၅၀။ နာဲယေသှုခရေတ် ကလေၚ်က္ညစှ်ေကၠုၚ်

လောန်ကၠုၚ်ၜါလ္ၚီသၞာံတုဲ၊ မၞိဟ်အလုံမွဲဂၠးတိတံ မိၚ်ကၠုၚ်ပရိုၚ်တၠညးဟံၚ်ပြာ်နာဲယေသှုအိုတ်ရ။ သၚ်ခရေတ်ယာန်တံလေဝ် ဇၞော်မောဝ်တိုန်ဒၟံၚ်ရ။ နာဲယေသှုကဵုလဝ်ဂတိဂှ် စိုပ်အခိၚ်လက်ကြဴအိုတ်မ္ဂး ကလေၚ်က္ညစှ်ေကၠုၚ်ပၠန်ရောၚ်။ အခိၚ်လၟုဟ်ဝွံ ၜိုန်ရ ညးဟွံက္ညစှ်ေကၠုၚ်ဏီလေဝ် အတိုၚ်ဂတိညးဂှ် ညးဆက်မၚ်မွဲဒၟံၚ်ရောၚ်။

အခိၚ်ပိုဲတံမၚ်ဒၟံၚ်နာဲယေသှုက္ညစှ်ေကၠုၚ်ဂှ် ကျာ်ထာဝရဝွံ ဘဝပိုဲတံသ္အးဇ္ၚးတုဲ ဂွံသ္ပဝတ်ကဵုညးဂှ် ပၟိက်နွံဒၟံၚ်ရ။ ပိုဲတံဂွံလဴထ္ၜးကဵုမၞိဟ်တၞဟ်တံ ပရူသန်ထာန်ကျာ်ဂှ်လေဝ် ညးနွံပၟိက်ရ။ အခိၚ်ယေသှုနွံဒၟံၚ်ပ္ဍဲလောကဏံဂှ် ညးဟီု “ ကောန်ကွးအဲတံဝွံ ပရိုၚ်သန်ထာန်ကျာ်ဂှ် ဟီုတွံကဵုဇၟာပ်ဇၟာပ်မၞိဟ်ပ္ဍဲဂၠးတိတုဲ စိုပ်အခိၚ်လက်ကြဴအိုတ်ဂှ် ညးကလေၚ်က္ညစှ်ေကၠုၚ်ပၠန်ရောၚ်။”

မၞိဟ်ဟွံမိၚ်ပရိုၚ်နာဲယေသှုတံလေဝ် နွံဒၟံၚ်ဗွဲမဂၠိုၚ်ဏီရ။ ယေသှုဝွံ ကၠာဟွံက္ညတိုန်လ္တူဘုံအကာသဂှ် ခရေတ်ယာန်တံ ဂွံလလောၚ်တြးပရိုၚ်ခိုဟ်ကဵု မၞိဟ်ဟွံကေၚ်မိၚ်တံဂှ်ဗ္ကန်လဝ်ရ။ “ အာတုဲ မၞိဟ်ဂကူဂမၠိုၚ်ဂွံဒှ်ကောန်ကွးအဲဂှ် ဟီုတွံအိုတ်ညိ! သွက်ဂွံရတ်သြောံဂှ် သြောံဍုဟ်ဒၟံၚ်အိုတ်ယျ” ဟီုဂးရ။

ယေသှုဝွံ “ ဍိက်ဂှ် ဟွံသာလောန်နူကဵုတၠညးရ။ မၞိဟ်မနွံကဵုအဝဵုပ္ဍဲလောကဏံဝွံ ဟိုတ်နူက္ဍုဟ်အဲတုဲ ပျဲပျာံ၊ ဂစိုတ်မၞးတံရောၚ်။ ပ္ဍဲလောကဏံဂှ် မၞးဒးဒုၚ်ဒဒိုက်ရောၚ်။ ဆမ္ဂး နွံကဵုဇြဟတ်ညိ၊ မူဟိုတ်ရောမ္ဂး စာတန်ညးမအုပ်ဓုပ်ဒၟံၚ်လောကဏံဂှ် အဲကေတ်ဇၞးတုဲရ။ ယဝ်ရမၞးပ္တေဟ်အဲ ဒဵုကဵုစိုပ်ကၞောတ်မ္ဂး ကျာ်ထာဝရဟံၚ်ပြာ်ကဵုမၞးတံရောၚ်။”

ယေသှုဝွံ စိုပ်အခိၚ်ကဝ်အိုတ်မ္ဂး မၞိဟ်တံဗီုလဵုဒှ်ကၠုၚ်ဂှ် လဴထ္ၜးကဵု ကောန်ကွးတံနကဵုပုံမွဲပုံရ။ “ မၞိဟ်မွဲတၠဂှ် တဵုလဝ် 'သြောံမ' ခိုဟ်ဟ်ပ္ဍဲဝါရ။ အဃောညးတိက်လှိၚ်ဒၟံၚ်ဂှ် သၞညးဝွံ တၞံချောဲပံၚ်ဂှ် ကၠတ်တဵုအကြာမသြောံခိုဟ်တုဲ တိတ်အာသ္ၚောဲရ။ ”

စိုပ်အခိၚ်'သြောံမ'ကၠုတ်တိုန်ဂှ် “ တၠဂုန်၊ တၠဂုန်တဵုလဝ်'သြောံမ'ခိုဟ် ပ္ဍဲဝါဂှ် မူဟိုတ်တၞံချောဲပံၚ်နွံဒၟံၚ်ရော? ကောန်လိၚ်ဂှ် သၟာန်ရ။”တၠညးလေဝ် “ သၞအဲမွဲဟေၚ်ရ၊ မၞိဟ်တဵုလွဳလဝ်တၞံချောဲပံၚ်ဂှ် မဒှ်သၞအဲရ” ကလေၚ်ဟီုဂးရ။

ကောန်လိၚ်ဝွံ “ တၞံချောဲပံၚ်ဏံဂှ် ပိုဲတံ ဒးပိုတ်ထောံဟာ? ”။ တၠညးလေဝ် “ ဟအေဟ်၊ ယဝ်ရပိုတ်ကေတ်တၞံချောဲပံၚ်ဂှ်မ္ဂး တၞံသြောံခိုဟ်တံလေဝ်ပါကၠုၚ်ကီုရောၚ်။ ဒဵုကဵုစိုပ်အခိၚ်ရတ်သြောံဂှ် မၚ်ညိ။ ရတ်သြောံဂွံမ္ဂး ချောဲပံၚ်ဂှ်ပကောံတုဲ စံၚ်ထောံပ္ဍဲပၟတ်ရောၚ်။ သြောံခိုဟ်တံဂှ် ကေတ်တုဲ သီစွံပ္ဍဲဟၚ်ရောၚ်။”

ကောန်ကွးတံဝွံ အဓိပ္ပဲါပုံယေသှုဂှ် ဟွံကၠိုဟ်တုဲ ကဵုကလေၚ်သောၚ်ထ္ၜးကၠးကၠးရ။ ယေသှုလေဝ် “ မၞိဟ်ဂြာတ်မခိုဟ်ဂှ် ဒှ်တၠညးဟံၚ်ပြာ်ရ။ ဝါဗ္ၚဂှ် ဒှ်လောကရ။ မ ခိုဟ်ဟီုဂှ် ဒှ်မၞိဟ်ပ္ဍဲသန်ထာန်ကျာ်ရ” သာ်ဂှ် ကလေၚ်သောၚ်ထ္ၜးရ။

တၞံချောဲပံၚ်ဂှ် ဒှ်မၞိဟ်စာတန်ရ။ မၞိဟ်တဵုတၞံလဝ်ချောဲပံၚ်ဂှ် ဒှ်ကလော်မာရ။ အခိၚ်ဂၠးကဝ်အိုတ်မၞိဟ်ရတ်သြောံဂှ် ဒှ်ကလုတ်အကာသရ။

အခိၚ်ဂၠးကဝ်အိုတ်မ္ဂး ကလုတ်အကာသတံဝွံ ပကောံကေတ်မၞိဟ်စာတန်သီုဖအိုတ်တံ တုဲ ထောံဖျေံပ္ဍဲပၟတ်နရက်ရ။ တေံမၞိဟ်တံဝွံပ္ဍဲပၟတ်နရက်ဂှ် ဒးဒုၚ်ဝေဒနာဂိဂိတုဲ လရိုအ်ယာံအိုတ်ရောၚ်။ ဆမ္ဂး မၞိဟ်ဗက်လက်ကြဴနာဲယေသှုညးမသ္တပ်လ္ဂူတံဝွံ တုပ်ညံၚ်ရဴလျးတ္ၚဲ ပ္ဍဲသန်ထာန်အပါမအံက်ကျာ်ရောၚ်။”

ယေသှုဝွံ ကၠာကဝ်ဟွံအိုတ်ဏီဂှ် ကလေၚ်က္ညစှ်ေကၠုၚ်ပၠန်ရောၚ်ဂှ် ဟီုဂးလဝ်ရ။ အတိုၚ်ညးက္ညတိုန်လ္တူဘုံအကာသဂှ် ကလေၚ်က္ညကၠုၚ်ပၠန်ရောၚ်။ ညးဝွံ ဍိုက်မတ်ဗြဲတုဲ က္ညစှ်ေကၠုၚ်ရောၚ်။ အခိၚ်ညးက္ညစှ်ေကၠုၚ်ဂှ် မၞိဟ်ပ္တေဟ်တုဲနာဲယေသှုချိုတ်အာတံလေဝ် ကလေၚ်ဂျိုၚ်တိုန်နူဂမ္စိုတ်တုဲ ဆဵုဂဗကဵုညးလ္တူအကာသတေံရောၚ်။

ကောန်ခရေတ်ယာန်ဂျိုၚ်ဒၟံၚ်လၟုဟ်တံလေဝ် ဆဵုဂဗကဵု ညးမဂျိုၚ်တိုန်နူဂမ္စိုတ်တံလ္တူအကာသတေံရ။ နာဲယေသှုကဵု မၞိဟ်ပ္တေဟ်ညးသီုဖအိုတ်တံဝွံ ဂွံဒၟံၚ်ၜိုဟ်လလံထာဝရရောၚ်။

နာဲယေသှုဝွံ ညးကဵုလမျီုၝောံကိုတ်ကဵုမၞိဟ်ပ္တေဟ်နာဲယေသှုသီုဖအိုတ်ရောၚ်ဂှ် ကတိနွံဒၟံၚ်ရ။ ကျာ်ထာဝရကဵုမၞိဟ်တံဝွံ ပိုၚ်ပြဳအရာအိုတ်သီုတုဲ ဂွံမံၚ်အာၜိုဟ်ဟ်သြိုဟ်ဟ်လၟိုန်ထာဝရရောၚ်။

ဆမ္ဂး မၞိဟ်ဟွံပ္တေဟ်နာဲယေသှုတံဂှ် ကျာ်စဳရေၚ်ဒုဟ်ဒန်ညးတံရောၚ်။ မၞိဟ်ဟွံပ္တေဟ်ယေသှုဂှ် ညးထောံဖျေံပ္ဍဲပၟတ်နရက်တူတူရောၚ်။ ညးတံဝွံ ကိတ်ၚေက်တုဲဍာ်ရမတ်ဒတုံစှ်ေထာဝရရောၚ်။ ညးတံဝွံ ပ္ဍဲပၟတ်နရက်ဂှ် တူဒၟံၚ်တုဲ စၟပကောတ်တိတံလေဝ်ကိတ်ဒၟံၚ်လၟိုန်ရောၚ်။

အခိၚ်နာဲယေသှုကလေၚ်က္ညစှ်ေကၠုၚ်မ္ဂး စာတန်ကဵုဍုၚ်စာတန်ဂှ် ညးပလီုကၠက်ထောံသီုဖအိုတ်ရောၚ်။ညးဝွံ စာတန်ကဵုမၞိဟ်ဗက်လက်ကြဴစာတန်၊ မၞိဟ်ဟွံကလၚ်အရေဝ်ကျာ်တံဂှ် ထောံဖျေံပ္ဍဲပၟတ်နရက်ကီုတုဲ ပ္ဍဲပၟတ်ဂှ် ဒးဒုၚ်တူဒၟံၚ်လၟိုန်ထာဝရရောၚ်။

အာဍာံကဵုဨဝဝွံ ဟိုတ်နူဟွံကလၚ်အရေဝ်ကျာ်တုဲ ကေတ်နၚ်ဒုဟ် ပ္ဍဲလောကဏံရ။ ဟိုတ်ဂှ်ရ ကျာ်ထာဝရဝွံ အရာဟွံခိုဟ်တံဂှ် ကဵုဒှ်ကၠုၚ်ပ္ဍဲလောကဏံရ။ လက်ကြဴအိုတ် ညးပလီုပလာ်တိဇၞော်ရောၚ်ဂှ် ကူချပ်လဝ်ရ။စိုပ်မွဲတ္ၚဲမ္ဂး ကျာ်ထာဝရဝွံ က္တဵုပဒှ်တိဇၞော်တၟိကဵုအကာသတၟိဍိုက်က်ပေၚ်ၚ်ပၠန်ရောၚ်။

နာဲယေသှုကဵု မၞိဟ်ညးဝွံ ဒၟံၚ်ပ္ဍဲတိဇၞော်တၟိဂှ်ရောၚ်။ ညးဝွံ အရာနွံဒၟံၚ်ပ္ဍဲကဵုတိဇၞော်တၟိသီုဖအိုတ်ဂှ် အုပ်ဓုပ်လၟိုန်ရောၚ်။ မၞိဟ်ဍာ်ရမတ်ဒတုံဒၟံၚ်တံဂှ် ညးဇုက်ကဵုရောၚ်။ပ္ဍဲတိဇၞော်တၟိဂှ် ဒဒိုက်ဒုက္ခဟွံမွဲ၊ အရာမအောန်စိုတ်ဟွံမွဲ၊ အရာလရိုအ်ယာံဟွံမွဲ၊ အရာချိုတ်လေဝ်ဟွံမွဲရ။ နာဲယေသှုဝွံ နကဵုပရေၚ်ၜိုဟ်သြိုဟ်၊ သီုကဵုဗဗွဲဓဝ်ဂှ် အုပ်ဓုပ်ဍုၚ်ညး လၟိုန်ထာဝရအဆက်အဆက်ရောၚ်။

ပုံသၠပတ်သမ္မာ : ခရေတ်ဝၚ်မာတ်သာဲ ၁၃း၂၄-၃၀၊ ၃၆၊၄၂၊ ၂၂း၁၃၊ ၂၄း၁၄၊ ၂၈း၁၈၊ ခရေတ်ဝၚ်ယဝ်ဟာန် ၁၅း၂၀၊ ၁၆း၃၃၊ သၠပတ်ပယျးဒိုဟ်၂း၁၀၊ သိက်သာလဝ်နိက်သြဝါဒပထမဝက် ၄း၁၃၊ ၅း၁၁၊ ယာသြဝါဒ ၁း၁၂၊ခရေတ်ဝၚ်မာတ်သာဲ ၂၂း၁၃၊ သၠပတ်ပယျးဒိုဟ် ၂၀း၁၀၊ ၂၁း၁-၂၂း၂၁