၄၆။'ပဝ်လု'ပ္တေဟ်ကၠုၚ်နာဲယေသှုခရေတ်

'သထေဖာန်'မၞိဟ်ဟီုပရူနာဲယေသှု အခိၚ်ညးဒးဒုၚ်ဂစိုတ်ဂှ် သဝ်လုဝွံ ဒှ်မၞိဟ်မၚ်ဂၠိက်ယာတ်မၞိဟ်ပျဲပျာံတံဂှ်ရ။ အခိၚ်ဂှ် သဝ်လုဟွံပ္တေဟ်နာဲယေသှုဏီရ။ သာ်ဂှ်ရ မၞိဟ်မပ္တေဟ်နာဲယေသှု မၞိဟ်ဗြဴကဵုမၞိဟ်တြုံသီုဖအိုတ်ပ္ဍဲကဵုဍုၚ်ယေရုသလေၚ်တံဂှ် လုပ်မွဲသ္ၚိ၊ တိတ်မွဲသ္ၚိတုဲ ရပ်စုပ်ထံၚ်အိုတ်ရ။ ယတ်ပရောဟိတ်ဇၞော်ဇၞော်တံဝွံ သဝ်လုဂွံရပ်ကောန်ခရေတ်ယာန် ပ္ဍဲဍုၚ်ဍမာသကုတေံတုဲ ဂွံကေတ်နၚ်ပ္ဍဲဍုၚ်ယေရုသလေၚ်ဂှ် ကဵုလဝ်အခေါၚ်ရ။

သဝ်လုဝွံ အဃောအာဒၟံၚ်ပ္ဍဲဍုၚ်ဍမာသကု ပ္ဍဲဂၠံၚ်တြဴဂှ် လျးအကာသမွဲ စှ်ေကၠုၚ်လ္တူသဝ်လုမ္ဂး သဝ်လုဒေါံစှ်ေလ္တူတိရ။ ရမျှာၚ်တိတ်ကၠုၚ် မွဲရ။ “သဝ်လု သဝ်လု မူဟိုတ် မၞးပျဲပျာံဒၟံၚ် အဲရော။” သဝ်လုလေဝ် “တဳလဂုန်၊ တဳလဂုန်ဂှ် ညးဂှ်ရော” သၟာန်မ္ဂး “အဲဂှ် ဒှ်ယေသှုမၞးတံပျဲပျာံလဝ်ဂှ်ရ” ကလေၚ်ဟီုပၟိၚ်ရ။

အခိၚ်သဝ်လုကလေၚ်က္တဵုဂှ် မတ်ညးဟွံညာတ်ရ။ မိသဟာဲညးဝွံ ထ္ၜးဂၠံၚ်ရီုဗၚ်တုဲ စိုပ်ကၠုၚ်ဍုၚ်ဍမာသကုရ။ သဝ်လုဝွံ ပွိုၚ်ပိတ္ၚဲမူဟွံစသုၚ်ရ။

ပ္ဍဲဍုၚ်ဍမာသကုဝွံ မၞိဟ်မနွံယၟု'အာဏဏိ'ကောန်ကွးယေသှုမွဲ နွံဒၟံၚ်ရ။ ကျာ်ဝွံ “အာသ္ၚိသဝ်လုမံၚ်ဒၟံၚ်တုဲ မတ်ဂွံကလေၚ်ညာတ်မာန်ဂှ် စွံတဲလ္တူညးတေံတုဲရာဒနာမိက်ညိ” စကာ'အာဏဏိ'ရ။ ဆမ္ဂး အာဏဏိကလေၚ်ဟီု “တဳလဂုန်၊မၞိဟ်ဏံ ဗီုလဵုဂစိုတ်လဝ်ခရေတ်ယာန်တံဂှ် အဲမိၚ်တုဲရ”ကလေၚ်ဟီုရ။ကျာ်လေဝ် “အာညိ၊ ဂွံလလောၚ်တြးပရိုၚ်အဲပ္ဍဲမၞိဟ်ဂကူယုဍကဵုဂကူတၞဟ်ဟ်တံဂှ် အဲရုဲကံက်လဝ်ညးတုဲယျ။ ဟိုတ်နူအဲဂှ် ညး ဒးဒုၚ်ဝေဒနာဗွဲမလောန်ကီုရောၚ်။”သာ်ဂှ် ဟီုပၟိၚ်ရ။

အာဏဏိဝွံ ကၠုၚ်ပ္ဍဲသဝ်လုတုဲ “မၞးမတ်ဂွံကလေၚ်ညာတ်ကီု၊ ဝိညာန်မသ္အးဇ္ၚးဂွံဍိုက်ပေၚ်ကီုဂှ် မၞိဟ်မံက်ကၠုၚ်ဂတမၞး နာဲယေသှုဂှ် ဗၠးနၚ်အဲရ”ဟီုတုဲ ရာဒနာမိက်ရ။ မွဲချိုန်ခဏဂှ် မတ်သဝ်လုကလေၚ်ညာတ်ရ။ တုဲဂှ် ညးဒုၚ်ကေတ်ၜါတ္တိဇာံရ။ ညးကလေၚ်စစၞတုဲ ဇြဟတ်ပေၚ်တိုန်ပၠန်ရ။

သဝ်လုဝွံ ပ္ဍဲဍုၚ်ဍမာသကုဂှ်မံၚ်ကရောံကောန်ခရေတ်ယာန်တုဲ နာဲယေသှုဒှ်ကောန်ကျာ်ဂှ် စဟီုတွံကၠုၚ်ရ။ ဂကူယုဍတံလေဝ် အံသဝ်တုဲ “ညးဂှ်ဒှ်မၞိဟ်ပျဲပျာံ ခရေတ်ယာန်တံဟွံသေၚ်ဟာ” သၟာန်မ္ဂး သဝ်လုလေဝ် ယေသှုဒှ်တၠညးဟံၚ်ပြာ်ဂှ် နကဵုသက်သဳမသ္ဍာံသၟတ်ဂှ် သောၚ်ထ္ၜးကဵုမၞိဟ်ယုဍတံရ။

အခိၚ်လအ်လောန်ကၠုၚ်တုဲဂှ် ဂကူယုဍတံဝွံ ဂွံဂစိုတ်သဝ်လုဂှ် ကူချပ်ဒၟံၚ်ရ။ ညးတံဝွံ ဂွံဂစိုတ်သဝ်လုဂှ် ဗၠးမၞိဟ်တုဲ ကဵုမၚ်ပ္ဍဲပါၚ်ပြၚ်ဍုၚ်ရ။ ဆမ္ဂး သဝ်လု မိၚ်အစဳဇန်ညးတံတုဲ ဂွံဗၠးတိတ်အာမာန်ဂှ် အာတ်ရီုဗၚ်ရဲညးတေံရ။ စိုပ်အခိၚ်ဗ္တံဂှ် သဝ်လုဝွံလုပ်ပ္ဍဲနတုဲ နူလ္တူကၟာၚ်ဍုၚ်ဂှ်ရဲညး ဇွောဝ်ဖျေံမ္ၚးကၟာၚ်ဍုၚ်ရ။ သဝ်လုဝွံ နူဍုၚ်ဍမာသကုဂှ်ဗၠးအာတုဲ ဆက်ဟီုတွံပရူယေသှုပၠန်ရ။

သဝ်လုဝွံ စိုပ်အာပ္ဍဲဍုၚ်ယေရုသလေၚ်တုဲ ဆဵုဂဗးကဵုကောန်ကွးယေသှုတံရ။ ဆမ္ဂး ညးတံဖေက်ဒၟံၚ်သဝ်လုရ။ တုဲဂှ် မၞိဟ်ပ္တေဟ်ယေသှုမၞုံယၟု'ၜါနၜ'ဝွံ ကော်ဏာသဝ်လုပ္ဍဲကဵုကောန်ကွးယေသှုတံရ။ သဝ်လုဗီုလဵုဟီုတွံလဝ်ပရူယေသှုပ္ဍဲဍုၚ်ဍမာသကုဂှ် ညးလဴထ္ၜးကဵုကောန်ကွးယေသှုတံရ။ လက်ကြဴဂှ် ကောန်ကွးယေသှုတံလေဝ် ဒုၚ်တဲသဝ်လုရ။

ပ္ဍဲဍုၚ်ယေရုသလေၚ်ဂှ် ခရေတ်ယာန်တံဒးဒုၚ်ပျဲ ဂၠိုၚ်တိုန်တုဲ မၞိဟ်ပ္တေဟ်ယေသှုလ္ၚဵုတံလေဝ် ဂြိပ်တိတ်အာပ္ဍဲ'ဍုၚ်အာန္တိအုက်'တုဲ ဟီုတွံပရူယေသှုရ။ မၞိဟ်နွံဒၟံၚ်ပ္ဍဲဍုၚ်အာန္တိအုက်ဗွဲမဂၠိုၚ်တံဝွံ ၜိုန်ရဂကူယုဍဟွံသေၚ်ကီုလေဝ် မိၚ်ဓဝ်အလန်ကိုပ်ကၠာဂှ် ညးတံပ္တေဟ်ကၠုၚ်ယေသှုဗွဲမဂၠိုၚ်ရ။'ၜါနၜ'ကဵု'သဝ်လု'ဝွံကောန်သၚ်တံသွက်ဂွံခိုၚ်ကၠိုက်သၚ်ပ္ဍဲဍုၚ်အာန္တိအုက်ဂှ် ကဵုဇြဟတ်တွံဓဝ်ဂၠိုၚ်ၚ်ရ။ သာ်ဂှ်ရ မၞိဟ်ပ္တေဟ်နာဲယေသှု ပ္ဍဲကဵုဍုၚ်အာန္တိအုက်တံဂှ် စကော်ကၠုၚ်'ခရေတ်ယာန်'ကိုပ်ကၠာအိုတ်ရ။

မွဲတ္ၚဲဂှ် ခရေတ်ယာန်ပ္ဍဲကဵုဍုၚ်အာန္တိအုက်တံဝွံ အဃောပဲါစၞရာဒနာမိက်ဂှ် ဝိညာန်မသ္အးဇ္ၚးစှ်ေကၠုၚ်လ္တူညးတံရ။ သဝ်လုကဵုၜါနၜတံဝွံ ဒှ်မၞိဟ်ကျာ်ရုဲကံက်လဝ်သွက်ဂွံဟီုတွံပရူကျာ်ဂှ်ပံက်ထ္ၜးကဵုမၞိဟ်တံဂွံတီကၠိုဟ်ရ။ သာ်ဂှ်ရ သဝ်လုကဵုၜါနၜ ပ္တိုန်တဲလ္တူညးတံတုဲ ရာဒနာမိက်ရ။ လက်ကြဴဂှ် သဝ်လုကဵုၜါနၜဝွံ သွက်ဂွံဟီုတွံပရူယေသှုဒေသတၞဟ်တၞဟ်တံဂှ် ကျာ်ဗလးဏာရ။ သဝ်လုကဵုၜါနၜတံဝွံ ဟီုတွံကဵုမၞိဟ်ဂကူတၞဟ်သ္အာၚ်ဗွဲမဂၠိုၚ်တုဲ မၞိဟ်ဂမၠိုၚ်တံလေဝ်ပ္တေဟ်ကၠုၚ်ယေသှုအိုတ်ရ။

ပုံသၠပတ်သမ္မာ - ဝတ္ထုကလုတ် ၈း၃၊ ၉း၁-၃၁၊ ၁၁း၁၉-၁၆၊ ၁၃း၁-၃