၄၇။ သိလကဵုပဝ်လုနူဍုၚ်ဖိလိပ္ပိ
သဝ်လုဝွံ အခိၚ်တိတ်တြဴ (ရဝ်မအီပဲါယျာ) မွဲဒမြိပ်ဂှ် နကဵုအရေဝ်ရဝ်မ သုၚ်စောဲကၠုၚ်ယၟု'ပဝ်လု'ကၠာရ။ မွဲတ္ၚဲဂှ် ပဝ်လုကဵုမိသဟာဲညးသိလတံဝွံ သွက်ဂွံဟီုတွံပရူယေသှုပ္ဍဲဍုၚ်ဖိလိပ္ပိဂှ် တိတ်ကၠုၚ်ရ။ ညးတံဝွံ သွက်ဂွံရာဒနာမိက်ဂှ် တိတ်ကၠုၚ်မ္ၚးဍုၚ် ဒၞာဲမၞိဟ်တံမကောံဒၟံၚ်ဗ္ဒာဲၜဳဂှ်ရ။ ပ္ဍဲကဵုဒၞာဲဂှ် ဆဵုဂဗကဵု မၞိဟ်ဗြဴသွံဖျာ မၞုံယၟု 'လုဍိ'ရ။ တေံမၞိဟ်ဗြဴဂှ် ပ္တေဟ်ကျာ်၊ ရေဟ်သေဟ်ကျာ်ထာဝရရ။
လုဍိ ဂွံပ္တေဟ်ပရိုၚ်နာဲယေသှုဂှ် ကျာ်ထာဝရဝွံ ပံက်ကဵုကောန်စိုတ်ညးရ။ အခိၚ်ဂှ် ပဝ်လုကဵုသိလတံဝွံ ကဵုၜါတ္တိဇာံ လုဍိကဵု သ္ၚိကၟိန်လုဍိတံရ။ လုဍိဝွံ ကော်ဘိက် ပဝ်လုကဵုသိလတံ ဂွံဇူဒပ်ပ္ဍဲသ္ၚိတုဲ ညးတံလေဝ် ဇူဒပ်ပ္ဍဲသ္ၚိလုဍိတံရ။
ဟွံလအ်ဟွံလအ် ပဝ်လုကဵုသိလတံဝွံ ဒၞာဲမၞိဟ်ယုဍတံရာဒနာမိက်ဂှ် ပကောံညးသ္ကအ်ရ။ဇၟာပ်တ္ၚဲညးတံအာဒၞာဲဂှ် ဍိက်ဗြဴကလော်လုပ်ဒၟံၚ်မွဲဝွံ ဗက်ကၠုၚ်ဒၟံၚ်လက်ကြဴညးတံရ။ ဟိုတ်နူဣဓိစာတန်တုဲ ဍိက်ဗြဴကလော်လုပ်ဒၟံၚ်လေဝ် လဴထ္ၜးကဵုအနာဂတ်မာန်ရ။သာ်ဂှ်လဴထ္ၜးအနာဂတ်မာန်တုဲ သြန်ဗွဲမဂၠိုၚ် ဂၠာဲကဵုသွက်တၠညးမာန်ရ။
ဍိက်ဗြဴဝွံ အဃောကွာ်ဒၟံၚ်ကရောံပဝ်လုဂှ် “မၞိဟ်ဏံဂှ် ဒှ်ကောန်ကွးကျာ်မသၠုၚ်ပြဲအိုတ်ရောၚ်။ ညးတံ ဟီုတွံကဵု ပရူတၠညးဟံၚ်ပြာ်ရောၚ်” သာ်ဂှ် ဟွံလအ်မွဲခဏကရေဲဒၟံၚ်ဗ္ဒာဲဂှ်တုဲ ပဝ်လုလေဝ်စိုတ်ယှုက်ကၠုၚ်ရ။
မွဲတ္ၚဲဂှ် အဃောဍိက်ဗြဴကရေဲဒၟံၚ်ဗ္ဒာဲဂှ် ပဝ်လုဝွံ ကလေၚ်ဂတးရံၚ်တုဲ “နကဵုနာမနာဲယေသှုဂှ် တိတ်နူဗြဴဂှ်စမ်” သာ်ဂှ်ဟီုပၟိၚ်ရ။ကလော်မာလေဝ်တိတ်အာနူဍိက်ဗြဴသ္ၚောဲသ္ၚောဲရ။
တၠဍိက်ဗြဴဂှ်လေဝ် ထေဲဒေါသတိတ်ဗွဲမလောန်ရ။ ကလော်မာတိတ်အာတုဲ ဍိက်ဗြဴလေဝ် လဴထ္ၜးအနာဂတ်ဟွံမာန်ဂှ် တၠဍိက်ဗြဴတီအာရ။ ယဝ်ရ ဍိက်ဗြဴဂှ် ဟီုထ္ၜးအနာဂတ်ဟွံမာန်မ္ဂး သွက်တၠညးဂှ် ဂၠာဲကဵုသြန်ဟွံမာန်ရ။
သာ်ဂှ်ရ တၠဍိက်ဗြဴဝွံ ရပ်ဏာပဝ်လုကဵုသိလ တုဲ ပ္အပ်ပ္ဍဲတဲရဝ်မညးမနွံကဵုအဝဵုတံရ။ ညးတံဝွံ ၜုၚ်တက်ပဝ်လုကဵုသိလတုဲ ပၠုပ်စုတ်ပ္ဍဲထံၚ်ရ။
ရဝ်မတံဝွံ ဒက်လဝ်ပဝ်လုကဵုသိလနကဵုဇုက်ခရိဟ်ဇၞော်ဇၞော်တုဲ ပၠုပ်စုတ်ပ္ဍဲထံၚ်ရ။ မၞိဟ်မၚ်ကၚ်ဗွဲမဂၠိုၚ်တံလေဝ် ကဵုမၚ်ဒၟံၚ်ရ။ ၜိုန်ဂှ်လေဝ် ပဝ်လုကဵုသိလဝွံ အခိၚ်သ္ဂာဗ္တံဂှ် ဒယှ်ေဒွက်ထိုၚ်သးဒၟံၚ်ဂုန်ကျာ် ပ္ဍဲထံၚ်ဂှ်ရ။
အဃောဒယှ်ေဒၟံၚ်ဒွက်ဂှ် တိချဳကၠုၚ်ဗွဲမပြဟ်တုဲ ပြၚ်ပ္ဍဲထံၚ်သီုဖအိုတ်တံလေဝ် ပံက်အိုတ်ရ။ ဇုက်ခရိဟ်ဒက်လဝ်ကောန်ထံၚ်တံလေဝ် ပိုတ်ဒကုတ်အာ အိုတ်ရ။
မၞိဟ်ဇၞော်ထံၚ်ဝွံ ညာတ်ပြၚ်ထံၚ်ပံက်အာမ္ဂး ဖေက်လကိုတ်ဗွဲမလောန်ရ။ မူဟိုတ်ရောမ္ဂး ညးတေံထေၚ်ခယျကောန်ထံၚ်တံ ဗၠးတိတ်အာအိုတ်တုဲ ကူချပ်ဒၟံၚ်ဂွံဂစိုတ်ဇကုဇကုရ။ (မူဟိုတ်ရောမ္ဂး ယဝ်ရကောန်ထံၚ်တံဗၠးအာသီုဖအိုတ်တ်ှေ မၞိဟ်ဇၞော်ရဝ်မတံ ဂစိုတ်ညးတေံရောၚ်ဂှ် တီဒၟံၚ်ဒတုဲရ။) အဃောမၞိဟ်ဇၞော်ထံၚ်ကူချပ်ဒၟံၚ်ဂှ် ပဝ်လုညာတ်မ္ဂး “ပိုဲတံနွံဒၟံၚ်ပ္ဍဲထံၚ်သီုဖအိုတ်ဏီရ ဇကုဇကုဂှ်လ္ပကဵုဒဒိုက်ညိ” ဟီုဂးသာ်ဂှ်ရ။
မၞိဟ်ဇၞော်ထံၚ်ဝွံ ဖေက်လကိုတ်လောန်တုဲ ဟီုကဵုပဝ်လုကဵုသိလ “အဲဍိက်ဂွံဂွံဟံၚ်ပြာ်ဂှ် မူဒးကၠောန်ရော” သၟာန်မ္ဂး ညးတံလေဝ် “ပ္တေဟ်နာဲယေသှုညိ၊ ယဝ်ရပ္တေဟ်တှ်ေ မၞးကဵုသ္ၚိကၟိန်မၞးဂှ် ဂွံဒုၚ်ကေတ်ဟံၚ်ပြာ်ရောၚ်” သာ်ဂှ်ဟီုဂးရ။တုဲဂှ် မၞိဟ်ဇၞော်ထံၚ်ဝွံ ကော်ဏာပဝ်လုကဵုသိလပ္ဍဲသ္ၚိဇကုတုဲ ကြာတ်ကဵုသရညးတံရ။ ပဝ်လုတံလေဝ် ပရိုၚ်နာဲယေသှုဂှ် လဴထ္ၜးကဵုသ္ၚိကၟိန်မၞိဟ်ဇၞော်ထံၚ်ဂှ် ရ။
မၞိဟ်ဇၞော်ထံၚ်ကဵုသ္ၚိကၟိန်ညးသီုဖအိုတ်လေဝ် ပ္တေဟ်နာဲယေသှုတုဲ ဒုၚ်ၜါတ္တိဇာံအိုတ်ရ။ တုဲဂှ် ညးတံသ္ပဝတ်တၟုဲပဝ်လုကဵုသိလတုဲ စသုၚ်မိပ်ပ်ဇြိပ်ပ်ကရောံဂှ်ရ။
စိုပ်တ္ၚဲယးဂှ် သၟိၚ်သ္ကိုပ်ဍုၚ်ဝွံ နူထံၚ်ဂှ်ဗၠးကဵုသိလကဵုပဝ်လုတုဲ အာတ်မိက်ဂွံတိတ်အာနူဍုၚ်ဖိလိပ္ပိဂှ်ရ။ ပဝ်လုတံလေဝ် အာဆဵုဂဗလုဍိကဵုသဟာဲတၞဟ်ဟ်တံတုဲ တိတ်အာနူဍုၚ်ဂှ်ရ။ ဟိုတ်နူညးတံအာစိုပ်ဇၟာပ်ဇၟာပ်ဒၞာဲတုဲ ကောန်သၚ်တံလေဝ် ဇၞော်မောဝ်တဴတက်တိုန်ကၠုၚ်ရ။
က္ဍိုပ်သ္ကိုပ်ခရေတ်ယာန်တၞဟ်ဟ်တံကဵုပဝ်လုတံဝွံ အာစိုပ်မွဲဍုၚ်တုဲမွဲဍုၚ်တုဲ ဟီုတွံပရိုၚ်နာဲယေသှုရ။ ညးတံဝွံ လိက်မဆေၚ်ကဵုတၚ်ကဵုဇြဟတ်ဂှ်ချူတုဲ လလောၚ်တြးကဵုကောန်သၚ်တံရ။ လိက်လ္ၚဵုတံဝွံ ချူထ္ၜးလဝ်ပ္ဍဲလိက်သၠပတ်ဂှ် ဂွံဆဵုညာတ်ကေတ်ရ။
သၠပတ်သမ္မာ -ဝတ္ထုကလုတ် ၁၆း၁၁-၄၀