၁၀။ ဘဲအန္တရာဲစှ်သာ်

ဨကရာတ်ဖာရောဝ်က္ဍိုပ်မ္ၚိုဟ်ဒၟံၚ်ဂှ် ကျာ်ကဵုလဝ်သတိမဝ်သေကဵုအာရုန်ရ။ အခိၚ်ညးတံစိုပ်အာပ္ဍဲဨကရာတ်ဖာရောဝ်ဂှ် ညးတံဟီု ကျာ်ဣသရေလဗ္ကန်လဝ် " ဗၠးကဵုမၞိဟ်ပိုဲတံညိ!။" ဆမ္ဂး ဨကရာတ်ဖာရောဝ်ဝွံ ဟွံကလၚ်အရေဝ်ညးတံရ။ စၞးဂှ် စကာကမၠောန်ဂၠိုၚ်ဂၠိုၚ်တုဲ ပျဲပျာံဂကူဣသရေလတံရ။

ဨကရာတ်ဖာရောဝ်ဂှ် ဂွံဗၠးကဵုဂကူဣသရေလဂှ် ဆက်တၚ်ပဲါရ။ သာ်ဂှ်ရ ဘဲအန္တရာဲစှ်သာ်ဂှ် ကျာ်ကဵုဒှ်ပ္ဍဲဍုၚ်အာဲဂုတ္တုရ။ကျာ်ဝွံ ညးဇြဟတ်ဇၞော် နူကဵုကျာ်အာဲဂုတ္တုသီုဖအိုတ်ဂှ်ထ္ၜးကဵုဨကရာတ်ဖာရောဝ် အရာဘဲစှ်သာ်ဏံရ။

ကျာ်ထာဝရဝွံ ၜဳ( Nile )ဂှ် ကဵုဒှ်ဆီရ။ ၜိုန်ဂှ်လေဝ် ဨကရာတ်ဖာရောဝ်ဝွံ ဟွံဗၠးကဵုမၞိဟ်ဂကူဣသရေလဏီရ။

ကျာ်ထာဝရဝွံ အလုံမွဲဍုၚ်အာဲဂုတ္တုဂှ် ဗလးနၚ်ၚဴရ။ ဨကရာတ်ဖာရောဝ်လေဝ် ၚဴတံဂွံတိတ်အာသ္ၚောဲသ္ၚောဲဂှ် ဒုန်ဂုန်မဝ်သေရ။ ဆမ္ဂး ၚဴတံချိုတ်အာအိုတ်တုဲဂှ် ဨကရာတ်ဖာရောဝ်ဝွံ စိုတ်ကြံၚ်တုဲ ဟွံဗၠးကဵုမၞိဟ်ဣသရေလတံပၠန်ရ။

သာ်ဂှ်ရ ကျာ်ဗလးနၚ်ဘဲစၟပၠာပၠန်ရ။ တုဲဂှ် ကဵုဒှ်ဘဲစၟပၠာဂှ်ရ။ ဨကရာတ်ဖာရောဝ်ဝွံ ကော်မဝ်သေကဵုအာရုန်တုဲ ဟီုကဵုညးတံဂှ် "ယဝ်ရဒေါံကဵုဘဲအန္တရာဲဏံမ္ဂး မၞိဟ်ဣသရေလတံဂွံတိတ်အာနူအာဲဂုတ္တုဏံရောၚ်။" မဝ်သေလေဝ် ရာဒနာမိက်တုဲဂှ် ကျာ်ပါဲကဵုစၟပၠာနူဍုၚ်အာဲဂုတ္တုဂှ်ရ။ ဆမ္ဂးဂှ် ဨကရာတ်ဖာရောဝ်ဝွံ စိုတ်ကြံၚ်မ္ၚိုဟ်ပၠန်တုဲ ဟွံဗၠးကဵုမၞိဟ်ဣသရေလတံပၠန်ရ။

တုဲပၠန်ဂှ် ကျာ်ထာဝရဝွံ သတ္တိရစ္ဆာန် မဆေၚ်စပ်ကဵုကောန်ဍုၚ်အာဲဂုတ္တုသီုဖအိုတ်ဂှ် ကဵုချိုတ်ယဲအိုတ်ရ။ ဆမ္ဂး ဨကရာတ်ဖာရောဝ်ဝွံ စိုတ်ကြံၚ်မ္ၚိုဟ်ဒၟံၚ်တုဲ ဟွံဗၠးကဵုမၞိဟ်ဣသရေလတံပၠန်ရ။

ကျာ်ဝွံ ဂတမုက်ဨကရာတ်ဖာရောဝ်ဂှ် ကဵုမဝ်သေ ဂြာတ်ပ္တေၚ်လ္တူကျာရ။ အခိၚ်မဝ်သေဂြာတ်ပ္တေၚ်တုဲဂှ် ကောန်ဍုၚ်အာဲဂုတ္တုတံဝွံ ဒှ်ကၠုၚ်ယဲသရ ရ။ ဆမ္ဂး မၞိဟ်ဣသရေလတံ ဟွံဒှ်ယဲရ။ ၜိုန်ဂှ်လေဝ် စိုတ်ဨကရာတ်ဖာရောဝ်ဝွံ စိုတ်ကြံၚ်မ္ၚိုဟ်တုဲ ဟွံဗၠးကဵုမၞိဟ်ဣသရေလတံဂှ်ရ။

ကြဴပၠန်ဂှ်၊ ကျာ်ကဵုမပၠဳဂူစှ်ေ ပ္ဍဲဍုၚ်အာဲဂုတ္တုတုဲ သြောံ၊သ္ၚုဗွဲမဂၠိုၚ်လီုလာ်အိုတ်ရ။ မၞိဟ်တိတ်မ္ၚးတံလေဝ် ချိုတ်အာအိုတ်ရ။ဨကရာတ်ဖာရောဝ်ဝွံ ကော်မဝ်သေကဵုအာရုန်ပၠန်တုဲ " အဲကၠောန်လဝ်ဒုဟ်ရ၊ ဗှ်ေတံတိတ်အာညိ"ဟီုဂးရ။ သာ်ဂှ်ရ မဝ်သေလေဝ် ရာဒနာမိက်ကျာ်တုဲ မပၠဳဂူစှ်ေဒၟံၚ်နူလ္တူအကာသဂှ်လေဝ် ဒေါံအာရ။

ဆမ္ဂး ဨကရာတ်ဖာရောဝ်ဝွံ ကၠောန်ဒုဟ်ပၠန်တုဲ ကြံၚ်မ္ၚိုဟ်စိုတ်ညးရ။ ညးဟွံဗၠးကဵုအာမၞိဟ်ဣသရေလတံဂှ်ပၠန်ရ။

ဟိုတ်ဂှ်ရ ကျာ်ဗၠးနၚ်စၟအဂြၚ်ဗွဲမဂၠိုၚ် ပ္ဍဲဍုၚ်အာဲဂုတ္တုရ။ သြောံ၊ သ္ၚု နူကဵုမပၠဳပလီုပလာ်ဟွံအိုတ် သေဟ်ဒၟံၚ်ဂှ် စၟအဂြၚ်တံ စထောံအိုတ်ရ။

တုဲဂှ် ကျာ်ကဵုဂၠုပွိုၚ်ပိတ္ၚဲရ။တေံအရာဂှ် ဂၠလောန်တုဲ ကောန်ဍုၚ်အာဲဂုတ္တုတံဝွံ တိတ်မ္ၚးသ္ၚိဟွံဂွံရ။ ဆမ္ဂး ဒၞာဲမၞိဟ်ဂကူဣသရေလတံ မံၚ်ဒၟံၚ်ဂှ် ပၟးဒၟံၚ်ရ။

ၜိုန်ရဘဲအန္တရာဲဒစိတ်သာ်ဒှ်တုဲကီုလေဝ်၊ ဨကရာတ်ဖာရောဝ်ဝွံ ကယျာန်ပါဲဒၟံၚ် ဂွံဗလးကဵုမၞိဟ်ဣသရလတံဏီရ။ ဨကရာတ်ဖာရောဝ်ဝွံ ဟွံကလၚ်အရေဝ်တုဲ ကျာ်စဳဇန်ဂွံက္တဵုဒှ် ဘဲဒန်လက်ကြဴအိုတ်မွဲပၠန်ရ။ ဘဲဏံဂှ် စိုတ်ဨကရာတ်ဖာရောဝ်ပြံၚ်လှာဲရောၚ်။

ပုံသၠပတ်သမ္မာ : သၠပတ်ဗၠးတိတ် ၅-၁၀