၃၀။ ယေသှုဗ္စဖာပ်မၞိဟ်မသုန်လ္ၚီ

ယေသှုဝွံ ကောန်ကွးတံဂွံတွံဓဝ်ကဵုမၞိဟ်ကွာန်တၞဟ်ဟ်တံဂှ် ဗလးဏာရ။ ကောန်ကွးတံဝွံ ကလေၚ်စဴကၠုၚ်ဒၞာဲယေသှုနွံဒၟံၚ်ဂှ်တုဲ အရာကၠောန်လဝ်တံဂှ် လဴထ္ၜးကဵုရ။ တုဲဂှ် ယေသှုကော်ဘိက်ကောန်ကွးတံသွက်ဂွံအာကရောံညးလ္ပာ်ဍာ်ခၠိုၚ်တေံရ။ ဟိုတ်ဂှ်ရ ညးတံဝွံ တိုန်အာလ္တူဂၠုၚ်တုဲ ကၠောံအာဍာ်ခၠိုၚ်သြၚ်မွဲလ္ပာ်ဂှ်ရ။

မၞိဟ်ဂမၠိုၚ်တံလေဝ် ယေသှုကဵုကောန်ကွးတံတိတ်အာကဵုဂၠုၚ်ဂှ်ဆဵုညာတ်မ္ဂး ဂွံစိုပ်သြၚ် မွဲလ္ပာ်ကၠာဂှ် ဂြိပ်ဗက်ရ။ ဟိုတ်ဂှ်ရ ယေသှုကဵုကောန်ကွးတံအခိၚ်စိုပ်သြၚ်မွဲလ္ပာ်ဂှ် မၞိဟ်ဂမၠိုၚ်တံ စိုပ်ဒၟံၚ်ကၠာတုဲမၚ်ဒၟံၚ်ညးတံရ။

ပ္ဍဲဂကောံမၞိဟ်နွံဒၟံၚ်ဂှ် လၟိဟ်မၞိဟ်ဗြဴကဵုကောန်ၚာ်တံဟွံပါဏီ လၟိဟ်မၞိဟ်တြုံဟေၚ် နွံဒၟံၚ် '၅၀၀၀' ပြၚ်ပြၚ်ရ။ ။ ယေသှုဝွံ ဆာန်ဍူမၞိဟ်တံဂှ်ရ။ “တေံမၞိဟ်တံဂှ် တုပ်ညံၚ်ရဴသဵုဟွံမွဲကဵုတၠရ” သာ်ဂှ်ယေသှုဗ္တောန်ကဵုမၞိဟ်တံတုဲ မၞိဟ်ယဲနွံဒၟံၚ်ဗ္ဒာဲဂှ်လေဝ်ကဵုဗၠးရ။

ပ္ဍဲတ္ၚဲအခိၚ်လဇုဲဂှ်၊ ကောန်ကွးတံ ဟီုကဵုယေသှုဂှ် “လၟုဟ်ဂှ် လဇုဲအာယျ၊ ဗ္ဒာဲဏံဂှ်ဍုၚ်ဟွံမွဲပုဟ်၊ ဂွံရာန်စၞစမွဲမွဲသာ်ဂှ် ဗလးဏာမၞိဟ်တံဒၞာဲသ္ၚောဲသ္ၚောဲညိ။”

ဆမ္ဂး ယေသှုကလေၚ်ဟီုဂှ် “မၞးတံ ကဵုမၞိဟ်တံစၞစ မွဲမွဲသာ်ညိ။” ကောန်ကွးတံလေဝ် “ဗီုလဵုပိုဲဂွံသ္ပမာန်ရော၊ ပ္ဍဲပိုဲဂှ် ကွာၚ်'မသုန်မ'ကဵုကဍောတ်တ်'ၜါ'ဟေၚ်နွံဒၟံၚ်ရ။”

ယေသှုဟီုပၟိၚ်ကဵုကောန်ကွးညးဂှ် “မၞိဟ်မသုန်စှ်ောမွဲဂကောံဂှ် ပကောံတုဲ ကဵုဂဇအ်လ္တူချောဲ” ရ။

တုဲဂှ်ယေသှုဝွံ ကေတ်ကွာၚ်မသုန်မကဵုကဍောတ်ၜါဂှ်တုဲ ရံၚ်လ္တူအကာသမ္ဂး သွက်စၞစဂှ်ထိုၚ်သးဂုန်ကျာ်ရ။

တုဲဂှ် ယေသှုဝးကွာၚ်တုဲ ကးဂှ်ကုတ်ရ။ ကကုတ်ကဵုကွာၚ်ဂှ် ကဵုကောန်ကွးညးတုဲ ပရအ်ကဵုမၞိဟ်ဂမၠိုၚ်တံရ။ ကောန်ကွးတံ ဆက်ပရအ်ကီုလေဝ် ဟွံအိုတ်အာရ။ မၞိဟ်သီုဖအိုတ်တံလေဝ် စဖဲလဲအိုတ်ရ။

ကောန်ကွးတံဝွံ စၞစကဝ်ဒကုတ် သေဟ်ဒၟံၚ်ဂှ် လပှ်သီဂွံ စှ်ၜါနပေၚ်ပေၚ်ရ။ စၞစသီုဖအိုတ်တံဂှ် ဒှ်ကၠုၚ်နူကွာၚ်'မသုန်မ'ကဵု ကဍောတ်'ၜါ'ဂှ်ရ။

ပုံသၠပတ်သမ္မာ : ခရေတ်ဝၚ်မာတ်သာဲ ၁၄း၁၃-၂၁။ ခရေတ်ဝၚ်မာကု ၆း၃၁-၄၄။ ခရေတ်ဝၚ်လုကာ ၉း၁၀-၁၇။ ခရေတ်ဝၚ်ယဝ်ဟာန် ၆း၅-၁၅