတ်ညးရ။”

"ယေသှုဝွံ ၜိုန်ရချိုတ်အာကီုလေဝ် ကျာ်ထာဝရဝွံ ကဵုညးဂျိုၚ်တိုန်ပၠန်ရ။ အတိုၚ်ပရောဗက်တံဟီုလဝ် ‘ မၞိဟ်မသ္အးဇ္ၚးဂှ် ဟွံကဵုသ္အုဲသ္အေၚ်ပ္ဍဲဂူသုသာန်ပုဟ်’အရေဝ်ဂှ် လၟုဟ်ဒှ်ကၠုၚ်ယျ။ ပိုဲတံဝွံ မဒှ်သက်သဳ ဂွံလဴထ္ၜးပရူကျာ်ထာဝရ ကဵုယေသှုဂျိုၚ်တိုန်နူဂမ္စိုတ်ရ။”

“နာဲယေသှုဝွံ ဂွံဂဇအ်လ္ပာ်တဲပုၚ်မအံက်ဂှ် ဒးဒုၚ်ပ္တိုန်ဂုန်စရာဲရ။ နာဲယေသှုဝွံ အတိုၚ်ကဵုလဝ်ဂတိဂှ် ပလံၚ်နၚ်ဝိညာန်မသ္အးဇ္ၚးရ။ လၟုဟ်မၞးတံဂွံမိၚ်၊ဂွံညာတ်ဒၟံၚ်ဂှ် ဟိုတ်နူကဵုဝိညာန်မသ္အးဇ္ၚးဂှ်ရ။”

"မၞိဟ်မၞးတံ ဂစိုတ်လဝ်လ္တူတိုၚ်ညးမဒၚ်ဂှ် ဒှ်နာဲယေသှုရ။ နာဲယေသှုဝွံ တၠညးဟံၚ်ပြာ်လေဝ်ဒှ်၊ ကျာ်တဳလပိုန်လေဝ်ဒှ်ရ။”

မၞိဟ်ကလၚ်ဒၟံၚ်အရေဝ်ပေတရုတံဝွံ စိုတ်ချဳတဴအိုတ်ရ။ ညးတံလေဝ် “ ကောဒေံတံ၊ မူပိုဲတံဒးကၠောန်ထေက်ရော? ”သာ်ဂှ်သၟာန် ပေတရုကဵုကောန်ကွးတံရ။

ပေတရုလေဝ် “မၞးတံ ဂွံသံၚ်ဝေဂတုဲနကဵုနာမယေသှုဂှ် ဒုၚ်ၜါတ္တိဇာံအိုတ်ညိ၊ သာ်ဂှ်ကၠောန်မ္ဂး ကျာ်ထာဝရ ဗၠးကဵုဒုဟ်မၞးတံတုဲ ဝိညာန်မသ္အးဇ္ၚးဂှ်လေဝ် ညးကဵုရောၚ်” သာ်ဂှ်ကလေၚ်သွဟ်ရ။

လၟိဟ်မၞိဟ်ပိလ္ၚီ မၞိဟ်ပ္တေဟ်အရေဝ်ပေတရုတံဝွံ ဒှ်ကၠုၚ်ကောန်ကွးယေသှုအိုတ်ရ။ ညးတံဝွံ ဒုၚ်ၜါတ္တိဇာံတုဲ လုပ်ကေတ်တာလျိုၚ်ပ္ဍဲသၚ်ယေရုသလေၚ်အိုတ်ရ။

ညးတံဝွံ အရေဝ်ကလုတ်ဒလောံဗ္တောန်ဂှ် ဆက်ကလၚ်တုဲ မံၚ်စံၚ်စသုၚ်မွဲစွံ၊ ရာဒနာမိက်မွဲစွံ၊ ထိုၚ်သးဂုန်ကျာ်မွဲစွံအိုတ်ရ။ ညးမွဲကဵုညးမွဲ အရာမနွံဂှ် ပရအ်စရ။ မၞိဟ်ဂမၠိုၚ်တံဝွံ ဟီုလဴပရူခိုဟ်ရ။ မၞိဟ်ပ္တေဟ်ယေသှုတၟိတံလေဝ် ရိုဟ်ရိုဟ်တ္ၚဲဂၠိုၚ်တိုန်ဒၟံၚ်ရ။

သၠပတ်သမ္မာ : ဝတ္ထုကလုတ် ၂