၃၉။ ယေသှုဒးဒုၚ်ဂဗုတ်အမှု

စိုပ်အခိၚ်သ္ဂာဗ္တံဂှ် ကောန်ပၞာန်ရဝ်မတံဝွံ သွက်ဂွံသၟာန်သၟုက်ယေသှုဂှ် ကော်ဏာပ္ဍဲသ္ၚိက္ဍိုပ်သ္ကိုပ်ဘာသာယုဍတံရ။ ပေတရုလေဝ် ဗက်ကၠုၚ်လက်ကြဴကောန်ပၞာန်ရဝ်မတံကီုရ။အခိၚ်ကော်ဏာယေသှု ပ္ဍဲသ္ၚိက္ဍိုပ်သ္ကိုပ်ဘာသာယုဍဂှ် ပေတရုလေဝ် ၜံၚ်ပၟတ်မ္ၚးဂှ်တုဲ မၚ်ဒၟံၚ်ရ။

ပ္ဍဲသ္ၚိဂှ် က္ဍိုပ်သ္ကိုပ်ဘာသာယုဍတံဝွံ စဳရေၚ်အမှုယေသှုရ။ ညးတံဝွံ သွက်ဂွံဂၠာဲဒုဟ်ယေသှုဂှ် ကော်နၚ်မၞိဟ်သ္ပသက်သဳဟွံသ္ဍာံသၟတ်တံရ။ မၞိဟ်သ္ပသက်သဳတံဝွံ သက်သဳညးမွဲကုညးမွဲ တၚ်ကိတ်ညဳဟွံမွဲတုဲ ဂၠာဲဒုဟ်ယေသှုမွဲမွဲသာ်ဟွံမာန်ရ။ ယေသှုလေဝ် မူဟွံကလေၚ်ဟီုရ။

လက်ကြဴအိုတ်ဂှ် ပ္ဍဲကဵုဂကူယုဍ၊ မဒှ်မၞိဟ်က္ဍိုပ်သ္ကိုပ်ဘာသာယုဍ အဝဵုဇၞော်အိုတ်မွဲဝွံ “မၞးဂှ် မဒှ်တၠညးဟံၚ်ပြာ်၊ ကောန်ကျာ်ထာဝရမဂျိုၚ်ဒၟံၚ်ဂှ် ဍာံရဟာ? “သၟာန်ယေသှုရ။

ယေသှုဝွံ “ ဍာံရ၊ အဲဂဇအ်ဒၟံၚ်ကရောံမအံက်တုဲ က္ညစှ်ေကၠုၚ်နူလ္တူအကာသဂှ် မၞးဂွံဆဵုရောၚ်” ဟီုရ။ က္ဍိုပ်သ္ကိုပ်ဘာသာယုဍအဝဵုဇၞော်အိုတ်လေဝ် ဒေါသတိတ်တုဲ ဂစာ်ယာတ်ပလောံညးတုဲ “ သက်သဳတၞဟ်ဟ်ဂှ် ဟွံဒးဂၠာဲရပုဟ်!၊ ညးဟီု မဒှ်ကောန်ကျာ်ဂှ် မၞးတံဂွံတီမိၚ်တုဲရ၊ သာ်ဂှ်ရ ဗီုလဵုမၞးတံ မိက်ဂွံစဳရေၚ်အမှုရော?” ဟီုဂးရ။

မၞိဟ်က္ဍိုပ်သ္ကိုပ်ဘာသာယုဍတၞဟ်ဟ်တံဝွံ “ ဒးချိုတ်ထေက်ရောၚ်”ကလေၚ်သွဟ် တုဲ ၜုၚ်တက်၊တၚ်ဒုဟ်၊သ္ပပြေံကဵုယေသှုတုဲ ချဟ်ကဵုဍာ်ပါၚ်ရ။

ပေတရုဝွံ အခိၚ်မၚ်ဒၟံၚ်ဂတမုက်သ္ၚိဂှ် ဍိက်ဗြဴမွဲ ဆဵုညာတ်တုဲ “ မၞးဂှ် မိသဟာဲယေသှုဟွံသေၚ်ဟာ” သၟာန်မ္ဂး ပေတရုလေဝ် “ ဟွံသေၚ်ပုဟ်!” ကယျာန်ပဲါရ။ လက်ကြဴဂှ် မၞိဟ်ဗြဴတၞဟ်မွဲဂှ် ထပ်သၟာန်ပၠန်မ္ဂး “ ဟွံသေၚ်ပုဟ်!” ကယျာန်ပဲါပၠန်ရ။ အလန်လက်ကြဴအိုတ်ဂှ် မၞိဟ်လ္ၚဵုတံဝွံ “ မၞးလေဝ်ကောန်ဍုၚ်ဂါလိလဲ၊ မဒှ် မိသဟာဲယေသှုဂှ် ပိုဲတံတီဒၟံၚ်ရ “ ဟီုဂးအိုတ်ရ။

ပေတရုလေဝ် “ မၞိဟ်မၞးတံဟီုဒၟံၚ်ဂှ် ယဝ်ရအဲတီမ္ဂး၊ သွဴဒန်ကျာ်ဂှ် ကဵုဍိုက်ပေၚ်ပ္ဍဲအဲညိ” ကလေၚ်ဟီုရ။ မွဲချိန်ခဏဂှ် စာၚ်အုက်ဂြဴတုဲ ယေသှုဂတးဗဵု ပေတရုရ။

သာ်ဂှ်ရ ပေတရုဝွံ ဂြိပ်တိတ်အာသ္ၚောဲသ္ၚောဲတုဲ လရိုအ်ယာံဗွဲမလောန်ရ။ အခိၚ်ဂှ်ရ မၞိဟ်ဖေက်သစ္စယုဍသှကာရုက်ဝွံ မိၚ်ပရိုၚ်ဖျေံပၟိၚ်ဂစိုတ်ယေသှုမ္ဂး ဒှ်တဴအောန်စိုတ်ဗွဲမလောန်ရ။ ညးတေံဝွံ တိတ်အာဒၞာဲသ္ၚောဲသ္ၚောဲတုဲ ဇကုဇကုဂှ်စဳရေၚ်ဂစိုတ်ကေတ်ရ။

စိုပ်အခိၚ်ဂယးပြဟ်ဂှ် က္ဍိုပ်သ္ကိုပ်ဘာသာယုဍတံဝွံ ပ္ဍဲကဵုဝန်ဇၞော်ရဝ်မ'သၟိၚ်ပိလာတ်'ဂှ်ကော်ဏာယေသှုရ။ သၟိၚ်ပိလာတ်ဝွံ တၚ်ဒုဟ်၊ပပြေံတုဲ ဖျေံပၟိၚ်ဂစိုတ်ကဵုယေသှုရောၚ်ဂှ် ညးတံထေၚ်ခယျဒၟံၚ်ရ။ သၟိၚ်ပိလာတ်ဝွံ “ မၞးဂှ် ဨကရာတ်ယုဍဟာ “ သၟာန်ယေသှုရ။

ယေသှုဝွံ “ ယွံ၊ ဆမ္ဂး သန်ထာန်အဲဂှ် လောကဏံဟွံသေၚ်၊ ယဝ်ရ နွံပ္ဍဲလောကမ္ဂး ကွးအဲတံဝွံသွက်အဲဂှ် ဗ္တိုက်ကဵုရောၚ်။ အဲက္ညစှ်ေပ္ဍဲလောကဏံဂှ် သွက်ဂွံလဴထ္ၜး ပရူဓဝ်သမ္မာရ။ ဇၟာပ်မၞိဟ်သ္ဍိုက်ဆာန်ဓဝ်သမ္မာတံဂှ် ဒုၚ်တဲအဲရောၚ်” ဟီုဂးရ။ အခိၚ်ဂှ် သၟိၚ်ပိလာတ်ဝွံ “ ဓဝ်သမ္မာဂှ် မူရော” ကလေၚ်သၟာန်ရ။

သၟိၚ်ပိလာတ်ဝွံ သၟာန်သၟုက်ယေသှုတုဲ ဂတမၞိဟ်ဂမၠိုၚ်တံဂှ် တိတ်ကၠုၚ်တုဲ “ ပ္ဍဲမၞိဟ်ဏံဂှ် ဒုဟ်မွဲမွဲသာ် အဲဟွံဆဵုပုဟ်”ဟီုဂးရ။က္ဍိုပ်သ္ကိုပ်ဘာသာယုဍကဵုမၞိဟ်ဂမၠိုၚ်တံဝွံ “ ပ္တိုန်လ္တူ တိုၚ်မဒၚ် တုဲ ဂစိုတ်မၞိဟ်ဂှ်ညိ” ကရေဲဟီုအိုတ်ရ။ သၟိၚ်ပိလာတ်လေဝ် “ မၞိဟ်ဏံဂှ် ကၠောန်လဝ်ဒုဟ်ဟွံမွဲပုဟ်” ကလေၚ်ဟီုကီုလေဝ် မၞိဟ်ဂမၠိုၚ်တံဝွံ ထပ်ကရေဲတိုန် ထတ်ထတ်ရ။ သာ်ဂှ်ရ သၟိၚ်ပိလာတ်ဝွံ “မၞိဟ်ဏံဂှ် ဟွံမွဲကဵုဒုဟ်ပုဟ်” ဒဵုကဵုပေၚ်ပိဂှ် ဟီုရ။

သၟိၚ်ပိလာတ်ဝွံ ဂွိၚ်ဖေက်မၞိဟ်တံဒှ်ထုဲထုဲကြာန်ကြာန်တုဲ နကဵုကောန်ပၞာန်ညး ဂွံပ္တိုန်ယေသှုလ္တူတိုၚ်မဒၚ်ဂှ် ကေတ်တၚ်တုပ်စိုတ်ရ။ ကောန်ပၞာန်ရဝ်မတံဝွံ နကဵုလေံခမေတ်ဂှ် တက်ယေသှုတုဲ ဗွိုက်လ္တက်ဨကရာတ်ဂှ် ဂြောပ်ကဵုညးရ။ ၝောံကိုတ် ကၠောန်လဝ် နကဵုဇလဂှ် လေဝ် ဂလဝ်ကဵု လ္တူက္ဍိုပ်ညးတုဲ “ဗဵုအိုတ်၊ မၞိဟ်ဏံဂှ် ဒှ်ဨကရာတ်ယုဍရ"ဟီုဂးသ္ပပြေံယေသှုရ။

ပုံသၠပတ်သမ္မာ : ခရေတ်ဝၚ်မာတ်သာဲ ၂၆း၅၇-၂၇း၂၆၊ ခရေတ်ဝၚ်မာကု ၁၄း၅၃-၁၅း၁၅၊ ခရေတ်ဝၚ်လုကာ ၂၂း၅၄-၂၃း၂၅၊ ခရေတ်ဝၚ်ယဝ်ဟာန် ၁၈း၁၂-၁၉း၁၆၊