၂၄။ ယဝ်ဟာန်ကဵုၜါတ္တိဇာံယေသှု

ယဝ်ဟာန်မဒှ်ကောန်ဇာခရိကဵုဨလိသၜေတ်ဝွံအဝဲစိုပ်ကၠုၚ်တုဲ ဒှ်ကၠုၚ်ပရောဗက်မွဲတၠရ။ ညးဝွံ မံၚ်ပ္ဍဲဂြိုပ်ကန္တာရတုဲ စစၟအဂြၚ်ကဵုဍာ်သာဲဂြိုပ်ရ။ ယာတ်ပလောံဇိၚ်လဝ်ကဵုသော်အုက်ဂှ် လတက်ရ။

မၞိဟ်ဂမၠိုၚ်တံလေဝ် ဂွံမိၚ်အရေဝ်ယဝ်ဟာန်ဂှ် ကၠုၚ်စိုပ်ပ္ဍဲကဵုဂြိုပ်ကန္တာရဂှ်ရ။ ယဝ်ဟာန်ဝွံ “ ဂွံသံၚ်ဝေဂအိုတ်၊ သန်ထာန်ကျာ်ထာဝရဂှ် ကြပ်ကၠုၚ်ဗ္ဒာဲပိုဲယျ!”။

မၞိဟ်ဂမၠိုၚ်တံလေဝ်မိၚ်အရေဝ်ယဝ်ဟာန်မ္ဂး သွက်ဒုဟ်ညးတံဂှ် ဂွံသံၚ်ဝေဂတုဲ ဒုၚ်ၜါတ္တိဇာံပ္ဍဲယဝ်ဟာန်အိုတ်ရ။က္ဍိုပ်သ္ကိုပ်ဘာသာတံလေဝ် ကၠုၚ်စိုပ်ဂွံဆဵုယဝ်ဟာန်ရ။ ဆမ္ဂး သွက်ဒုဟ်ညးတံဂှ် ဟွံဂွံသံၚ်ဝေဂရ။

ယဝ်ဟာန်ဟီုကဵုက္ဍိုပ်သ္ကိုပ်ဘာသာတံဂှ် “ မၞးတံဝွံ ဒှ်မၞိဟ်ဇြုံမနွံကဵုဂျိရ! ဒ္ဂေတ်ပြေံမၞးတံဂှ်ပြံၚ်လှာဲတုဲဂွံသံၚ်ဝေဂညိ၊ ကျာ်ဝွံ တၞံဆုသတ်ဟွံခိုဟ်ဂှ်ဗါ်တုဲ စံၚ်ထောံပ္ဍဲပၟတ်ရောၚ်။”ဟီုရ။ ပရောဗက်ကၠာတေံဟီုပၟိၚ်လဝ်ဂှ် “ ဗဵုညိ၊ ဂတမၞးတံဂှ် အဲပလံၚ်ကဵုမၞိဟ်ပလံၚ်ပရိုၚ်မွဲတုဲ ညးဝွံ ဒှ်မၞိဟ်ပြုပြေၚ်ဂၠံၚ်မၞးတံရောၚ်။” ဂလာန်ဗရောဗက်ဂှ်နကဵု'ယဝ်ဟာန်'ဍိုက်ပေၚ်တဴရ။

မၞိဟ်က္ဍိုပ်သ္ကိုပ်ဘာသာလ္ၚဵုတံလေဝ် ညးဂှ် ဒှ်တၠညးဟံၚ်ပြာ်ဟာ?သၟာန်ရ။ ယဝ်ဟာန်ကလေၚ်ဟီု “ အဲဂှ် တၠညးဟံၚ်ပြာ်ဟွံသေၚ်၊ တၠညးဟံၚ်ပြာ်ဂှ် က္ညကၠုၚ်လက်ကရဴအဲရောၚ်။ ညးဝွံ သၠုၚ်ပြဲတုဲ သွက်ဂွံသဟ်ဇုက်ဒၞပ်ညးဂှ်အဲဟွံထေက်တန်ရ။”

တ္ၚဲယးဂှ်၊ ယေသှုဝွံ သွက်ဂွံဒုၚ်ၜါတ္တိဇာံဂှ် က္ညကၠုၚ် ဒၞာဲယဝ်ဟာန်ရ။။ ယဝ်ဟာန်ဆဵုယေသှုတုဲ “ ရံၚ်ညိ! တေံမၞိဟ်ဂှ် ဒှ်သဵုသၟတ်ကျာ်ရ၊ ညးဝွံ ယိုက်ကေတ်ဒုဟ်ပ္ဍဲလောကရောၚ်။”

ယဝ်ဟာန်ဝွံ “ သွက်ဂွံကဵုၜါတ္တိဇာံကဵုတဳလဂုန်ဂှ် အဲဟွံထေက်တန်ရ။ စဏးဂှ် တဳလဂုန်ကဵုအဲၜါတ္တိဇာံညိ ”ဟီုကဵုယေသှုရ။ ယေသှုလေဝ် “ မၞးဂှ်ထေက်ကဵုဒးကဵုအဲၜါတ္တိဇာံရောၚ်၊ မူဟိုတ်ရောမ္ဂး အရာဏံဂှ် ဒးကၠောန်ထေက်ရ။” ဟိုတ်ဂှ်ရ ယေသှုဝွံ ဒုဟ်ဟွံမွဲသာ်ကီုလေဝ် ဒုၚ်ကေတ်ၜါတ္တိဇာံပ္ဍဲယဝ်ဟာန်ရ။

အခိၚ်ယေသှုမံက်တိုန်ကၠုၚ်ပ္ဍဲဍာ်ဂှ်၊ ဝိညာန်မသ္အးသ္ၚးကျာ်ဝွံ ညံၚ်နဲဂစေံပူဂှ်ပဝ်စှ်ေကၠုၚ်တုဲ ဍုန်လ္တူညးရ။ မွဲချိုန်ခဏ၊ ရမျာၚ်ကျာ်နူလ္တူအကာသဂှ် “ မၞးဝွံ ဒဒှ်အဲမသ္ဍိုက်မၠိုက်ကောန်အဲရ”ဟီုပၟိၚ်ရ။

ကျာ်ဟီုပၟိၚ်လဝ်ကဵုယဝ်ဟာန်ဂှ် “ လ္တူမၞိဟ်ဒုၚ်ၜါတ္တိဇာံဂှ် ဝိညာန်မသ္အးသ္ၚးဝွံ က္ညစှ်ေကၠုၚ်တုဲဍုန်လ္တူညးရောၚ်။ ညးဝွံ ဒှ်ကောန်ကျာ်ရ။” ကျာ်ဝွံ နွံဆမွဲဇကုရ။ အခိၚ်ယဝ်ဟာန်ကဵုၜါတ္တိဇာံကဵုယေသှုဂှ် ဂွံမိၚ်အရေဝ်အပါမအံက်ကျာ်ရ၊ ကောန်ကျာ်ယေသှုဂှ်ဂွံညာတ်ရ၊ ဝိညာန်မသ္အးသ္ၚးဂှ်လေဝ် ယဝ်ဟာန်ဆဵုညာတ်ရ။

ပုံသၠပတ်သမ္မာ: ခရေတ်ဝၚ်မာတ်သာဲ ၃၊ ခရေဝ်ဝၚ်မာကု ၁:၉-၁၁၊ ခရေတ်ဝၚ်လုကာ ၃း၁-၂၃