၃၃။ ပုံသၟာဗ္ၚ
မွဲတ္ၚဲဂှ် ယေသှုဝွံ နွံဒၟံၚ် ဗ္ဒာဲဇိုၚ်သြၚ်ကၟာရ။ ညးဝွံဗ္တောန်ဖျောန်ဒၟံၚ်ကဵု ဂကောံမၞိဟ်ဂမၠိုၚ်တံရ။ မၞိဟ်ဂမၠိုၚ်တံလေဝ် ဂွံကလၚ်ဓဝ်ဂှ် ကၠုၚ်စိုပ်အိုတ်ရ။ ယေသှုဝွံ ဒၞာဲဒၟံၚ်ဟွံရုံတုဲ တိုန်မံၚ်လ္တူဂၠုၚ်ရ။ ညးဝွံဂဇအ်ဒၟံၚ်လ္တူဂၠုၚ်တုဲ ဗ္တောန်ဖျောန်ကဵုမၞိဟ်တံရ။
ယေသှုလဴထ္ၜးပုံမွဲဂှ် “ မၞိဟ်ကၠောန်ဝါဗ္ၚမွဲတၠဝွံ သွက်ဂွံတဵုလွဳဂှ် တိတ်ကၠုၚ်ရ။ ညးဝွံ ဂြာတ်မနကဵုတဲတုဲ မလ္ၚဵုတံပြးစှ်ေလ္တူဂၠံၚ်အိုတ်ရ။ မ နွံလ္တူဂၠံၚ်ဂှ် ဂစေံတံကၠုၚ်လပှ်စသီုဖအိုတ်ရ။”
“မလ္ၚဵုတံဂှ်လေဝ် လ္တူတိတၟံ ဒၞာဲတိအောန်ဂှ် ပြးစှ်ေအိုတ်ရ။ မ နွံလ္တူတၟံတံဝွံ ကၠုတ်တိုန်ဗွဲပြဟ်ရ။ၜိုန်ဂှ်လေဝ် ရိုဟ်နက်ဟွံခိုၚ်ကၟောန်ရ။ အခိၚ်တ္ၚဲတ္ကာတ်ဂှ် တၞံဆုတံလေဝ် ဇြတုဲ ချိုတ်အာအိုတ်ရ။”
“မလ္ၚဵုတံပၠန်ဂှ် ပြးစှ်ေအကြာအုပ်ဇလအိုတ်ရ။ မ ပ္ဍဲအုပ်ဇလဂှ်လေဝ် ဇၞော်တိုန်ကီုရ။ ဟိုတ်နူတၞံဇလဂှ် တၞံတံလေဝ် ဟွံဂွံဇၞော်တိုန်ခိုဟ်ဟ်ရ။ သာ်ဂှ်ရ သတ်ခိုဟ်ဂှ် သတ်ကဵုဟွံမာန်ရ။”
“မလ္ၚဵုတံဝွံ ဒတုံစှ်ေလ္တူတိခိုဟ်ရ။ မ နွံလ္တူတိခိုဟ်ဝွံ ဇၞော်တိုန်တုဲ ပ္တိတ်ကဵုသတ် ပိစှ်ောဆ၊ တြဴစှ်ောဆ၊ ကၠံဆ၊ ဗွဲမဂၠိုၚ်ရ။ မၞိဟ်မိက်ဂွံဗက်လက်ကြဴကျာ်တံဂှ်လေဝ် အရာအဲဟီုတွံလဝ်ဂှ် ကဵုမိၚ်ညိ”
ပုံဝွံ ယှုက်ထုဲဒၟံၚ်တုဲ ကောန်ကွးတံလေဝ်ကၠိုဟ်ဟွံမာန်ရ။ သာ်ဂှ်ရ ယေသှု ကလေၚ်သောၚ်ထ္ၜးပၠန်ရ။ “ မ မ္ဂးဂှ် ဒှ်ဂလာန်ကျာ်ရ။ ဂၠံၚ်မ္ဂးဂှ် ဒှ်မၞိဟ်မိၚ်ဂလာန်ကျာ်တုဲ ဟွံတီကၠိုဟ်ရ။ တေံမၞိဟ်တံ ဟွံဂွံတီကၠိုဟ်ဂှ် ကလော်မာဝွံ ဂလာန်ကျာ်ဂှ်ကေတ်ဏာသ္ၚောဲသ္ၚောဲရ။”
“ တိတၟံမ္ဂးဂှ် ဒှ်မၞိဟ်မိၚ်ဂလာန်ကျာ်တုဲ မိပ်စိုတ်ဒုၚ်တဲရ။ ယဝ်ရ ဒဒိုက်ဒုက္ခကဵု ဒဒိုက်ပျဲပျာံဂှ် ညးတံဒးဒုၚ်စသိုၚ်မ္ဂး တၚ်ပဲါကျာ်ရ။မၞိဟ်သာ်ဏံဂှ် ဒှ်မၞိဟ်ဟွံပ္တေဟ်ကျာ်ရ။”
“တိဇလမ္ဂးဂှ် ဒှ်မၞိဟ်မိၚ်ဂလာန်ကျာ်တုဲ ဆာန်ကျာ်ဟွံမာန်ရ။ ညးတံဝွံ ဂွိၚ်ဒၟံၚ်အရာသီုဖအိုတ်တုဲ ဒစာံကၠောန်ဒၟံၚ်ကမၠောန် သွက်သြန်ရ။ သာ်ဂှ်ရ အရာညးတံမိၚ်လဝ်ဂလာန်ကျာ်ဂှ် ဟွံသ္ဍိုက်မၠိုက်ရ။ ညးတံဝွံ မိၚ်ဂလာန်ကျာ်ကီုလေဝ် ပ္တိတ်ကဵုသတ်ဟွံမာန်ရ။ ”
“တိခိုဟ်မ္ဂးဂှ် ဒှ်မၞိဟ်မိၚ်ဂလာန်ကျာ်တုဲ ပ္တေဟ်ဂလာန်ကျာ်ဂှ်ရ။ ညးတံဝွံ ဒှ်မၞိဟ်ပ္တိတ်ကဵုသတ်ရ။”
ပုံသၠပတ်သမ္ပာ : ခရေတ်ဝၚ်မာတ်သာဲ ၁၃း၁-၈၊ ၁၈-၂၃၊ ခရေတ်ဝၚ်မာကု ၄း၁-၈၊ ၁၃-၂၀၊ ခရေတ်ဝၚ်လုကာ ၈း၄-၁၅